ސުނިލް ޗެތްރީއަކީ މެސީއެއް ނޫން، މޮޅުވެވޭނީ އެންމެން އެކުގައި ކުރާ މަސައްކަތުން: ރޯކާ

ސުނިލް ޗެތްރީއަކީ ޓީމުގައި ހުރި އެންމެ މޮޅު އެއް ކުޅުންތެރިޔާ ކަމަށާ ނަމަވެސް އޭނާއަކީ މެސީ ނޫން ކަމަށް ބެންގަލޫރު އެފްސީގެ ކޯޗު އަލްބާޓް ރޯކާ ބުނެފި އެވެ.

ރޯކާ މިހެން ބުނެފައިވަނީ އޭއެފްސީ ކަޕްގެ ގުރޫޕު ސްޓޭޖުގައި މާޒިޔާ އާއި ދެކޮޅަށް ކުޅެން ހަމަޖެހިފައިވާ މެޗްގެ ޕްރީ މެޗް ޕްރެސްގައި ވާހަކަ ދައްކަމުންނެވެ. ކޯޗް ބުނެފައިވަނީ ސުނިލް އަކީ ޓީމުގައި ހުރި އެންމެ މުހިންމު އެށް ކުޅުންތެރިޔާ ކަމަށާ ނަމަވެސް އޭނާ އަކީ މެސީ ނޫން ކަމަށެވެ. އެހެން ކަމުން މެޗްގައި ޓީމް އޭނާގެ މައްޗަށް ބަރީސާ ނުވާނެ ކަމަށްވެސް ކޯޗު ވަނީ ބުނެފަ އެވެ.

މެޗާ ގުޅޭގޮތުން ވާހަކަ ދައްކަމުން ރޯކާ ބުނީ، އަންގާރަ ދުވަހުގެ މެޗު ފަސޭހަ ނުވާނެ ކަމަށާ، މާޒިޔާ މިހާރު އޮތީ ކުރިއައްވުރެ މާބޮޑަށްވެސް އިމްޕްރޫވް ވެފައި ކަމަށެވެ. މާޒިޔާގައި ރަނގަޅު ބޭރު ކުޅުންތެރިން އެބަ ތިބި ކަމަށާ، ޓީމުގައި ތިބި ލޯކަލް ކުޅުންތެރިންވެސް ކުރިޔާ އާޅާ ބަލާއިރު މިހާރު މާ ބޮޑައްވެސް ރަންގަޅު ވާނެ ކަމަށް ކޯޗު ވަނީ ބުނެފަ އެވެ. މީގެ އިތުރަށްވެސް ކޯޗު ބުނެފައިވަނީ މަޒިޔާ އެންމެ ފަހުން ގުރޫޕް ސްޓޭޖުގައި ހޯދާފައިވަނީ ރަނގަޅު ނަތީޖާއެށް ކަމަށާ އެހެންކަމުން އަންގާރަ ދުވަހުގެ މެޗު ފަސޭހަ ކޮށް ނުކާނެ ކަމަށެވެ.

މާޒިޔާ އާއި ދެކޮޅަށް ކުޅޭ މެޗްގެ ކުރިން އެންމެ ފަހުން ބެންގަކޫރު އެފްސީ ކުޅުނު މެޗުން އެޓީމް ވަނީ ބޮޑު ބައްޔެށް ވެފަ އެވެ. އިންޑިއަން އައި ލީގުގައި މޯހަން ބަގާން އާއި ދެކޮޅަށް ކުޅުނު މެޗުން 3-0 އިން އެޓީމް ބަލިވެފައި ވާއިރު، އެމެޗުގައި ޒުވާން ކުޅުންތެރިންނަށް ކޯޗް އިސްކަން ދީފައި ވާކަން ފާހަގަ ކޮއްލެވެ އެވެ. މިކަމާ ގުޅޭގޮތުން ސުވާލު ކުރުމުން ކޯޗް ބުނެފައިވަނީ، އެމެޗުގައި ސީނިއާ ކުޅުންތެރިން ބޭނުން ނުކުރީ މާޒިޔާ އާއި ދެކޮޅަށް ކުޅޭ މެޗް ވަރުގަދަ ވުމުން އެ ކުޅުންތެރިންނަށް ރެސްޓް ދިނުމުގެ ގޮތުން ކަމަށެވެ.

އަންގާރަ ދުވަހު ހަވީރު ގަލޮޅު ރަސްމީ ފުޓުބޯޅަ ދަނޑުގައި މާޒިޔާ އާއި ބެންގަލޫރު އެފްސީ ބައްދަލުކުރާއިރު، މުބާރާތުގެ ގުރޫޕް އީގައި މި ދެޓީމްގެ އިތުރުން ދެން ހިމެނެނީ އިންޑިއާގެ މޯހަން ބަގާން އައި ބަންގްލަދޭޝްގެ ޑާކާ އަބަހާނީ ލިމިޓެޑް އެވެ. ގުރޫޕުގެ ކުރޯގައި މާޒިޔާ އަދި ބެމްގަލޫރު އެފްސީވސް އޮތީ ޕޮއިންޓުގެ ގޮތުން އެއްވަރުކޮށެވެ. އެހެންކަމުން އަންގާރަ ދުވަހުގެ މެޗް ވެގެންދާނީ މިދެޓީމަށްވެސް ވަރަށް މުހިންމު މެޗަކަށެވެ.