މަޖިލީހުގެ ނަމުގައި ނެރުނީ ސައްހަ ބަޔާނެއް ނޫން: ބައެއް މެންބަރުން
މަޖިލީހުން ނެރުނު ބަޔާނަކީ މަޖިލީހުގެ އަމީންއާންމަށް އެނގިގެން ނެރުނު ބަޔާނެއް ނޫން
މަޖިލީހުގެ މެންބަރުން މަޖިލީށް އިދާރާ ކުރިމަތީގައި
މަޖިލީހުގެ ނަމުގައި ރައްޔިތުންގެ މަޖިލީހުގެ ވެބްސައިޓުގައި ޝާއިއުކޮށްފައިވާ ބަޔާނަކީ ސައްހަ ބަޔާނެއް ނޫން ކަމަށް ރައްޔިތުންގެ މަޖިލީހުގެ ބައެއް މެންބަރުން ބުނެފި އެވެ.
މަޖިލީހުގެ ބައެއް މެންބަރުން ވަނީ މިކަމާ ގުޅިގެން އެބޭފުޅުންގެ ޝުއޫރުތައް ޓްވީޓާގައި އާންމުކޮށްފަ އެވެ.
މީދޫ ދާއިރާގެ މެންބަރު ރޮޒެއިނާ އާދަމް ކުރި ޓްވީޓުގައި ވިދާޅުވީ، މަޖިލީހުގެ އަމީންއާންމު ވިދާޅުވެފައިވަނީ މަޖިލީހުން ނެރުނު ބަޔާނަކީ އަމީންއާންމަށް އެނގިގެން ނެރެފައިވާ ބަޔާނެއް ނޫން ކަމަށެވެ. މިގޮަތަށް މަޖިލީހުގެ އަމީންއާންމަށް ނޭނގި މަޖިލީހުން ބަޔާނެއް ނުނެރެވޭނެ ކަމަށާއި މަޖިލީހުގެ ނަމުގައި ބަޔާން ނެރުނު މީހެއް ބަލައި، އެކަމަށް ފިޔަވަޅު އަޅަންޖެހޭނެ ކަމަށް މެންބަރު ރޮޒެއިނާ ވިދާޅުވި އެވެ. މިފަދަ ކަންކަމުގެ ސަަބަބުން މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް އޭނާ ވިދާޅުވި އެވެ.
ތިމަރަފުށީ ދާއިރާގެ މެންބަރު މުހައްމަދު މުސްތަފާ ވިދާޅުވީ، މިފަދަ ބަޔާނެއް މަޖިލީހުގެ އިދާރާއިން ނެރެވޭނީ އަމީންއާންމަށް އެނގިގެން ކަމަށެވެ.
މީގެ އިތުރުން ކުޅުދުއްފުށީ އުތުރު ދާއިރާގެ މެންބަރު އަބްދުލް ގަފޫރު މޫސާ ވިދާޅުވީ، މަޖިލީހުގެ ބަޔާނެއް ނެރެވޭނީ އަމީންއާންމަށް އެނގިގެން ކަމަށާއި، އެނޫން ގޮތަކަށް އެކަމެއް ނުކުރެވޭނެ ކަމަށެވެ.
"އެހެންވެ މިކަހަލަ ތާކުންތާކު ނުޖެހޭ ބަޔާނެއް ބަލައިނުގަނެވޭ،" އޭނާ ވިދާޅުވި އެވެ.
