9/11 ގެ ހާދިސާ: ބުޝް އަނބުރާ ވޮޝިންޓަން އަށް ގެނައުމަށް ދެކޮޅު ހެދުމާއި، އެއަރފޯސް ވަންގެ ސިއްރު ކޯޑު ޓެރަރިސްޓުން ހޯދި ވާހަކަ!

މީގެ 25 އަހަރު ކުރިން، 2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހަކީ އެމެރިކާ އަށް ބިރުވެރި، އަދި ނާމާން ދުވަހެކެވެ. އެމެރިކާގައި ހުންނަ ވޯލްޑް ޓްރޭޑް ސެންޓަރަށް މަތިންދާ ބޯޓުތަކެއް އަަރައި، ޓެރަރިސްޓު ހަމަލާތަކެއް ދިނީ އެއްވެސް ބަޔަކު ހީނުކުރާ ގޮތަަކަށެވެ. 

މި ހާދިސާއާ ގުޅިގެން ޖެފްރީ ރޮބިންސަންގެ "އޭޝް އެންޑް އޮނަރ" ނަމަކަށް ކިޔާ ފޮތުގައި އެ ދުވަހުގެ 368 މިނެޓުގެ ތެރޭގައި ހިނގި ހާދިސާތަކުގެ ތަފްސީލު ލިޔެފައިވެއެވެ.

މި ފޮތުގައި ހާމަކުރާ އެންމެ ސިއްރު ވާހަކަ އަކީ އެމެރިކާގެ އޭރުގެ ރައީސް ޖޯޖް ޑަބްލިއު ބުޝް ދަތުރު ކުރައްވަމުން ގެންދެވި އެއަރފޯސް ވަން އަށް ވެސް ހަމަލާ ދޭން ނިންމާފައިވާކަމުގެ އިންޒާރު ލިބުނު ވާހަކަ އެވެ. ހަމަލާތައް ހިނގި ދުވަހު ހެނދުނު 10:22 ގައި ރިޔާސީ ގަނޑުވަރު ވައިޓް ހައުސްގެ ފަސް ފަންގިފިލާގެ ދަށުގައި ހުންނަ ކޮންކްރީޓް ބަންކަރަށް ފޯނު ކޯލެއް ލިބުނެވެ. ސިކިއުރިޓީ އެޖެންޓަކު ބުނީ އިތުބާރު ހުރި މަސްދަރަކުން އިންޒާރެއް ލިބިފައިވާ ކަމަށެވެ.

9/11 ގެ ހަމަލާތަކާ ގުޅިގެން ރިޔާސީ ގަނޑުވަރު ވައިޓް ހައުސްގެ ބަންކަރގައި ތިއްބެވި ސީނިއާ އޮފިޝަލުން | ރޮއިޓާސް

އެ ފޯނު ކޯލުގަައި ލިބުނީ ނުރައްކާތެރި އިންޒާރެކެވެ. އެއީ "ދެން ހަމަލާ ދޭނީ އޭންޖަލް އަށް" މިހެންނެވެ. އޭންޖަލް އަކީ އެއަރފޯސް ވަންގެ ސިއްރު ކޯޑް ނަމެވެ. މި ސިއްރު ކޯޑު ނަން އެނގިފައިވުމުން ބިރުވެރިކަން އިތުރުވި އެވެ. މި މައުލޫމާތު އެނގިފައިވަނީ ރައީސްގެ ސަލާމަތީ ޓީމުގެ ތެރޭގައި ހުރި ބޭފުޅަކަށް، ނުވަތަ އެ ޓީމާ ގާތުގައި ހުންނަ ބޭފުޅަކަށް ކަމަށް ބެލެވުނެވެ. އެކަމުގެ ސަބަބުން ނުރައްކާތެރިކަމާއި ހާސްކަން އިތުރުވެގެން ދިޔަ އެވެ.  

ސަލާމަތީ އޮފިޝަލުން އަންދާޒާކުރީ އެ ހަމަލާ ދޭ ނަމަ، އެކަން ކުރާނީ އެއަރފޯސް ވަންގައި ތިބި މީހުންގެ ތެރެއިން މީހަކު ކަމަށެވެ. އެއްވެސް މީހަކަށް އިތުބާރު ކުރަން އުނދަގޫ އެ ވަގުތުގައި، ސަލާމަތީ އޮފިޝަލުން ނިންމީ އެއަރފޯސް ވަންގައި ތިބި އެންމެން އެއް ތަނެއްގައި ބަންދު ކުރުމަށެވެ. އެއަށްފަހު އެ މީހުންގެ ފޯނުތައް އަތުލައި ނުރައްކާތެރި އެއްވެސް އެއްޗެއް އޮތްތޯ ބަލައި ފާސްކުރި އެވެ. 

