އެމެރިކާއިން އީރާނަށް ހަމަލާދޭން ފެށި ދުވަހުގެ ހާމަނުކުރާ ވާހަކަތައް: އެމެރިކާގެ ހަމަލާތަކަށް ފަހު މަދު ގަޑިއިރުތަކެއްގެ ތެރޭގައި އީރާނުން އެފް-35 މަރުކާގެ ބޯޓެއްގެ މިޝަން ހުއްޓުވައި އެމެރިކާ ސިއްސުވާލި

2026 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭ، އީރާނުގެ އެއަރ ޑިފެންސް ނިޒާމުން ވަނީ އަސްކަރީ ގޮތުން ފާހަގަކޮށްލެވޭ ބޮޑު ކާމިޔާބީއެއް ހޯދާފަ އެވެ. އެގޮތުން އެމެރިކާގެ އެމްކިއު-9 ރީޕަރ މަރުކާގެ ޑްރޯނެއް ބަޑިޖަހައި ވައްޓާލުމުގެ އިތުރުން، އެމެރިކާގެ އެންމެ ޒަމާނީ ފަސްވަނަ ޖީލުގެ އެފް-35 ލައިޓްނިންގ II ސްޓެލްތު ފައިޓަރ ޖެޓަކަށް އަމާޒު ހިފައި (ވެޕަންސް ކޮލިޓީ ލޮކް)، އެ ބޯޓުގެ މިޝަން ހުއްޓާލައި އީރާނުގެ ވައިގެ ސަރަހައްދުން ފޭބުމަށް ވަނީ މަޖުބޫރުކުރުވާފަ އެވެ. މިއީ ފާއިތުވި ދިހަވަރަކަށް އަހަރުގެ ތެރޭގައި އެމެރިކާގެ ވައިގެ ބާރަށް ކުރިމަތިވި އެންމެ ބޮޑު އެއް ނާކާމިޔާބީ އެވެ.

މި ހާދިސާތައް ހިނގާފައިވަނީ އީރާނުގެ ދެކުނުގެ މަދަނީ އަދި އަސްކަރީ ސަރަހައްދުތަކަށް އެމެރިކާއިން ދިން ހަމަލާތަކުގެ ބަދަލުހިފުމުގެ ގޮތުން، އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދެމުންދިޔަ ވަރުގަދަ ހަމަލާތަކުގެ ތެރޭގަ އެވެ.

އީރާނުގެ އެއަރ ޑިފެންސް ނެޓްވޯކުން އެމްކިއު-9 ރީޕަރ ޑްރޯނެއް ހުއްޓުވައި ސުންނާފަތިކޮށްލި ޚަބަރު އެ ވަގުތު އާންމުވި ނަމަވެސް، އެއަށްވުރެ މާ މުހިންމު ކުރިއެރުމެއް އީރާނުން އޮތީ ހޯދާފަ އެވެ. އެއީ އެމެރިކާގެ އެފް-35 ސްޓެލްތު ފައިޓަރަށް އަމާޒު ހިފައި، އެ ބޯޓު ނުރައްކަލުގެ ތެރެއަށް ވައްޓާލައި، ލަދުވެތި ގޮތަކަށް އެ ސަރަހައްދުން ފިލައިގެން ދާން މަޖުބޫރުކުރުވި ހާދިސާ އެވެ. މިކަން ކުރިން އޮތީ އާންމުންނަށް ސިއްރުވެފަ އެވެ.

