އިތުބާރު ނެތް ކަމުގެ މައްސަލައިގައި ރައްޔިތުންގެ މަޖިލީހުގެ ކޮންމެ ނިންމުމެއްގެ ސައްހަކަން ކަނޑައަޅާނީ ސްޕްރީމް ކޯޓުން: ހުކުމް

އިތުބާރުނެތް ކަމުގެ މައްސަލައާ ގުޅޭ ގޮތުން ރައްޔިތުންގެ މަޖިލީހުގެ ކޮންމެ ނިންމުމެއްގެ ސައްހަކަން ކަނޑައަޅާނީ ސްޕްރީމް ކޯޓުން ކަމަށް އެކޯޓުން ހޯމަ ދުވަހު ކަނޑައަޅާ އެ ގޮތައް އަމަލު ކުރުމަށް ރައްޔިތުންގެ މަޖިލީހަށާއި ދައުލަތުގެ މުއައްސަސާތަކުގެ މައްޗަށް ސްޕްރީމް ކޯޓުން އަމުރު ކޮށްފިއެވެ.

ސްޕްރީމް ކޯޓުން މިގޮތައް ނިންމީ ސްޕްރީމް ކޯޓުގެ މުޅި ބެންޗުގެ އިއްތިފާގުންނެވެ.

Advertisement

ސުޕްރީމް ކޯޓުން މިގޮތައް ހުކުމް ކުރީ ގާނޫނު އަސާސީގެ 101 ވަނަ މާއްދާ މާނަކޮށް އެކަށީގެންވާ ސަބަބެއް ނެތި، ސިޔާސީ ގޮތުން ވަޒީރުން ވަކި ކުރުމުގެ ބާރު މަޖިލީހަށް ލިބިގެން ނުވާ ކަމަށް ކަނޑައަޅައިދޭން އެދި އެޓާނީ ޖެނެރަލް އޮފީހުން ސުޕްރީމް ކޯޓަށް ހުށަހެޅި މައްސަލައާ ގުޅިގެން އެ މައްސަލަ ބެލުމަށްފަހުގައެވެ.

ސްޕްރީމް ކޯޓުން މި މައްސަލައިގައި ކުރި ހުކުމަށް ބަލާއިރު، ޖުމްލަ ކޮށް އަމުރު ކޮށްފައިވަނީ، ރައްޔިތުންގެ މަޖިލީހުން އިތުބާރު ނެތް ކަމުގެ މައްސަލައިގައި ނިންމާ ކޮންމެ ނިންމުމެއްގެ ސައްހަކަން ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއާއި ގާނޫނުތަކުގެ ބެލެނިވެރިޔާގެ ހައިސިއްޔަތުން ދިވެހި ރާއްޖޭގެ ސްޕްރީމް ކޯޓުން ވަކި ގޮތެއް ކަނޑައެޅާނެ ކަމަށެވެ.

އެޓާނީ ޖެނެރަލްގެ އޮފީހުން ހުށަހެޅި މައްސަލައިގައި ވަޒީރުންގެ އިތުބާރު ނެތް ކަމުގެ މައްސަލައަށް ރިއާޔަތް ކޮށްފައިވީނަމަވެސް ސްޕްރީމް ކޯޓުގެ ހުކުމުގައި ރައްޔިތުންގެ މަޖިލީހުގެ ކޮންމެ ނިންމުމެއްގެ ސައްހަކަން ކަނޑައަޅާނީ ސްޕްރީމް ކޯޓުން ކަމަށް ކަނޑައަޅާފައި އޮތުމުން ވަޒީރުންގެ މަޖިލީހުގެ މެމްބަރުންގެ އިތުރުން، އިތުބާރު ނެތް ކަމަށް ރައްޔިތުންގެ މަޖިލީހުން ފާސްކުރާ އެހެން ކޮންމެ މައްސަލައެއްގައި އެކަމުގެ ސައްހަ ކަން ބެލުމަށް ސްޕްރީމް ކޯޓަށް ހުށަހަޅަން ޖެހޭނެ ކަމަށް ބެލެއެވެ. އެހެން ކަމުން ރައީސުލް ޖުމްހޫރިއްޔާ އާއި ނައިބު ރައީސްއާއި ސްޕްރީމް ކޯޓުގެ ފަނޑިޔާރުންނާއި، މިނިވަން މުއައްސަސާތަކުގެ މެމްބަރުންގެ އިތުބާރު ނެތް ކަމަށް ރައްޔިތުންގެ މަޖިލީހުން ފާސް ކުރިޔަސް އިތުބާރު ނެތް ކަމަށް ނިންމޭނީ ސްޕްރީމް ކޯޓުން އެކަން އެ ގޮތައް ކަނޑައެޅުމުން ކަމަށްވެސް ހުކުމުން ދޭހަވެއެވެ.