ޗައިނާ ލީގުން ހުށަހެޅި 100 މިލިއަން ޕައުންޑުގެ ހުށަހެޅުން ރިޖެކްޓްކުރިން: އޮޒިލް

ޗައިނީޒް ސުޕަލީގުން ހުށަހެޅި 100 މިލިއަން ޕައުންޑުގެ ހުށަހެޅުން ރިޖެކްޓްކުރި ކަމަށް އާސެނަލް އަށް ކުޅެމުން އަންނަ ޖަރުމަންގެ މިޑްފިލްޑަރު މެސުތް އޮޒިލް ބުނެފި އެވެ.

އޮޒިލް ބުނީ މިދިޔަ ސަމާގައި އޭނާ އަށް ޗައިނާގެ ކްލަބަކުން ހުށަހެޅި ކަމަށާއި، ކިތަންމެ ބޮޑުއަދަދެއް ހުށަހެޅި ނަމަވެސް އެ ހުށަހެޅުމަކީ މާ ގަޔާވާ ހުށަހެޅުމެއް ނޫން ކަމަށެވެ.

ފަސް އަހަރު ދުވަހުގެ އެއްބަސްވުމެއްގެ ދަށުން އަހަރަކު 20 މިލިއަން ޕައުންޑު ލިބޭ ގޮތަށް ހުށަހެޅި އެ ހުށަހެޅުމަކީ ލިމިޓަށްވުރެ މައްޗަށް ގޮސްފައިވާ ހުށަހެޅުމެއް ކަމަށްވެސް އޮޒިލް ވަނީ ބުނެފައެވެ.

އެގޮތުން އޮޒިލް ބުނީ އެ ހުށަހެޅުން ލިބުނުތާ ތިން މިނެޓު ތެރޭގައި ރިޖެކްޓުކުރި ކަމަށާއި، އެޖެންޓަށްވެސް އެކަން ވަގުތުން އަންގާފައިވާނެ ކަމަށެވެ. މީގެއިތުރުން އޭނާ ބުނީ ޗައިނާ ލީގުން ކިތަންމެ ބޮޑު އަދަދެއް ހުށަހެޅިނަމަވެސް ކުޅެން އެއްބަސްނުވާނެ ކަމަށެވެ.

އޮޒިލް ބުނީ އޭނާގެ ކެރިޔަރު ނިންމާލަން އަދި ކައިރިވެސް ނުވާ ކަމަށާއި، އާސެނަލްއާއެކު ކާމިޔާބީތަކެއް ހޯދަން ބޭނުންވާ ކަމަށެވެ.

ޑެއިލީ މެއިލް އަށް ދާދި ފަހުން ދިން އިންޓަވިއުއެއްގައި އޮޒިލް ބުނީ އާސެނަލް އިތުރަށް ވަރުގަދަ ކުރަންޖެހޭ ކަމަށާ، އެގޮތުން ޓްރާންސްފާ ބާޒާރުގައި ޓީމަށް ރަނގަޅު ކުޅުންތެރިންތަކެއް ގެންނަންޖެހޭ ކަމަށެވެ.

އޮޒިލް ބުނީ އާސެނަލްގެ ސްކޮޑަށް ބަލާއިރު، ރެއާލް މެޑްރިޑް އަދި ބަޔާން މިއުނިކް ސްކޮޑްހާ ވަރުގަދައެއް ނޫން ކަމަށާ، ބޮޑެތި ޓީމުތަކާ ދެކޮޅަށް އާސެނަލްގައި މިހާރު އޮތް ސްކޮޑާއެކު ނިކުންނަން އުނދަގޫވާނެ ކަމަށެވެ.

ޝާލްކޭ އިން 2006 ވަނަ އަހަރު ކެރިޔަރު ފެށި އޮޒިލް ވިދާލީ 2010 ވަނަ އަހަރު ރެއާލް އަށް ބަދަލުވި ހިސާބުންނެވެ. އެގޮތުން އޭނާ ވަނީ އެ ކްލަބަށް ކުޅުނު ހަތަރު ސީޒަނުގައި 159 މެޗު ކުޅެ، 27 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ސްޕެނިޝް ލަލީގާ، ކޮޕާޑެލްރޭ އަދި ސްޕެނިޝް ސުޕާކަޕްވެސް ކާމިޔާބުކޮށްފައެވެ.

ރެއާލް ދޫކޮށްލުމަށްފަހު އޮޒިލް އާސެނަލް އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެ ކްލަބަށް ކުޅުނު ހަތަރު ސީޒަނުގައި 149 މެޗު ކުޅެ، 30 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ އެ ކްލަބާއެކު އެފްއޭކަޕް ދެފަހަރު އަދި އެފްއޭ ކޮމިއުނިޓީ ޝިލްޑް ކާމިޔާބުކޮށްފައެވެ