ޕެންޓަގަންގެ އިސް އޮފިޝަލުންނާ ގާތް ގުޅުމެއް އޮންނަ މީޑިއާ އައުޓްލެޓެއް ކަމަށްވާ "އެކްސިއޯސް" އިން އޮގަސްޓް 31 ގައި ޝާއިޢުކުރި ރިޕޯޓެއްގައި، އެމެރިކާ ސަރުކާރުގެ ނަން ހާމަނުކުރާ އޮފިޝަލުންނާ ހަވާލާދީ ބުނެފައިވަނީ، ހުރްމުޒް ކަނޑުއޮޅި ސަރަހައްދުގައި އީރާނުން އެގައުމުގެ ރާޑަރު، އެއަރ ޑިފެންސް އަދި އެންޓި-ޝިޕް މިސައިލް ގާބިލުކަން އިތުރުކުރަމުންދާތީ އެމެރިކާގެ ސެންޓްރަލް ކޮމާންޑް (ސެންޓްކޮމް) އިން އިންތިހާއަށް ކަންބޮޑުވާ ކަމަށެވެ. މީގެ ސަބަބުން އެމެރިކާގެ މަނަވަރުތަކަށް މާ ފުރިހަމައަށް އަމާޒު ހިފުމުގެ ގާބިލުކަން އީރާނަށް ލިބިގެންދެ އެވެ.

އެ ރިޕޯޓުގައިވާ ގޮތުން ވޮޝިންޓަންގެ އިސްވެރިން އެންމެ ބޮޑަށް ކަންބޮޑުވީ، ހުރްމުޒް ކަނޑުއޮޅީގައި ހަރަކާތްތެރިވަމުންދިޔަ އެމެރިކާގެ މަނަވަރުތަކަށް ހިމާޔަތްދެމުންދިޔަ އެފް-35 ފައިޓަރ ޖެޓަކަށް އަމާޒުކޮށް އީރާނުން އެންޓި-އެއަރކްރާފްޓް މިސައިލެއް ފޮނުވާލި ހާދިސާއާ ގުޅިގެންނެވެ.

އެމެރިކާގެ އޮފިޝަލުން މި ހާދިސާ ސިފަކުރެއްވީ އީރާނުން އެގައުމުގެ އަސްކަރީ ގާބިލުކަން އަލުން ވަރުގަދަކުރަމުންދާ ކަމުގެ ހެއްކެއްގެ ގޮތުގަ އެވެ. މިއީ ޖުލައި 31 ގައި ހިނގި ކަންތައްތަކަށް އެމެރިކާއިން އެއްބަސްވުން ކަމަށް އެ ރިޕޯޓުގައި ފާހަގަކޮށްފައިވެ އެވެ.

އެމްކިއު-9 ރީޕަރ ވައްޓާލުމުގެ މުހިންމުކަން

އެމްކިއު-9 ރީޕަރަކީ އެމެރިކާގެ އަސްކަރިއްޔާގައި ބޭނުންކުރާ އެންމެ ގާބިލު އިންސާނަކާ ނުލައި ދުއްވާ އުޅަނދެވެ. މިއީ މައުލޫމާތު އެއްކުރުމާއި، ފާރަވެރިވުމާއި، އަދި ސީދާ އަމާޒަށް ހަމަލާދިނުމުގެ މިޝަންތަކުގައި ބޭނުންކުރާ މައިގަނޑު ވަސީލަތެވެ.

މި ޑްރޯނަށް މެދުނުކެނޑި 27 ގަޑިއިރު ވައިގެ ތެރޭގައި އޮވެވޭއިރު، ގަޑިއަކު 240 ނޮޓްގެ ބާރުމިނުގައި ދަތުރުކުރުމުގެ ގާބިލުކަން ލިބިގެންވެ އެވެ. އަދި 50،000 ފޫޓު މަތިން އުދުހުމުގެ ގާބިލުކަން ހުންނަ މި އުޅަނދަށް، ހެލްފަޔަރ މިސައިލާއި ލޭޒަރ-ގައިޑެޑް ބޮން ހިމެނޭހެން 1،750 ކިލޯގްރާމްގެ ހަތިޔާރު އުފުލިދާނެ އެވެ.

