އިންޓަމި މިލާނަށް ބަދަލުވާތޯ ރެއާލް މެޑްރިޑަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްތިއާނޯ ރޮނާލްޑޯ އަށް ބާރުއަޅަމުން އަންނަ ކަމަށް އިންޓަގެ މިޑްފިލްޑަރު ޖޯ މާރިއޯ ބުނެފި އެވެ.
އިންޓަ ޓީވީ އަށް ދިން އިންޓަވިއުއެއްގައި ރޮނާލްޑޯއާ އެކު ޕޯޗުގަލްގެ ގައުމީ ޓީމަށްވެސް ކުޅެމުން އަންނަ ޖޯ މާރިއޯ ބުނީ ޕޯޗުގަލް އަކީ ވަރަށް ގިނަ ހުނަރުވެރި ކުޅުންތެރިން ތިބި ޓީމެއް ކަމަށާއި، އެގޮތުން ރޮނާލްޑޯއަކީ އޭގެ ތެރެއިން ފާހަގަކޮށްެލެވޭ ފަދަ މުހިންމު ކުޅުންތެރިޔެއް ކަމަށެވެ.
އޭނާ ބުނީ ރޮނާލްޑޯ އަކީ ހަމައެކަނި އޭނާއާއެކު އެއްޓީމަކަށް ކުޅޭ ކުޅުންތެރިޔެއް ނޫން ކަމަށާއި، ގާތް ރައްޓެއްސެކޭވެސް ބުނެވިދާނެ ކަމަށެވެ. އެގޮތުން އޭނާ ރެއާލް ދޫކޮށްލުމަށްފަހު އިންޓައަށް ބަދަލުވާން އެކި ފަހަރުމަތިން ބާރުއަޅާފައިވާކަމަށްވެސް މާރިއޯ ވަނީ ބުނެފައެވެ. އެހެންނަމަވެސް މާރިއޯ ބުނީ އެއީ ފަސޭހަކަމެއް ނޫންކަމަށެވެ.
މާރިއޯ ބުނީ ނިމިގެންދިޔަ ޔޫރޯ ފުޓުބޯޅަ މުބާރާތަކީ ވަރަށްވެސް ހަނދާނުން ފޮހެލަން ދަތި އެހާމެ ބޮޑު ކާމިޔާބީއެއް ލިބުނު ފަހަރެއް ކަަމަށެވެ. އެގޮތުން އޭނާ ބުނީ އެއީ އޭނާ މިހާދުވަހު ދެކެމުން އައި ހުވަފެންތައް ކާމިޔާބުވި މުބާރާތެއްކަމަށެވެ.
ރޮނާލްޑޯވެސް ކުރިން ކުޅުނު ސްޕޯޓިން ސީޕީ އިން މިދިޔަ އަހަރުގެ އޮގަސްޓްމަހު އިންޓައަށް ބަދަލުވި މާރިއޯ އަންނަނީ އިންޓަ މިލާނުގައި މޮޅު ކުޅުމެއް ދައްކަމުންނެވެ. އޭނާ އަންނަނީ ޕޯޗުގަލް ގައުމީ ޓީމުގައިވެސް މުހިންމު ދައުރެއް އަދާކުރަމުންނެވެ.
