ނޫސްފަތުރާ ވަސީލަތްތަކާއި އަދި އެނޫންވެސް ތަންތަނުން ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އާއި ދިމާލަށް ކިތަންމެ ވަރަކަށް ފާޑު ކިޔެއްކަމަކު އޭނާ ނުހުއްޓުވޭނެ ކަމަށާއި, އޭނާ އަކީ ޗެމްޕިއަނެއް ކަމަށް ޔުވެންޓަސްގެ ކުރީގެ ކުޅުންތެރިޔާ އަދި ޔުވެންޓަސްގެ ބޯޑް އޮފް ޑިރެކްޓަރުންގެ ވައިސް ޗެއަރމަން އަދި ކުރީގެ ކުޅުންތެރިޔާ ޕަވެލް ނެޑްވެޑް ބުނެފިއެވެ.
ނެޑްވެޑް ބުނީ ރޮނާލްޑޯ އަކީ ޗެމްޕިއަނެއް ކަމަށާއި އޭނާ ކުރާ ކޮންމެ ކަމެއް ކުރާނީ ވެސް ޗެލެންޖެއްގެ ގޮތުގައި ދެކިގެން ކަމަށެވެ. މީގެ އިތުރުން ނެޑްވެޑް ބުނީ ރޮނާލްޑޯ މިހާ ތަނައް ކުޅުނު ކޮންމެ ކްލަބެއްގައި ވެސް އޭނާ ކާމިޔާބު ހޯދީ ޗެލެންޖެއް ކަމުގައި ދެކިގެން ކަމަށާއި ޔުވެންޓަސްގައި ވެސް މި ސީޒަނުގައި އޭނާ އާއި މައްސަލަތަކެއް ދިމާވި ކަމަށާއި ނަމަވެސް އެކަން ކަމުން އަރައިގަނެ މިވަގުތު ރޮނާލްޑޯ އެހުރީ ރަނގަޅު ފޯމުގައި ކަމަށާއި، އޭނާ އަކީ ކްލަބުން ބޭނުން ޖެހޭ ކޮންމެ ވަގުތެއްގައި ވެސް ތަފާތު ދައްކާ މޮޅު ކުޅުންތެރިއެއް ކަމަށެވެ.
މި ސީޒަނުގައި ޔުވެންޓަސްގެ ކޯޗު ސާރީ އާއި ރޮނާލްޑޯ ދެމެދު މައްސަލަތަކެއް ޖެހިގެން އުޅޭ ކަމުގެ އަޑުތަކެއް މީޑިއާގައި ފެތުރިފައިވެއެވެ. އޭގެ ފަހުން ސާރީ ފަހަކަށް އައިސް އަންނަނީ ރޮނާލްޑޯ އާއި ގޮންޒާލޯ ހިގައިން އަދި ޑިބާލާ އެއްކޮށް ފުރަތަމަ އެގާރައިން ޖާގަ ދެމުންނެވެ. މި ބަދަލަށް ރޮނާލްޑޯ ވަނީ މަރުހަބާ ކިޔައިފައެވެ.
ޔުވެންޓަސް އަށް ރޮނާލްޑޯ ގެންދިޔުމުގެ މައިގަނޑު ޓާގެޓަކީ ޔުވެންޓަސް އަށް ޗެމްޕިއަންސް ލީގު ކާމިޔާބު ކޮށްދިނުމެވެ. ދާދި ފަހުން އިޓާލިއަން ލީގުގެ އެންމެ މޮޅު ކުޅުންތެރިޔާގެ އެވޯޑާއި ހަވާލު ވުމަށްފަހު ރޮނާލްޑޯ ބުނީ އޭނާ ޔުވެންޓަސް އާއި އެކު ޗެމްޕިއަންސް ލީގު ކާމިޔާބު ކޮށް އިޓަލީ ރައްޔިތުން އުފާ ކޮށްދޭނެ ކަމަށެވެ.