އެމްކިއު-9 ރީޕަރެއްގެ އަގު 50 މިލިއަން ޑޮލަރަށް އަރާއިރު، މިއީ އާންމު ބައެއް ފައިޓަރ ޖެޓުތަކަށްވުރެވެސް އަގުބޮޑު އުޅަނދެކެވެ. މިއީ އެ ސަރަހައްދުގައި އެމެރިކާއިން ގެންގުޅޭ އަސްކަރީ ސިޔާސަތުގެ މައިގަނޑު އެއް ތަނބެވެ.

މި ޑްރޯންގައި ހުންނަ ސެންސަރުތަކާއި މުވާސަލާތީ ނިޒާމުތަކުގެ އެހީގައި ބޮޑެތި ސަރަހައްދުތަކަށް ފާރަވެރިވެވޭއިރު، އަމާޒުތައް ދެނެގަތުމަށްފަހު ވަގުތުން ވަގުތަށް ހަމަލާދިނުމުގެ ގާބިލުކަންވެސް ލިބިގެންވެ އެވެ.

މިފަދަ އަގުބޮޑު އަދި މުހިންމު އުޅަނދެއް ވައްޓާލުމަކީ އެމެރިކާގެ އަސްކަރީ އޮޕަރޭޝަންތަކަށް ލިބުނު ފޫނުބެއްދޭވަރުގެ ބޮޑު ގެއްލުމެކެވެ. އަސްކަރީ މާހިރުން ބުނާ ގޮތުގައި މިއީ ހަމައެކަނި މާލީ ގެއްލުމެއް ނޫނެވެ. މިއީ އެމެރިކާގެ ޖާސޫސީ އަދި ހަމަލާދިނުމުގެ ގާބިލުކަން ކުޑަވެގެންދިޔަ ކަމެކެވެ. ފެބްރުއަރީ މަހުގެ ފަހުކޮޅުން ފެށިގެން އީރާނުގެ އެއަރ ޑިފެންސް ނިޒާމުން ވަނީ މިފަދަ ގިނަ އަދަދެއްގެ ޑްރޯންތައް ވައްޓާލައި، އީރާނުގެ ވައިގެ ސަރަހައްދަކީ އެމެރިކާގެ ޑްރޯންތަކުގެ "ކަށްވަޅު" ކަމަށް ހަދާފަ އެވެ.

ލިބިފައިވާ މައުލޫމާތަށް ބަލާއިރު، މި ހަމަލާތަކުގެ ތެރޭގައި އެމެރިކާގެ އެމްކިއު-9 ރީޕަރ ފްލީޓުގެ ގާތްގަނޑަކަށް 25 އިންސައްތަ ނުވަތަ މަދުވެގެން 50 ޑްރޯން ވަނީ ގެއްލިފަ އެވެ.

މިހާ ގިނަ އަދަދެއްގެ ޒަމާނީ ޑްރޯންތައް ގެއްލުމަކީ އީރާނުގެ އެއަރ ޑިފެންސް ނިޒާމުގެ ވަރުގަދަކަން ހާމަކޮށްދޭ ކަމެކެވެ. މީގެ ސަބަބުން އެ ސަރަހައްދުގައި އެމެރިކާ ސިފައިން އޮޕަރޭޝަންތައް ރާވާ އުސޫލުތަކަށް ވަނީ ބޮޑެތި ބަދަލުތަކެއް ގެންނަން ޖެހިފަ އެވެ.

އީރާނުގެ ކޮންމެ ކާމިޔާބު ހަމަލާއަކާއެކު، އެމެރިކާގެ އަތުގައި ހުރި އުޅަނދުތައް މަދުވުމުގެ އިތުރުން، ނުރައްކާތެރި ވައިގެ ސަރަހައްދުތަކުގައި ޑްރޯން އޮޕަރޭޝަންތައް ކުރިއަށް ގެންދިއުމާ މެދު އަލުން ވިސްނުމަށް އެމެރިކާގެ ކޮމާންޑަރުންނަށް ވަނީ މަޖުބޫރުވެފައެވެ.

