ތުޅާދޫ އާއި ނައިފަރުގައި އަޅާ ހައުސިންގ ޔުނިޓްތަކުގެ މަސައްކަތް ބަޔަކާ ހަވާލުކޮށްފި

ސަރުކާރުން ހިންގާ ބޯހިޔާވަހިކަމުގެ މަޝްރޫތަކުގެ ތެރެއިން ބ. ތުޅާދޫއާއި ޅ. ނައިފަރުގައި އަޅާ 100 ހައުސިންގ ޔުނިޓުގެ މަސައްކަތް ބަޔަކާ ހަވާލުކޮށްފިއެވެ.

ބުދަ ދުވަހު މިނިސްޓްރީ އޮފް ހައުސިންގ އެންޑް އާރބަން ޑިވޮލޮޕްމަންޓުގައި ބޭއްވި ރަސްމިއްޔާތެއްގައި ބ. ތުޅާދޫގައި އަލަށް އަޅާ 100 ހައުސިންގ ޔުނިޓުގެ މަސައްކަތް ހަވާލުކޮށްފައިވަނީ ޕްރިސިޝަން އިންޖިނިޔަރިންގ ސަރވިސަސްއާއި ފްލަކްސް އިންކް ޕްރައިވެޓް ލިމިޓެޑްގެ ޖޮއިންޓް ވެންޗަރ ކުންފުންޏަކާއެވެ. އެގޮތުން މި އެއްބަސްވުމުގައި މިނިސްޓްރީގެ ފަރާތުން ސޮއި ކުރެއްވީ ސްޓޭޓް މިނިސްޓަރ އަހުމަދު ނަޝީދެވެ.

Advertisement

363 ދުވަހުގެ ތެރޭގައި މި މަސައްކަތް ނިންމުމަށް ދެފަރާތުން އެއްބަސްވެފައިވާއިރު، މި މަސައްކަތުގެ އަގަކީ 79،682،850.00 (ހަތްދިހަ ނުވަ މިލިއަން ހަލައްކަ އައްޑިހަ ދެހާސް އައްސަތޭކަ ފަންސާސް) ރުފިޔާއެވެ.

މި މަޝްރޫގެ ދަށުން ތުޅާދޫގައި ޑިިޒައިން އެންޑް ބިލްޑް އުސޫލުން އެއް ބުރީގެ 100 ހައުންސިންގ ޔުނިޓް އެޅުމަށް އެއްބަސްވެފައިވާއިރު، މި ޔުނިޓްތައް އިމާރަތް ކުރެވޭނީ 1100 އަކަފޫޓުގެ އޭރިއާއެއްގައި 3 ކޮޓަރިއާއި، 3 ފާހާނާ އަދި ސިޓންގ ރޫމަކާއި، ބަދިގެއަކާއި، ސްޓޯރ ރޫމަކާއި ލޯންޑްރީއެއްވެސް ހިމެނޭ ގޮތަށެވެ.

މިއަދު ސޮއި ކުރެވުނު ދެވަނަ މަޝްރޫއެއްގެ ގޮތުން ޅ. ނައިފަރުގައި 100 ހައުސިންގ ޔުނިޓް އެޅުމުގެ އެއްބަސްވުން ހިމެނޭއިރު، މި މަސައްކަތް ހަވާލު ކޮށްފައިވަނީ ޑަބްލިއު އެންޑް އޭ އޯވަރސީސްއާއެވެ. އެގޮތުން މ،ި މަސައްކަތް ނިންމުމަށް 311 ދުވަހުގެ މުއްދަތެއް ދީފައިވާއިރު، މަސައްކަތުގެ އަގަކީ 71،403،200.60 (ހަތްދިހަ އެއް މިލިއަން ހަތަރު ލައްކަ ތިން ހާސް ދުއިސައްތަ ރުފިޔާ ފަސްދޮޅަސް ލާރި) އެވެ.

މި މަޝްރޫގެ ދަށުންވެސް 1100 އަކަފޫޓުގެ އޭރިއާއެއްގައި 3 ކޮޓަރިއާއި، 3 ފާހާނާ އަދި ސިޓންގ ރޫމަކާއި، ބަދިގެއަކާއި، ސްޓޯރ ރޫމަކާއި ލޯންޑްރީއެއްވެސް ހިމެނޭ ގޮތަށް ހައުސިންގ ޔުނިޓުތައް އަޅާއިރު، މި އިމާރަތްތައް އަޅަނީ 3 ބުރިއާއި 4 ބުރީގެ އެޕާރޓްމަންޓް ބިލްޑިންގއެއް ގޮތުގައެވެ.