އާސެނަލް ހޯދަމުން އަންނަ ދަށް ނަތީޖާތަކާއި ގުޅިގެން ފާޑުކިޔުން އަމާޒުވެފައިވާ އެކުލަބުގެ ކޯޗު އާސެން ވެންގާ ދައްކަމުން އަންނަ ބަހަނަތާކުގެ ލިސްޓަށް މިފަހަރު ސަޕޯޓަރުންނަށް ތައުރީފްކުރުން އިތުރުކޮށްލައިފިއެވެ.

މި ސީޒަނުގައި ހޯދަމުން އަންނަ ނަތީޖާތަކުގެ ސަބަބުން ގިނަ ސަޕޯޓަރުން ނެއްގެ ފާޑުކިޔުން އަމާޒްވެފައިވަ ވެންގާ ވަނީ އޭނާގެ ކެރިއަރާއި ބެހޭގޮތުން އެކި ކަހަލަ ވާހަކަ ދައްކާފައެވެ.

އެގޮތުން ވަރަށް އަވަހަށް ކެރިއަރާމެދު ގޮތެއް ނިންމާނެ ކަމަށް ބުނުމަށް، އެ ވިސްނުން ބަދަލުކޮށް އޭނާގެ އުމުރުގެ މީހުންގެ ރިޓަޔަމަންޓަކީ މަރުވުމުން ކަމަށްބުނެ، އާސެނަލްގައި އިތުރު ސީޒަނެއް މަޑުކުރުމަށް އޭނާ ވަނީ ނިންމާފައެވެ.

އާދިއްތަ ދުވަހުގެ ރޭ އިނގިރޭސި ޕްރިމިއާ ލީގުގައި އާސެނަލްގެ އަމިއްލަ ދަނޑުގައި 2-2 އިން މެންޗެސްޓާ ސިޓީއާ އެއްވަރުވި މެޗަށް ފަހު ވެންގާވަނީ އެޓީމުގެ ސަޕޯޓަރުންނަށް ތައުރީފް ކޮށްފަ އެވެ.

ވެންގާ ވަނީ އޭނާ ކުލަބުގެ ސަޕޯޓަރުންގެ ފަރާތުން ތާޢީދު އޮތްކަން ދެއްކުމަށް ވާހަކަ ދައްކާފައެވެ. އެގޮތުން އާސެނަލް ކޮންމެ ހާލަތެއްގައި އޮތް ނަމަވެސް ސަޕޯޓަރުންގެ ހިތުގައި އެކްލަބަށް ލޯބި އޮތްކަމުގައި  ވެންގާ ބުނެފައިވެއެވެ.

ލީގުގައި އެންމެ ފަހުން ކުޅުނު ހަ މެޗުން އާސެނަލަށް ހަ ޕޮއިންޓް ލިބިފައިވާއިރު، މެންސިޓީއާ ދެކޮޅަށް ކުޅުނު މެޗު ކުރިއަށް ދިޔައިރުވެސް ބައެއް ސަޕޯޓަރުން ވަނީ ވެންގާ ދެކޮޅަށް އަޑު އުފުލާފައެވެ. ނަމަވެސް ވެންގާއަށް ތާޢީދުކޮށް ބައެއް ސަޕޯޓަރުން ވަނީ ބެނާތައް ގެންގުޅެފައެވެ.

އާސެނަލްގެ ސަޕޯޓަރުން ކިތަންމެ ހިތްހަމަ ނުޖެހުނަސް މިހާރު ކުލަބާއިކު ހަދާފައިވަ ކޮންޓްރެކްޓް މި ސީޒަންގެ ނިޔަލަށްހަމަވާ ވެންގާއަށް އާސެނަލް އިން ވަނީ އިތުރު ދެއަހަރުގެ އާ ކޮންޓްރެކްޓެއް ހުށަހަޅާފައެވެ.

އާސެނަލްގެ ކުރީގެ ގޯލަކީޕަރު ބޮބް ވިލްސަން ބީބީސީ ރޭޑިއޯ 5 އަށް ދިން އިންޓަވިއުއެއްގައި ބުނެފައި ވަނީ އާސެނަލްގެ މުސްތަޤްބަލަށްޓަކައިވެސް ވެންގާ އެކުލަބައި ވަކިވާންޖެހޭ ކަމަށެވެ.

އާސެނަލް ހަ ވަނައިގައި އޮތީ 28 މެޗުން 52 ޕޮއިންޓާ އެކު އެވެ. ސިޓީ ހަތަރު ވަނައިގައި އޮތީ 29 މެޗުން 58 ޕޮއިންޓް ހޯދައިގެންނެވެ