ފާހަގަކޮށްލަންޖެހޭ މުހިންމު ކަމަކީ، ރީޕަރ ޑްރޯނަކީ އެއަރ-ޑިފެންސް މިސައިލްތަކުން ނުވަތަ ފައިޓަރ ޖެޓުތަކުން ދިފާއުވުމުގެ އަމިއްލަ ގާބިލުކަން ހުންނަ އުޅަނދެއް ނޫނެވެ. މިއީ ދުޝްމަނުންގެ އެއަރ ޑިފެންސް ރޭންޖުން ބޭރުގައި ނުވަތަ އެފަދަ ނިޒާމުތައް ނައްތާލާފައިވާ ސަރަހައްދުތަކުގައި ބޭނުންކުރުމަށް ފަރުމާކޮށްފައިވާ އުޅަނދެކެވެ.

ޖުލައި 31 ގައި މި ޑްރޯން ވައްޓާލި ހާދިސާ މާ ބޮޑަށް ފާހަގަވެގެންދިޔައީ، އީރާނުގެ ދެކުނުގައި ހުރި މުހިންމު އަސްކަރީ މަރުކަޒުތަކަށް ހަމަލާދީފައިވާ ކަމަށް އެމެރިކާގެ އަސްކަރިއްޔާއިން ދައުވާކުރިތާ އެންމެ ދުވަހެއް ފަހުން މިކަން ހިނގުމުންނެވެ.

ސެންޓްކޮމް އިން ބުނި ގޮތުގައި ޖުލައި 30 އާއި 31 އާ ދެމެދު، އެމެރިކާ ސިފައިން ވަނީ އީރާނުގެ އަމާޒުތަކަށް ދެ ގަޑިއިރަށް ދެމިގެންދިޔަ ވަރުގަދަ ހަމަލާތަކެއް ދީފަ އެވެ. މީގެ ތެރޭގައި އަސްކަރީ ކޮމާންޑް ސެންޓަރުތަކާއި، މިސައިލް އަދި ޑްރޯން މަރުކަޒުތަކާއި، އައްސޭރިފަށުގެ ފާރަވެރިވާ ސަރަހައްދުތަކާއި، ކަނޑުގެ އިންފްރާސްޓްރަކްޗަރ ހިމެނެ އެވެ.

ހުޅަނގުގެ މީޑިއާތަކުން މި ޚަބަރު ފެތުރީ އީރާނުގެ އަސްކަރީ ގާބިލުކަން ވަރަށް ބޮޑަށް ދަށްވެ، އެމެރިކާއާ ދެކޮޅަށް އިތުރު ހަމަލާތަކެއް ދިނުމުގެ ބާރު އީރާނުގެ ކިބައިގައި ނެތް ކަމަށް ދޭހަވާ ގޮތަށެވެ.

ނަމަވެސް، އެ ހަމަލާތަކަށް ފަހު މަދު ގަޑިއިރުތަކެއްގެ ތެރޭގައި އެމްކިއު-9 ރީޕަރެއް ވައްޓާލުމާއި، އަދި މިހާތަނަށް މީޑިއާތަކަށް ހާމަނުކޮށް އޮތް އެފް-35 ގެ ހާދިސާ ހިނގުމުން، އީރާނުގެ އަސްކަރީ ބާރު ކުޑަނުވާކަން ވަނީ ސާބިތުވެފަ އެވެ.

އައި.އާރު.ޖީ.ސީ އިން އެމްކިއު-9 އަށް އަމާޒުކުރުން އެފް-35 އަށް އަމާޒު ހިފުން: ޓެކްނޮލޮޖީގެ އާ އިންގިލާބެއް

އެމްކިއު-9 ރީޕަރ ވައްޓާލުމަށްފަހު، އެމެރިކާގެ އެފް-35 ބޯޓަކަށް އީރާނުން އަމާޒު ހިފި (ވެޕަންސް ކޮލިޓީ ލޮކް) ހާދިސާއަކީ، އަސްކަރީ މާހިރުން ބުނާ ގޮތުގައި ޑްރޯން ވައްޓާލުމަށްވުރެވެސް މާ މުހިންމު ކަމެކެވެ.

