މުސާރަބޮޑުކޮށް އާ އެއްބަސްވުމެއް އާސެނަލްއިން އޮޒިލް އަށް ހުށަހަޅައިފި

ހަފްތާއަކު 280،000 ޕައުންޑް ލިބޭ އާ އެއްބަސްވުމެއް އާސެނަލް އިން އެޓީމުގެ މިޑްފިލްޑަރު މެސުތް އޮޒިލް އަށް ހުށަހަޅައިފި ކަމަށް ރިޕޯޓްތައް ބުނެފި އެވެ.

މަޝްހޫރު ނޫހެއް ކަމަށްވާ ދަ މިރާ އިން ބުނީ އާސެނަލް އިން އޮޒިލް އަށް އާ އެއްބަސްވުމެއް ހުށަހަޅާފައިވާ ކަމަށާއި، އެ އެއްބަސްވުމާއެކު އޭނާ އަށް ހަފްތާއަކު 280،000 ޕައުންޑު ލިބޭނެ ކަމަށެވެ.

އޮޒިލްއާއެކު އާސެނަލް މިހާރު ހަދާފައި އޮތް އެއްބަސްވުމާއެކު އޭނާ އަށް ލިބެނީ ހަފްތާއަކު 140،000 ޕައުންޑެވެ. އެގޮތުން އޭނާގެ މުސާރަ ބޮޑުކުރަން އާސެނަލް އިން ނިންމީ އޭނާގެ އެދުމުގެ މަތިންކަމަށް ރިޕޯޓްތައް ބުނެއެވެ.

އޮޒިލް ހޯދުމަށް ޕްރިމިއާ ލީގު، ޖަރުމަން ލީގު، އިޓާލިއަން ލީގުގެ ކްލަބްތަކުންވެސް އަންނަނީ މަސައްކަތް ކުރަމުންނެވެ. އެހެންނަމަވެސް އޮޒިލް ދޫކޮށްލަން އާސެނަލް އިން އެއްބަސްނުވާނެ ކަމަށް ބެލެވެއެވެ.

ޝާލްކޭ އިން 2006 ވަނަ އަހަރު ކެރިޔަރު ފެށި އޮޒިލް ވިދާލީ 2010 ވަނަ އަހަރު ރެއާލް އަށް ބަދަލުވި ހިސާބުންނެވެ. އެގޮތުން އޭނާ ވަނީ އެ ކްލަބަށް ކުޅުނު ހަތަރު ސީޒަނުގައި 159 މެޗު ކުޅެ، 27 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ސްޕެނިޝް ލަލީގާ، ކޮޕާޑެލްރޭ އަދި ސްޕެނިޝް ސުޕާކަޕްވެސް ކާމިޔާބުކޮށްފައެވެ.

ރެއާލް ދޫކޮށްލުމަށްފަހު އޮޒިލް އާސެނަލް އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިވީތަނަށް އެ ކްލަބަށް ކުޅުނު ހަތަރު ސީޒަނުގައި 144 މެޗު ކުޅެ، 29 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެ ކްލަބާއެކު އެފްއޭކަޕް ދެފަހަރު އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ.