ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކޮށްގެން ބާއްވާ މިނިވަން ޗެމްޕިއަންޝިޕްގައި ބައިވެރިވުމުގެ ފުރުސަތު އިތުރު ހަ ރަށަކަށް ދީފި އެވެ.

އެފްއޭއެމް އިން ބުނީ މުބާރާތުގައި ބައިވެރިވުމުގެ މުއްދަތު ހަމަވިއިރު، ކުރިން މުބާރާތުގައި ބައިވެރިވެފައިވަނީ 75 ރަށަކުން ކަމަށާއި، އެހެންވެސް މިހާރު އިތުރު ހަ ރަށަކަށް ފުރުސަތު ދީފައިވާނެ ކަމަށެވެ.

އެ އިދާރާއިން ބުނީ އިތުރު ހަ ރަށަކަށް ފުރުސަތު ދިނީ މުބާރާތުގައި ބައިވެރިވުމަށް ބައެއް ކައުންސިލްތަކުން ގަވަމެންޓް އީ ލެޓާ މެނޭޖްމަންޓް ސިސްޓަމް (ޖެމްސް) މެދުވެރިކޮށް ސިޓީ ފޮނުވަން މަސައްކަތް ކޮށްފައިވާ ކަމަށާއި، އެހެންނަމަވެސް އެފްއޭއެމްއަކީ ޖެމްސް ބޭނުންކުރާ އެސޯސިއޭޝަނަކަށް ނުވުމާ އެކު ސިޓީ ފޮނުވުމުގައި ދިމާވި މައްސަލައަށް ވާނީ ބަލާފަ ކަމަށެވެ.

އެގޮތުން އެފްއޭއެމްއިން ބުނީ ހަޓީމަކަށް މުބާރާތުގައި ބައިވެރިވުމުގެ ފުރުސަތު ދީފައިވަނީ، އެކަންކަން ހިނގާ ދިޔަގޮތް ބަލާ ޖޭމްސް އިން ސިޓީ ފޮނުވުމަށް މަސައްކަތްކޮށްފައިވާ ކަން އަންގައިދޭ ލިޔުންތައް ދިރާސާކޮށް ބެލުމަށް ފަހު ކަމަށެވެ.

މި ބަދަލާއެކު މިނިވަން ޗެމްޕިއަންޝިޕްގައި މިހާރު ވާދަކުރާ ޓީމުގެ އަދަދު 81 ރަށަށް އަރާނެއެވެ. މި އަހަރު މިނިވަން ޗެމްޕިއަންޝިޕް އެހެން އަހަރުތަކާ ހިލާފަށް އަވަހަށް ބާއްވާއިރު، މުބާރާތް ދިގުލައިގެންދާނެ ކަމަށް ބެލެވެއެވެ. މީގެއިތުރުން މިއަހަރު މިނިވަން ޗެމްޕިއަންޝިޕްގެ ގަދަ ހަތަރު ޓީމު ދިވެހި ޕްރިމިއާ ލީގުގައި ވާދަކުރާ ގޮތަށް އެފްއޭއެމްއިން ވަނީ ހަމަޖައްސާފައެވެ.