އެފް-35 ލައިޓްނިންގ II އަކީ އެމެރިކާގެ އަތުގައި އޮތް އެންމެ ޒަމާނީ ހަނގުރާމަމަތީ ބޯޓެވެ. މިއީ ރާޑަރުތަކަށް ނުފެންނަ ގޮތަށް (ސްޓެލްތު)، ސެންސަރުތައް ގުޅާލުމާއި އިލެކްޓްރޯނިކް ހަނގުރާމައިގެ ގާބިލުކަން ބޭނުންކޮށްގެން، ވަރުގަދަ އެއަރ ޑިފެންސް ނެޓްވޯކްތައް ފޫއަޅުވާލުމަށް ޚާއްޞަކޮށް ފަރުމާކޮށްފައިވާ ބޯޓެކެވެ.

މި ބޯޓަކީ އާންމު ރާޑަރުތަކަށް އަތުނުވާނެހެން ފަރުމާކޮށްފައިވާ ބޯޓަކަށްވާއިރު، މިފަދަ ބޯޓަކަށް ސީދާ އަމާޒު ހިފުމަކީ ޓެކްނޮލޮޖީގެ ގޮތުން އީރާނުން ހޯދި ވަރަށް ބޮޑު ކުރިއެރުމެކެވެ.

މީގެ ކުރިން 2026 ވަނަ އަހަރުގެ މާރިޗު މަހުވެސް އީރާނުގެ އެއަރ ޑިފެންސް ނިޒާމުން ވަނީ އެމެރިކާގެ އެފް-35 ބޯޓަކަށް އަމާޒުކޮށްފަ އެވެ. އެ ބޯޓަށް ފަހުން ވީގޮތެއް ނޭނގުނު ނަމަވެސް، އެ ހާދިސާއިން ސާބިތުވީ އެފް-35 ގެ ސްޓެލްތު ގާބިލުކަމަކީ އީރާނުގެ އުޑުމަތީގައި އެ ބޯޓުގެ ސަލާމަތްތެރިކަން ކަށަވަރުކޮށްދޭ ކަމެއް ނޫން ކަމެވެ.

ބޯޓެއް ހުރިކަން ދެނެގަތުމާއި (ޑިޓެކްޝަން)، އެ ބޯޓު ދާ ދިމާ ބެލުމާއި (ޓްރެކިންގ)، އަދި ސީދާ ހަމަލާދެވޭ ފަދަ ގޮތަކަށް އަމާޒު ހިފުމަކީ (ވެޕަންސް ކޮލިޓީ ލޮކް) ތަފާތު ތިން ކަމެކެވެ. ރާޑަރަކަށް ނުވަތަ އިންފްރާރެޑް ސެންސަރަކަށް އެއީ ކޯއްޗެއްކަން ސީދާ ނޭނގި އެއްޗެއް އުޅޭކަން ދެނެގަނެވިދާނެ އެވެ. ނަމަވެސް "ވެޕަންސް ކޮލިޓީ ލޮކް" އެއް ހޯދުމަކީ މިސައިލެއް އެ ބޯޓަކަށް ސީދާ އަމާޒުކޮށް ފޮނުވާލެވޭ ފަދަ ސައްހަ މައުލޫމާތު ހޯދުމެވެ.

މިފަދަ އަމާޒެއް ހިފުމުން، ބޯޓުގައި ހުންނަ ޒަމާނީ އިންޒާރުދޭ ނިޒާމުތަކުން ހަމަލާއެއް އަންނަން އުޅޭކަން އަންގައިދެ އެވެ. މީގެ ސަބަބުން ޕައިލެޓަށް ޖެހެނީ ބޯޓުގެ މިސްރާބު ބަދަލުކުރަން ނުވަތަ މިޝަން ހުއްޓާލާފައި އެ ސަރަހައްދުން ފޭބުމަށެވެ.

