އިމްތިހާނުގައި ގުރުއާން ވަކި މައްދާއެއްގެ ގޮތުގައި ކިޔެވުން މަޖުބޫރުވާނެކަމަށާއި ނަމަވެސް މަތީ ސާނަވީ ތައުލީމް ހާސިލްކުރާއިރު މާއްދާ އިހްތިޔާރީ މާއްދާއެއްކަމަށް އެޑިއުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަދައްކަވަމުން އެޑިއުކޭޝަން ޑިވޮލެޕްމެންޓް އޮފިސަރ ހަސަން ލަބީބް ވިދާލުވީ 2015 ވަނަ އަހަރުން ފެށިގެން އައު މަންހަޖު ފެށިގެން އައުމާއެކު އައި އެންމެ ބޮޑު ކުރިއެރުމަކީ ގުރުއާން ވަކި މާއްދާއެއްގެ ގޮތުގައި ކިޔަވަން ފެށިގެން އައުންކަމަށެވެ.
ކުރިން، އިސްލާމް މާއްދާގެ ތެރެއިން ގުރުއާނުގެ ބައި ހިމެނިފައިވާކަން ފާހަގަކޮށް ލަބީބް ވިދާޅުވީ ސެކެންޑްރީ ނިމެންދެން ގުރުއާން ވަކި މާއްދާއެއްގެ ގޮތުގައި ކިޔެވުމަކީ މަޖުބޫރުކަމެއްކަމަށެވެ. ނަމަވެސް މަތީސާނަވީ ތައުލީމް ހާސިލްކުރާ ކުދިންނަށް ގުރްއާން އިހްތިޔާރީ މާއްދާއެއްގެ ގޮތުގައި ވާކަމަށާއި ގްރޭޑް 1 އިން ފެށިގެން 10 އަކަށް ކިޔަވާ ހުރިހާ ކުދިންނަށް ގުރުއާން ތަޖުވީދު ހަމަތަކުގެ މަތިން ކިޔަވަން ދަސްވާނެކަމަށެވެ.
ސެކެންޑްރީ ނިމި އަދި ހަޔަރ ސެކެންޑްރީ ނިމެންދެންވެސް އަޅުގަނޑުމެން މިހާރު ގުރުއާން ހިމަނާފައި އޮތީ. އެހެންނަމަވެސް ސެކެންޑްރީ ނިމެންދެން މަޖުބޫރު. ހަޔަރ ސެކެންޑްރީގައި އިހްތިޔާރީ މާއްދާއެއް. އަޅުގަނޑުމެން މިހާރު މުގައްރަރު ހަމަޖެހިފައި އޮތް ގޮތުން ގްރޭޑް 1 ކުން ފެށިގެން 10 ނިމެންދެން ކިޔަވާ ކުއްޖާއަށް ކީރިތި ގުރުއާން ތަޖުވީދުގެ ހަމަތަކާއި އެއްގޮތަށް ކިޔަވަން އެނގޭނެ. އަދި ގުރުއާންގެ އާޔަތްތައް އެހެން މާއްދާތައް ލިޔާގޮތަށް ލިޔަންވެސް އެނގޭނެ.އެޑިއުކޭޝަން ޑިވިލެޕްމެންޓް އޮފިސަރ ހަސަން ލަބީބް
ޕްރޮގުރާމްގައި އިތުރަށް ވާހަކަ ދައްކަވަމުން ލަބީބު ވިދާޅުވީ މުގައްރަރުގައި ވާގޮތަށް ކުރިޔަށް ގެންދިޔުމަށްޓަކައި ނޭޝަނަލް އެޑިޔުކޭޝަން އިންސްޓިޓްގެ ވެބްސައިޓުގައި މުގައްރަރު ހިމަނާފައިވާކަމަށާއި ދަރިވަރުންނެކޭ އެއްގޮތަށް ކޮންމެ އަހަރަކުވެސް މުދައްރިސުންގެ ފޮތް ޗާޕްކޮށް ހުރިހަ ސްކޫލްތަކަށްވެސް ފޮނުވާކަމަށެވެ. 2015 ވަނަ އަހަރުން ފެށިގެން ގުރުއާން ވަކި މާއްދާއެއްގެ ގޮތުގައި ކިޔަވާ ކުދިން މިފެށޭ ދިރާސީ އައު އަހަރުގައި ގްރޭޑް 10 އަކަށް ދާކަން ފާހަގަކޮށް އެޑިއުކޭޝަން މިނިސްޓްރީން ބުނެފައިވަނީ އިސްލާމް، ދިވެހި އަދި ގުރުއާން މި ތިން މާއްދާވެސް 2020 ވަނަ އަހަރުގެ އެސްއެސްސީ އިމްތިހާނުގައި ހިމެނޭނެކަމަށެވެ.
ޕްރޮގުރާމްގައި ވާހަކަދައްކަވަމުން އެޑިއުކޭޝަން އޮފިސަރ ހަސަން ސާމިރު ވިދާޅުވީ، އަލަށް ގުރުއާން އެސްއެސްސީ އިމްތިހާނުގައި ހިމެނޭއިރު ކަންބޮޑުވުންތަކެއް އެބަހުރިކަމަށާއި އަލަށް ތައާރަފްކުރެވުނަސް އެޑިއުކޭޝަން މިނިސްޓްރީން ވީހާވެސް އޮމާންކޮށް ކުރިޔަށް ގެންދިއުމަށް މަސައްކަތްކުރާކަމަށެވެ. އެގޮތުން އެންއައީން ގުރުއާން އެސެސް ކުރާނެ ވަކި އުސޫލުތަކެއް ކަނޑައަޅާފައިވާކަމަށާއި އެ މައުލޫމާތުތައް މިނިސްޓްރީ އޮފް އެޑިއުކޭޝަން އިން އެޕްރޫވްކޮށް ސްކޫލްތަކަށްވެސް ހިއްސާކުރެވިފައިވާކަމަށް އޭނާ ވަނީ ވިދާޅުވެފައެވެ.
އެސްއެސްސީ އިމްތިހާނުގައި މި މާއްދާއަށް މާކްސް ދޭނީ ސްކޫލުގެ އިންޓާނަލް އެސެސްމަންޓުން 60 އިންސައްތަ މާކްސް ބާކީ 40 އިންސައްތަ ނަގާނީ ޕަބްލިކް އެގްޒަމިނޭޝަނުން ނުވަތަ ޕްރޮޖެކްޓް އެސެސްމަންޓްތަކުން އެޑިއުކޭޝަން މިނިސްޓްރީން މީގެކުރިން ވަނީ ބުނެފައެވެ.
