އއ. ރަސްދޫގައި ހުންނަ އެ އަތޮޅު ތައުލީމީ މަރުކަޒުގެ ވަގުތީ ޓީޗަރަކު މޫނު ބުރުގާ އަޅާތީ އެ ސްކޫލުގެ ވަޒީފާއިން ވަކިކޮށްފިއެވެ.
މޫނު ބުރުގާ އަޅައިގެން ސްކޫލަށް ހާޒިރު ނުވެވޭނެ ކަމަށް އެންގުމުންވެސް އެކަން ޤަބޫލްކޮށްފައި ނުވާތީ ވަޒީފާއިން ވަކިކޮށްފައިވަނީ 3 މަސްދުވަހުގެ ކޮންޓްރެކްޓެއްގައި ހުރި ތަހުމީނާ މަހްމޫދު ކިޔާ ޓީޗަރެކެވެ.
އެމަރުކަޒުން ތަހުމީނާއާއެކު ވެފައިވާ އެއްބަސްވުން އުވާލި ކަމަށް ބުނެ ތަހުމީނާއަށް ފޮނުވާފައިވާ ލިޔުމުގައި ބުނެފައިވަނީ ދިވެހި ސިވިލް ސާވިސްގެ ގަވާއިދު 2014 ގައި "ސިވިލް ސާވިސް މަސައްކަތުގައި މުވައްޒަފުންގެ ހެދުން ބަހައްޓަންވީ ގޮތް” ބަޔާންކުރާ ޗެޕްޓަރ 14 ގެ 145 ވަނަ މާއްދާގެ (ހ)ގައި ބުނަނީ “ސިވިލް ސާވިސްގެ ކޮންމެ ހިދުމަތަކީވެސް ޒިންމާދާރު ކަމާއެކު ދޭންޖެހޭ އަދި ޖަވާބުދާރީ ވާންޖެހޭ ހިދުމަތަކަށްވެފައި، ހިދުމަތް ލިބިގަންނަން އަންނަ ފަރާތްތަކާއި މުއާމަމަލާތް ކުރާ ފަރާތަކަށް އެމީހަކު ފާހަގަކޮށް އެނގެންޖެހޭތީ، ސިވިލް ސާވިސް މުވައްޒަފުންގެ މަސައްކަތު ގަޑީގައި ހެދުން އަޅާފައި ހުންނަންވާނީ ކާކުކަން އެނގޭފަދަ ގޮތެއްގައި" ކަމަށެވެ.
އެ މަރުކަޒުން ބުނެފައިވަނީ އެމާއްދާގައިވާ ގޮތަށް ހެދުން އެޅުމަށް ތަހުމީނާއަށް އެންގިފައިވާނޭ ކަމަށާއި ނަމަވެސް އެ މާއްދާއާ އެއްގޮތައް ހެދުން ނޭޅޭނެ ކަމަށް ތަހުމީނާ ބުނެފައިވާތީ އެމަރުކަޒުން ތަހުމީނާ މަހްމޫދާއެކު ވެފައިވާ 3 މަސްދުވަހުގެ ކޮންޓްރެކްޓް ބާތިލް ކުރެވިފައިވާ ކަމަށެވެ.
ސަރުކާރުން ބުނެފައިވަނީ ސަރުކާރުގެ އެއްވެސް ސްކޫލެއްގެ ވަޒީފާ އަދާކުރާ ޓީޗަރަކަށް މޫނު ބުރުގާ އަޅައިގެން ސްކޫލަށް ނުދެވޭނެ ކަމަށާއި އެއީ ސިވިލް ސާރވިސްގެ ގަވާއިދާ ހިލާފު ކަމެއް ކަމަށެވެ.
ހޯމަ ދުވަހު "ރާއްޖެއެމްވީ"އަށް މައުލޫމާތު ދެއްވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު ވިދާޅުވީ ސަރުކާރު ސްކޫލްތަކުގެ ޓީޗަރުން ހެނދުން އެޅުމުގައި އަމަލު ކުރަމުން ދަނީ ދިވެހި ސިވިލް ސާރވިސް ގަވާއިދުގެ ދަށުން ކަމަށެވެ.
އެޤަވާއިދާ ޚިލާފަށް އއ. މަތިވެރި ސްކޫލްގެ ޕްރައިމަރީ ޓީޗަރެއް ކަމަށްވާ އާއިޝަތު ޝުޒީ މޫނު ބުރުގާ އަޅައިގެން ސްކޫލަށް ހާޒިރުވާތީ އެޑިއުކޭޝަން މިނިސްޓްރީން ވަނީ "ކާކުކަން އެނގޭގޮތަށް" ސިވިލް ސާރވިސް ގަވައީދާ އެއްގޮތަށް ހެނދުން އެޅައިގެން ނޫން ގޮތަކަށް ސްކޫލަށް ހާޒިރުވެގެން ނުވާނެ ކަމަށް އަންގައިފަ އެވެ.
މޫނު ބުރާ އެޅުން މަނާ ކުރުމާއި ގުޅިގެން ބައެއް ދީނީ އިލްމްވެރިން ގެންދަވަނީ އެކަމާ ކަންބޮޑުވުން ފާޅު ކުރައްވަމުންނެވެ.