އީރާނުން މި އަމާޒު ހިފި ގޮތަކީ ވަރަށް ބޮޑަށް ފާހަގަކޮށްލަންޖެހޭ ކަމެކެވެ. އެފް-35 އަކީ ރާޑަރަށް ނުފެންނަ ގޮތަށް ހެދިފައިވީ ނަމަވެސް، އިންފްރާރެޑް ސެންސަރުތައް މަސައްކަތްކުރަނީ ތަފާތު އުސޫލަކުންނެވެ. ކޮންމެ ބޯޓެއްގެ އިންޖީނާއި، ދޫކުރާ ދުމާއި، އަދި ވައިގެ ތެރޭގައި ދަތުރުކުރާއިރު އުފެދޭ ހޫނުން ތާމަލް ރޭޑިއޭޝަން އުފެދެ އެވެ.

އީރާނުގެ އެއަރ ޑިފެންސް ނިޒާމުން ވަނީ، ޚާއްޞަކޮށް 40 ދުވަހުގެ ހަނގުރާމައަށްފަހު، "ޕެސިވް އިންފްރާރެޑް ސެންސަރު" ބޭނުންކޮށްގެން ބޯޓުތައް ދެނެގަތުމުގެ ގާބިލުކަން ދައްކާފަ އެވެ. މީގެ ސަބަބުން ބޯޓަށް އެއްވެސް ސިގްނަލެއް ނުފޮނުވި ނަމަވެސް ބޯޓު އޮތްތަން ދެނެގަނެވެ އެވެ. އާންމު ރާޑަރުތަކުން ސިގްނަލް ފޮނުވާތީ އެއީ ކޮންތާކު އޮތް އެއްޗެއްކަން ބޯޓަށް އެނގުނަސް، މިފަދަ ޕެސިވް ސެންސަރުތައް ހުންނަ ތަނެއް ބޯޓަކަށް ނޭނގޭނެ އެވެ.

ގުޅިފައިވާ އެއަރ ޑިފެންސް ނިޒާމު

އީރާނުގެ މި އަސްކަރީ ކުރިއެރުމަކީ ހަމައެކަނި އެންމެ ރާޑަރަކުން ހޯދި ކާމިޔާބީއެއް ނޫނެވެ. މިއީ ގިނަ ސެންސަރުތަކާއި، ކޮމާންޑް ނިޒާމުތަކާއި، އަދި ހަތިޔާރުގެ ވަސީލަތްތައް އެކުލެވޭ "އިންޓަގްރޭޓެޑް އެއަރ ޑިފެންސް" ނިޒާމެއްގެ ނަތީޖާ އެވެ.

އީރާނުގެ ދުރު ރާސްތާގެ މޯބައިލް އެއަރ ޑިފެންސް ސިސްޓަމް، ބާވަރ 373 | ގެޓީ އިމޭޖަސް

މިފަދަ ނިޒާމެއްގައި އެކި ސެންސަރުތަކުން ލިބޭ މައުލޫމާތު އެއްކޮށްލެވެ އެވެ. އެއް ނިޒާމަކުން ބޯޓު އުޅޭ ސަރަހައްދު ބުނެދޭއިރު، އަނެއް ނިޒާމަކުން ބޯޓު އޮތް ސީދާ ތަން ކަށަވަރުކޮށްދެ އެވެ. އަދި އިންފްރާރެޑް ސެންސަރުތަކުން އެއީ ކޮން ކަހަލަ ބޯޓެއްކަން ދެނެގަނެ އެވެ. މިގޮތަށް ހުރިހާ މައުލޫމާތެއް އެއްކޮށްލުމުން، ރާޑަރަށް ނުފެންނަ ބޯޓުތަކަށްވެސް ފަސޭހައިން އަމާޒު ހިފެ އެވެ.

