މިނިސްޓަރ މަހްލޫފް މ. އަތޮޅުގެ ފަސް ރަށަކަށް ވަޑައިގަންނަވައިފި

ޔޫތު މިނިސްޓަރ އަހުމަދު މަހްލޫފް މ. އަތޮޅުގެ ފަސް ރަށަކަށް ވަޑައިގަންނަވައިފިއެވެ.

ހުކުރު ދުވަހު ދުވަހުގެ ރޭ މިނިސްޓަރ މަހްލޫފް ފެއްޓެވި މި ދަތުރުގައި އެދުވަހުގެ ރޭ ވަނީ މ. ރަތްމަންދޫއަށް ވަޑައިގަންނަވާފައެވެ.

މި ދަތުރުގައި ރަތްމަންދޫ ފުޓްސަލް ދަނޑު އަޅާނެ ބިމެއް ހަމަޖެހުނުހާ އަވަހަށް އެ މަސައްކަތް ނިންމާނެ ކަމަށް މިނިސްޓަރ މަހްލޫފް ވަނީ ވިދާޅުވެފައެވެ.

ހޮނިހިރު ދުވަހު މިނިސްޓަރ މަހްލޫފް މ. ދިއްގަރާއި، މ. މަޑުއްވަރި އާއި މ. ވޭވަށް އަދި މ. މުލަކަށް ވަޑައިގެންފައެވެ.

އެގޮތުން މ. ދިއްގަރުގައި ފުޓުބޯޅަ ދަނޑު ތަރައްގީ ކުރުމަށް މަޝްވަރާ ކުރެވުނުއިރު، ފެންވަރު ރަނގަޅު ވޮލީ ކޯޓެއް އެޅުމަށް ވަނީ ނިންމާފައެވެ.

މ. މަޑުއްވަރީގައި ފުޓްސަލް ދަނޑު ނިންމުމަށް ހަމަޖައްސާފައިވާއިރު، ދެން އިއުލާންކުރާ ލިސްޓުގައި އައުޓްޑޯ ޖިމެއްވެސް ތަރައްގީކުރަން ވަނީ ނިންމާފައެވެ. އަދި އެ ރަށުގައި ޕާކެއްގެ އިތުރުން ކައުންސިލްގެ މަޝްވަރާއާއެކު ވޮލީ އައުޓްޑޯ ކޯޓެއް އެޅުމަށްވެސް ވަނީ ނިންމާފައެވެ.

މ. ވޭވަށުގައިވެސް ޕާކެއް އަޅައިދެއްވާނެ ކަމަށް މިނިސްޓަރ މަހްލޫފް ވިދާޅުވެފައިވާއިރު، ފުޓްސަލް ދަނޑުގެ މަސައްކަތް ވަރަށް އަވަހަށް ފެށިގެންދާނެ ކަމަށްވެސް ވަނީ ވިދާޅުވެފައެވެ. އަދި އެ ރަށުގައިވެސް އައުޓްޑޯ ޖިމެއް ތަރައްގީ ކުރަން ވަނީ ހަމަޖެހިފައި ކަމަށްވެސް މިނިސްޓަރ ވިދާޅުވިއެވެ.

މ. މުލަކުގައި ހުރި ބެޑްމިންޓަން ކޯޓު މަރާމާތުގެ މަސައްކަތް ކުރިޔަށް ގެންދާނެ ކަމަށާއި، ދެން އިއުލާންކުރާ ލިސްޓުގައި އައުޓްޑޯ ޖިމެއް އެ ރަށުގައި ތަރައްގީ ކުރުމަށް ވަނީ ނިންމާފައިވާ ކަމަށެވެ. އަދި ފުޓްބޯލް ޕިޗު ނިންމުމުގެ އިތުރުން ޔޫތު ސެންޓަރވެސް ތަރައްގީކުރަން ވަނީ ނިންމާފައެވެ.

މިނިސްޓަރ މަހްލޫފް މ. އަތޮޅަށް ކުރައްވާ ދަތުރުފުޅުގައި އާދީއްތަ ދުވަހު އެ އަތޮޅުގެ ބާކީ ތިން ރަށް ކަމަށްވާ ކޮޅުފުއްޓާއި، ނާލާފުށި އަދި މުއްޔަށް ވަޑައިގަންނަވަން ވަނީ ހަމަޖެހިފައެވެ.