އިންޑިއާއަށް ދަތުރުކުރާ ފަރާތްތަކުން "ސީ ފޯމް" އަށް ސަމާލުވުމަށް ފޮރިން މިނިސްޓްރީން އެދެފި

އަވަށްޓެރި އިންޑިއާއަށް ދަތުރުކުރާ ފަރާތްތަކުން މިހާރު ފުރަންޖެހޭ "ސީ ފޯމް" އަށް ހުރިހާ ފަރާތްތަކުންވެސް ސަމާލުވުމަށް، ދިވެހިރާއްޖޭގެ ފޮރިން މިނިސްޓްރީން އިލްތިމާސްކޮށްފިއެވެ.

އެ މިނިސްޓްރީން ނެރެފައިވާ އިލްތިމާސެއްގައި ބުނެފައިވަނީ، އިންޑިއާއަށް ދަތުރުކުރާ އެހެން ޤައުމުތަކުގެ ރައްޔިތުން، އިންޑިއާއަށް އެތެރެވާތާ 24 ގަޑިއިރުގެ ތެރޭގައި، އެފަރާތެއްގެ ނިދުމުގެ ކަންކަން ހަމަޖައްސާ ތަނެއް މެދުވެރިކޮށް އިންޑިއާގެ ބިއުރޯ އޮފް އެމިގްރޭޝަންގެ ވެބްސައިޓުގައިވާ "ސީ-ފޯމް" ފުރިހަމަކުރުމަކީ އިންޑިއާގެ ބިއުރޯ އޮފް އެމިގްރޭޝަނުން ލާޒިމްކުރާ ކަމެއް ކަމަށެވެ. އަދި ނިދުމުގެ ކަންތައް ހަމަޖައްސާ ތަން ބަދަލުކޮށްފި ނަމަ، އެބަދަލެއްގެ ގެންނަތާ 24 ގަޑިއިރު ތެރޭގައި ވެސް "ސީ-ފޯމް" ފުރިހަމަ ކުރަންޖެހޭނެ ކަމަށް ފޮރިން މިނިސްޓްރީން ވަނީ ބުނެފައެވެ.

ފޮރިން މިނިސްޓްރީން ބުނީ "ސީ-ފޯމް" ހުށަހެޅުމުގެ ކަންކަން ފުރިހަމަކޮށްފައި ނެތުމުގެ ސަބަބުން އިންޑިއާއަށް ދަތުރުކުރާ ދިވެހިންނަށް ބައެއް ފަހަރު ތަފާތު މައްސަލަތައް ކުރިމަތިވަމުން ދާކަން ފާހަގަކުރެވިފައިވާ ކަމަށެވެ.

"ސީ-ފޯމް" އަކީ އިންޑިއާގެ ބިއުރޯ އޮފް އެމިގްރޭޝަންގެ ވެބްސައިޓް މެދުވެރިކޮށް އޮންލައިންކޮށް ފުރިހަމަ ކުރަންޖެހޭ ފޯމެކެވެ. އިންޑިއާގެ ބިއުރޯ އޮފް އެމިގްރޭޝަންގެ ވެބްސައިޓުގައި ވާގޮތުން، ނިދުމުގެ ކަންކަން ހަމަޖައްސާ ތަންތަނުގެ ގޮތުގައި އެ ބިއުރޯއިން ބަލަނީ ހޮޓާ، ގެސްޓްހައުސް، އަމިއްލަ ފަރާތްތަކުގެ ގެ އާއި އެޕާޓްމަންޓް، ޔުނިވަރސިޓީ، އަދި ހޮސްޕިޓަލް ފަދަ ތަންތަނެވެ.

މި ތަންތަނުގެ ތެރެއިން، ހޮޓާ، ގެސްޓްހައުސް، ފަދަ ޢާންމުކޮށް "އެކޮމަޑޭޝަން" ޚިދްމަތްދޭ ތަންތަނުން އެތަނެއްގެ ޚިދްމަތް ހޯދާ ފަރާތްތަކަށް "ސީ-ފޯމް" ފުރިހަމަ ކޮށްދިން ނަމަވެސް، އަމިއްލަ ފަރާތްތަކުގެ ގެ، އެޕާޓްމަންޓް ނުވަތަ ކުއްޔަށް ހިފާފައިހުރި ގެއެއް ނުވަތަ އެޕާޓްމަންޓެއްގައި ނިދުމުގެ ކަންކަން ހަމަޖައްސާ ނަމަ، އެގެއެއް ނުވަތަ އެޕާޓްމަންޓެއްގެ ވެރިފަރާތުން ނުވަތަ ކުއްޔަށް ހިފާފައިވާ ފަރާތުން "ސީ-ފޯމް" ފުރިހަމަކުރުމަށާއި، އަދި ދަތުރުވެރިޔާ ވެސް މިކަން ކަށަވަރު ކުރުމަކީ މުހިންމު ކަމެއްކަން ފޮރިން މިނިސްޓްރީން ވަނީ ހަނދާންކޮށްދީފައެވެ.

މީގެ އިތުރުން އިންޑިއާގައި އުޅޭއިރު، އެ ޤައުމުގެ އެންމެހާ ޤަވާއިދުތަކާއި ޢާންމު މިންގަނޑުތަކަށް ޙުރުމަތްތެރިކޮށް ހިތުމަށާއި، އަދި އެ ޤައުމުގެ ރަސްމީ އިދާރާތަކުން އަންގާ އެންގުންތަކާއި އިރުޝާދުތަކަށް ސަމާލުކަންދީ އެކަންކަމަށް ޢަމަލުކުރުމަށް ފޮރިން މިނިސްޓްރީން ވަނީ އިލްތިމާސްކޮށް، ހަނދާންކޮށްދީފައެވެ.

އިންޑިއާ އަށް ދަތުރުކުރާ ދިވެހިންނަށް ދޭތެރެ ދޭތެރެއިން އުަނދަގޫތަކާ ކުރިމަތިލާންޖެހެއެވެ. އާންމު ގޮތެއްގައި މިފަދަ އުނދަގޫތައް ކުރިމަތިވާން ފަށަނީ ރާއްޖެ އާއި އިންޑިއާއާ ދެމެދު ކޮންމެ ވެސް ސަބަބަކާ ހުރެ ގުޅުން ގޯސްވާ ދަނޑިވަޅުތަކުގައެވެ. އެ ގޮތުން 2012 ވަނަ އަހަރު ވެރިކަން ބަދަލުވެ އިންޑީއާގެ ޖީއެމްއާރު އަތުން އެއާޕޯޓް އަތުލަން އޭރުގެ ރައީސް ޑރ. މުހައްމަދު ވަހީދު ނިންމެވުމާ އެކު ދިވެހިންނަށް ގިނަ ހުރަސްތަކެއް އިންޑިއާ އިން ކުރިމަތިކުރުވިއެވެ.