އެފް-35 ގެ އެންމެ ބޮޑު ބާރަކީ އެކި ވަސީލަތްތަކުން މައުލޫމާތު އެއްކޮށްގެން ޕައިލެޓަށް ނުރައްކާތައް ދައްކައިދިނުމެވެ. ނަމަވެސް އީރާނުން މިހާރު ވަނީ އެއާ ދެކޮޅަށް، ރާޑަރަށް ނުފެނުނަސް އެހެން ގޮތްގޮތުން ބޯޓު ދެނެގަނެވޭނެ ވަރުގަދަ ނެޓްވޯކެއް ގާއިމުކޮށްފަ އެވެ.

އެފް-35 އަށް އަމާޒު ހިފުމުން ކުރާ ނަފްސާނީ އަދި އޮޕަރޭޝަނަލް އަސަރު ވަރަށް ބޮޑެވެ. އެފް-35 އަކީ އެމެރިކާގެ ވައިގެ ބާރުގެ ރަމްޒެއް ކަމަށް ބެލެވޭއިރު، އެފަދަ ބޯޓަކަށް ހަމަލާދީ ފަހާލުމަކީ އީރާނުގެ އެއަރ ޑިފެންސް ނިޒާމަށް އެމެރިކާގެ އެންމެ ޒަމާނީ ބޯޓުތަކާވެސް ކުރިމަތިލެވޭނެކަން ސާބިތުކޮށްދޭ ކަމެކެވެ. މީގެ ސަބަބުން އެމެރިކާގެ ބޯޓުތަކަށް އީރާނާ ދުރުން އުދުހުމަށާއި، އިތުރު ހިމާޔަތް ހޯދުމަށް ވަނީ މަޖުބޫރުވެފަ އެވެ. އެފް-35 ވައްޓާނުލެވުނަސް، އެ ބޯޓުގެ މިޝަން ހުއްޓުވައި ފަހާލުމަކީ އެ ބޯޓަކީ "އަތުނުވާނެ" އެއްޗެއް ކަމަށް ދެކެވޭ ވާހަކަ ދޮގުކުރި ކަމެކެވެ.

އޮޕަރޭޝަނަލް ކޮންޓެކްސްޓް

ޖުލައި 31 ގެ ހާދިސާތައް ހިނގީ އީރާނުގެ ދެކުނަށް އެމެރިކާއިން ދިން ހަމަލާތަކުގެ ބަދަލުހިފުމުގެ ތެރޭގަ އެވެ. އެމެރިކާއިން ވަނީ ހުރްމުޒްގާން ޕްރޮވިންސްގެ ގޭޝްމް އައިލެންޑްގައި ހުރި އާންމުން ދިރިއުޅޭ ގެއަކަށް ހަމަލާދީ، ކުޑަކުއްޖަކާއެކު ތިން މީހުން މަރާލާފަ އެވެ.

އީރާނުގެ އަސްކަރިއްޔާއިން މީގެ ބަދަލުހިފީ އުރުދުން، ކުވެއިތު އަދި ޔޫއޭއީގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތައް ދީގެންނެވެ. އެމްކިއު-9 އަދި އެފް-35 އާ ދެކޮޅަށް ހޯދި ކާމިޔާބީއަކީ މި ކެމްޕޭނުގެ ބައެކެވެ.

މި ހާދިސާތައް ހިނގި ސަރަހައްދަކީ ސްޓްރެޓީޖިކް ގޮތުން މުހިންމު ހުރްމުޒް ކަނޑުއޮޅިއާއި އޮމާން ކަނޑުގެ ސަރަހައްދެވެ. އެމްކިއު-9 ރީޕަރ ވައްޓާލީ ހުރްމުޒް ކަނޑުއޮޅި މަތިންނެވެ. މިއީ އެމެރިކާގެ ޑްރޯންތައް ފާރަވެރިވުމަށް އެންމެ ގިނައިން ބޭނުންކުރާ، އަދި އީރާނުގެ އެއަރ ޑިފެންސް އެންމެ ވަރުގަދަ ސަރަހައްދެވެ.

