ބެންގަލޫރު އެފްސީއަކީ ވަރުގަދަ ޓީމެއް، އެހެނަސް ޖެހިލުމެއް ނުވޭ: ސެކުލޮސްކީ

އިންޑިއާގެ ބެންގަލޫރު އެފްސީއަކީ ވަރުގަދަ ޓީމެށް ކަމަށާ ނަމަވެސް ޓީމެއްގެ ގޮތުގައި މަސައްކަތް ކޮށްފިނަމަ މާޒިޔާއަށް ނަތީޖާ ނެރެވޭނެ ކަމަށް އެޓީމުގެ ކޯޗް މާޔަން ސެކުލޮސްކީ ބުނެފި އެވެ.

އޭއެފްސީ ކަޕު ގުރޫޕް ސުޓޭޖުގައި އަންގާރަ ދުވަހު ބެންގުލޫރު އެފްސީއާއި ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ސެކުލޮސްކީ ބުނީ ބެންގަލޫރު އެފްސީއަކީ މި ސަރަހައްދުގެ އެންމެ ވަރުގަދަ އެއް ޓީމު ކަމަށާއި، އެޓީމާ ދެކޮޅަށް ނިކުންނައިރު އެކަން ދަންނަން ޖެހޭނެ ކަމަށެވެ.

އޭނާ ބުނީ ކޮންމެ ޓީމެއްގައިވެސް ދަށް ކަންތައްތަކެއް ހުންނާނެ ކަމަށާއި، އެހެން ކަމުން މި މެޗަށް ނިކުންނާނީ އެކަމަށް ވެސް ސަމާލުވެގެން ކަމަށެވެ.

ސެކުލޮސްކީ ބުނީ މި މެޗުގައި ޕުރެޝަރު އޮތީ އޭއެފްސީ ކަޕުގެ ރަނަރަޕް ޓީމުކަމަށްވާ ބެންގަލޫރު އެފްސީއަށް ކަމަށެވެ.

ސެކުލޮސްކީ ބުނީ އޭނާ އަކީ އަބަދުވެސް މޮޅުވާނެކަން ގަބޫލުކުރާ ކޯޗެއް ކަމަށާއި، އެކަމަށް ކުޅުންތެރިންނަށް ފުރިހަމައަށް އިތުބާރުވެސް ކުރާނެ ކަމަށެވެ.

ކޯޗު ބުނީ މި މެޗުގައި މާޒިޔާއިން ކުޅެން ޖެހޭނީ ޓެކްޓިކަލީ ވަރަށް މޮޅު ކުޅުމެއް ކަމަށެވެ. އެގޮތުން ޓީމުގެ ޕޮޒިޝަން ހިފަހައްޓައި ޑިފެންސުން ޑިސިޕުލިން ކުޅުމެއް ދައްކަން ޖެހޭކަމަށް ސެކުލޮސްކީ ބުންޏެވެ.

މާޒިޔާއިން މި ސީޒަންގެ އޭއެފްސީ ކަޕަށް ފުރިހަމައަށް ތައްޔާރުވެފައިވާއިރު، އެޓީމު ކުޅުނު ފުރަތަމަ މެޗުގައި ރަށުން ބޭރުގައި ކުޅެ ޑާކާ އަބާނީ ބަލިކުރީ 2-0 ގެ ނަތީޖާ އަކުންނެވެ. އަދި ލީގުގައި މިހާތަނަށް ކުޅުނު ހުރިހާ މެޗަކުންވެސް މާޒިޔާ މޮޅުވެފައިވަނީ އެޓީމު ކޮޅަށް ގޯލެއް ނުވަދެ އެވެ