އޮޒިލްގެ ކުޅުން ނުފެންނަތާ ހަފްތާއެއް ވެއްޖެ: ވެންގާ

އާސެނަލް އަށް ކުޅެމުން އަންނަ ޖަރުމަންގެ މިޑްފިލްޑަރު މެސުޓް އޮޒިލްގެ ކުޅުން ނުފެންނަތާ ހަފްތާއެއް ވެއްޖެ ކަމަށް އެޓީމުގެ ކޯޗުގެ އާސެން ވެންގާ ބުނެފި އެވެ.

ބޯންމައުތް އަތުން 3-3 ގެ ނަތީޖާއިން އާސެނަލް އެއްވަރުވި މެޗަށް ފަހު ނޫސްވެރިންނަށް މައުލޫމާތު ދެމުން ވެންގާ ބުނީ އޮޒިލް އުޅެނީ ބަލިވެ ކަމަށާއި، އޭނާގެ ކުޅުން ނުފެންނަތާ ހަފްތާއެއް ވެއްޖެ ކަމަށެވެ.

ވެންގާ ބުނީ އޮޒިލްގެ ބަލި އަދިވެސް ރަނގަޅު ނުވާ ކަމަށެވެ. އެގޮތުން އެފްއޭކަޕްގައި ޕްރިސްޓަން ނޯތު އެންޑާ ދެކޮޅަށް އާސެނަލް ދެން ކުޅޭ މެޗުގައި ވެސް އޮޒިލް ފެނުމުގެ ފުރުސަތު ކުޑަކަމަށް ވެސް އޭނާ ވަނީ ބުނެފައެވެ.

އެހެން ނަމަވެސް ޕްރިމިއާ ލީގުގައި ސްވަންސީ ސިޓީއާ ދެކޮޅަށް މި މަހުގެ 14 ވަނަ ދުވަހު އާސެނަލް ކުޅޭ މެޗަށް އޮޒިލް ފިޓްވާނެ ކަމަށް ވަނީ ބެލެވިފައެވެ.

މި ސީޒަނުގައި އާސެނަލްގައި މޮޅު ކުޅުމެއް ދައްކަމުން އަންނަ އޮޒިލް ވަނީ އެ ކްލަބަށް ކުޅުނު 23 މެޗުގައި ނުވަ ލަނޑު ކާމިޔާބުކޮށްދީފައެވެ. އެގޮތުން އޭނާ ޓީމުގައި ނެތުމަކީ އާސެނަލްގެ މެދުތެރެއަށް އުނިކަމެއް އަންނާނެކަމެކެވެ.