2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާ އަށް އަމާޒުވި ހަމަލާތަކާ ގުޅިގެން، އެއަރފޯސް ވަންގައި އިންނަވައި އޭރުގެ ރައީސް ބުޝް މުހިންމު ފޯނެއް ކުރައްވަނީ | ރޮއިޓާސް

އެމެރިކާގެ ރައީސް ބުޝް އިންނެވި އެއަރފޯސް ވަން ދަތުރު ކުރަމުން ދިޔައީ ފްލައިޓް އެސްކޯޓެއް ނެތި އެވެ. އެއަރފޯސް ވަންގެ ޕައިލެޓް ނިންމީ، ފުރާނަ ސަލާމަތް ކުރުމަށްޓަކައި އެއަރފޯސް ވަން ނުފެންނަ ގޮތަށް ދުއްވުމަށެވެ.

އެމެރިކާގެ ފްލޮރިޑާގައި ހުންނަ ވައިގެ ހަނގުރާމައިގެ ބޭސްއެއްގައި ހުރި ލެފްޓިނެންޓް ކާނަލް ސްޓީވް އުޝަރު އަށް ފެނުނީ، ބުޝް އިންނެވި އެއަރފޯސް ވަން އެއްވެސް ރައްކާތެރިކަމެއް ނެތި، އެކަނި އޮވެ ދަތުރު ކުރަމުން ދިޔަ މަންޒަރެވެ. އެއާ އެކު އޭނާ ވަނީ، އެފް-16 ގެ އުޅަނދެއް އެއަރފޯސް ވަން އެސްކޯޓު ކުރުމަށް ފޮނުވައިފަ އެވެ. 

ބުޝް ބޭނުންފުޅުވީ ވެރި ރަށް ވޮޝިންޓަނަށް އަށް އެނބުރި ވަޑައިގަތުމަށެވެ. ނަމަވެސް ސަލާމަތީ ނުވަތަ ބުޝްގެ ސެކިއުރިޓީ ބޭފުޅުން ނިންމީ، ބުޝް ވޮޝިންޓަން އަށް ނުގެންދިޔުމަށެވެ. އޭގެ ބަދަލުގައި އެ ބޭފުޅުން ބުޝް ގެންދެވީ ލުއިޒިއާނާގެ ބާކްސްޑޭލް ވައިގެ ހަނގުރާމަ ބޭސް އަށެވެ. އެއީ ނިއުކްލިއަރ ކޮމާންޑް ސެންޓަރެކެވެ. އެކަމުގެ ސަބަބުން ބުޝް ވަރަށް ބޮޑަށް ކޯފާވެ ވަޑައިގެންނެވި އެވެ. އެއީ ދުޝްމަނުންނާއި ޓެރަރިސްޓުންގެ ކުރިމަތިން ފިލައިގެން ދާން، ނުވަތަ ބިރުން ހުރިކަން ދައްކަން އޭނާ ބޭނުންފުޅު ނުވާތީ އެވެ. 

2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާ އަށް އަމާޒުވި ހަމަލާތަކާ ގުޅިގެން، އެއަރފޯސް ވަންގައި އިންނަވައި އޭރުގެ ރައީސް ބުޝް މުހިންމު ފޯނެއް ކުރައްވަނީ | ރޮއިޓާސް

ފޮތުގައި ބުނާ ގޮތުގައި އެ ދުވަހު 65 އަށް ވުރެ ގިނަ މީހުންނާ އިންޓަވިއު ކޮށްފައިވެ އެވެ. ޕައިލެޓުންނާއި ސިފައިންނާއި އާންމު ރައްޔިތުން އަދި ޖާސޫސުންގެ ވާހަކަތައް މި ފޮތުގައި ހިމެނެ އެވެ. އެ ދުވަހުގެ އޮޅުންބޮޅުންގަނޑާއި ހިތްވަރުގެ ވާހަކަތައް މި ފޮތުގައި ހާމަކޮށްފައިވެ އެވެ.

ހަމަލާތައް ހިނގުމުގެ ކުރިން ރިޗަޑް ކްލާކް ވަނީ ސެކިއުރިޓީ ކައުންސިލްގެ މެންބަރެއްގެ ގޮތުގައި ހުންނަވައި އިންޒާރުތައް ދެއްވާފަ އެވެ. އޭނާ ވިދާޅުވީ އުސާމާ ބިން ލާދިން އެމެރިކާ އަށް ހަމަލާދޭނެ ކަމަށެވެ. ނަމަވެސް ސްޓޭޓް ސެކްރެޓަރީ ކޮންޑޮލީޒާ ރައިސް އެ އިންޒާރުތައް ސީރިއަސްކޮށް ނަންގަވާފައި ނުވެ އެވެ.