އޮޒިލް ދައްކަނީ އޭނާގެ އަމިއްލަ ވާހަކަ: ވެންގާ
18 ޑިސެމްބަރު 2019 | ބުދަ 14:00ވީގޯ މުސްލިމުންނަށް ދޭ އަނިޔާޔާއި ދެކޮޅަށް އޮޒިލް ވަނީ ނުރުހުން ފާޅު ކޮށްފަ
މެސެޓް އޮޒިލް
އާސެނަލްގެ މުސްލިމް ކުޅުންތެރިޔާ މެސިޓް އޮޒިލް މީސް މީޑިއާގައި ދައްކަމުން އަންނަނީ އޭނާގެ އަމިއްލަ ވާހަކަ ކަމަށާއި އެކަމާއި ބެހޭ ގޮތުން އޭނާ ކްލަބާއި މަޝްވަރާ ނުކުރާ ކަމަށް އާސެނަލްގެ ކުރީގެ ކޯޗު އަދި ފީފާގެ ޓެކްނިކަލް ޑިވެލޮޕްމަންޓުގެ ހެޑް އާސެން ވެންގާ ވިދާޅުވެއްޖެއެވެ.
ޗައިނާގެ ވީގޯ މުސްލިމުންނާ ބެހޭ ގޮތުން އޮޒިލް ދެއްކި ވާހަކައަކީ އޭނާގެ އަމިއްލަ ވާހަކަ ކަމަށް ވިދާޅުވަމުން ވެންގާ ވިދާޅުވީ އޮޒިލް އަށް އޭނާ ބޭނުންވާ ވާހަކައެއް މީޑިއާގައި ދެއްކުމުގެ މިނިވަންކަން އޮންނާނެ ކަމަށާއި އޭނާ އެ ވާހަކަ ދެއްކީ އޭނާގެ ދީން ހިމާޔާތް ކުރުމުގެ ނިޔަތުގައި ކަމަށާއި އޭނާ ފާޅުކުރީ އޭނާގެ އަމިއްލަ ޝުއޫރު ކަމަށެވެ.
ވެންގާ އިތުރަށް ވިދާޅުވީ އޮޒިލް ބުނި ވާހަކައަކުން އެކަމުގެ އަދަބު މުޅި ކްލަބަށް ލިބެން ނުޖެހޭނެ ކަމަށާއި، އޮޒިލް ދެއްކި ވާހަކަ އަކީ އާސެނަލް ކްލަބަށް ގެއްލުމެއް ދިނުމުގެ ނިޔަތުގައި ދެއްކި ވާހަކައެއް ނޫން ކަމަށެވެ.
ތުރުކީގެ މުސްލިމް ދަރިފަސްކޮޅަށް ނިސްބަތްވާ އޮޒިލްގެ އިންސްޓަގްރާމް ޕޯސްޓުގައި އޭނާ ބުނެފައިވަނީ، ޝިންޖިއާން ގައި ދިރިއުޅޭ މުސްލިމުންގެ މިސްކިތްތައް ބަންދުކޮށް، ކީރިތި ޤުރުއާން އަންދައި، ދީނީ ޢިލްމުވެރިން ބަންދުކުރަމުންދާއިރު އެއްވެސް އެއްޗެއް ބުނަން ނުކެރި މުސްލިމު އުއްމަތް ތިބެނީ ހަނުކަމަށެެވެ.
އޮޒިލްގެ އެ ވާހަކަތާކާއި ގުޅިގެން ޗައިނާގައި ތިބޭ އާސެނަލް ފޭނުން ތިބީ ރުޅިގަދަވެފައެވެ. ބައެއް ފޭނުން ބުނަނީ އެމީހުން ތާއިދުކުރާ ކްލަބެއްގެ ކުޅުންތެރިއަކު އެފަދަ ''ދޮގު'' ވާހަކަތަކެއް ދައްކާނެ ކަމަށް ހީނުކުރާ ކަމަށެވެ.