އެމެރިކާގެ އަސްކަރިއްޔާއިން އީރާނުގެ ދެކުނަށް ހަމަލާދިނުމަށްފަހު، އެމްކިއު-9 ވައްޓާލި ވާހަކައާއި އެފް-35 އަށް އަމާޒު ހިފި ވާހަކަ އޮތީ ސިއްރުކޮށްފަ އެވެ.

ހަމަ އެ ދުވަސްވަރު، ކުވެއިތުގައި ހުންނަ އެމެރިކާގެ އަސްކަރީ މަރުކަޒަކަށް އީރާނުން ދިން ހަމަލާއެއްގައި އެމެރިކާގެ ގިނަ ސިފައިންތަކެއް ޒަޚަމްވެ، ހަފްތާއަކަށްވުރެ ގިނަ ދުވަސްވީއިރުވެސް އެމީހުންނަށް އެކަށީގެންވާ ފަރުވާ ނުދެވޭ މައްސަލައިގައި ޓްރަމްޕް ސަރުކާރަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ.

އެއަރ ޑިފެންސް ކުރިމަތިލުންތަކުގެ މުސްތަގުބަލު

ޖުލައި 31 ގެ ރޭ އީރާނުން ހޯދި ކާމިޔާބީތަކަކީ އެއަރ ޑިފެންސްގެ ދާއިރާއިން ހޯދި މުހިންމު ކުރިއެރުމެކެވެ. އަސްކަރީ މާހިރުން ބުނާ ގޮތުގައި، އީރާނުގެ މިސައިލްތަކާއި އެއަރ ޑިފެންސް ނިޒާމުތަކުން ވަނީ އެމެރިކާގެ އަސްކަރީ ބާރަކީ "ބަލިނުކުރެވޭނެ" ބާރެއް ކަމަށް ދެކެވޭ ވާހަކަ މުޅިން ފުނޑުފުނޑުކޮށްލާފަ އެވެ.

މި ކުރިމަތިލުމުގެ އިގްތިސާދީ ފަރަގުވެސް ބޮޑެވެ. އެފް-35 ގެ އަގުބޮޑުކަމަށްވުރެ މުހިންމީ އެ ބޯޓަށް ހަވާލުކުރާ މިޝަންތައް ފުރިހަމަކުރުމުގެ ގާބިލުކަމެވެ. އީރާނުން އެ ބޯޓުތައް ވައްޓާނުލައިވެސް، އެ ބޯޓުތަކުގެ މިޝަންތައް ހުއްޓުވާނަމަ، އެއީ އީރާނަށް ލިބޭ ބޮޑު ކާމިޔާބީއެކެވެ.

އެމެރިކާގެ އަގުބޮޑު ބޯޓުތަކާއި ހަތިޔާރުތައް، އީރާނުގެ އަގުހެޔޮ އެއަރ ޑިފެންސް ނިޒާމުތަކުން ބޭކާރުކޮށްލުމަކީ އެމެރިކާގެ އަސްކަރީ ރޭވުންތެރިންނަށް އޮތް ބޮޑު ގޮންޖެހުމެކެވެ.

ޖުލައި 31 ގެ ހާދިސާއިން ސާބިތުވަނީ، ދުނިޔޭގެ އެންމެ ޒަމާނީ ހަނގުރާމަމަތީ ބޯޓުތަކަށްވެސް އީރާނުގެ ވައިގެ ސަރަހައްދުގައި ހުރަސްތަކެއް ކުރިމަތިކުރުވޭނެ ފަދަ "ކައުންޓަރ-ސްޓެލްތު" ގާބިލުކަން އީރާނުން އުފައްދާފައިވާ ކަމެވެ. މިއީ ސަރަހައްދީ އަސްކަރީ ބާރުގެ ތިލަފަތަށް އައި ބޮޑު ބަދަލެއްގެ އިތުރުން، އީރާނުގެ އަމިއްލަ އުފެއްދުންތެރިކަމުގެ ހެއްކެކެވެ.