ރިލްވާނު ވަގަށް ނެގި މައްސަލައިގެ މައުލޫމާތު ނުދިނުމުން އާއިލާ އިން ކޯޓަށް!
ބޭނުންވީ ކޯޓުން ބޭރުން ހައްލެއް، އެކަމަކު ޖަވާބެއް ނުލިބުނު
ރިލްވާން: މި މައްސަލައިގައި ފުލުހުން މައުލޫމާތު ހާމަނުކުރާތީ އެތައް ބައެއްގެ ފާޑުކިޔުން ވަނީ އަމާޒުވެފައި
މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲ ވަގަށް ނަގާފައިވާ މައްސަލައިގައި ކަން ހިނގައިދިޔަގޮތުގެ ތަފްސީލު ހޯދުމަށް އާއިލާގެ ފަރާތުން ސިވިލް ކޯޓަށް މައްސަލައެއް ހުށަހަޅައިފި އެވެ.
ރިލްވާން ވަގަށް ނަގާފައިވަނީ 2014 ވަނަ އަހަރުގެ އޯގަސްޓް އަށް ވަނަ ދުވަހުގެ ރޭ އެވެ. ފުލުހުން ހާމަކޮށްފައިވާ މައުލޫމާތުތަކަށް ބަލާއިރު، ހުޅުމާލެއިން ރިލްވާން ވަގަށް ނަގައިގެން އަރުވާފައިވަނީ ރަތް ކުލައިގެ ކާރަކަށެވެ. އެ ކާރުން ފެނުނު އިސްތަށިތަކުން ރިލްވާންގެ މަންމަގެ ޑީއެންއޭ ވަނީ ފެނިފަ އެވެ. އަދި ރިލްވާނަށް ބަޔަކު މީހުން ފާރަލި ކަމަށް ވެސް ފުލުހުން ބުނެފައިވާއިރު، މި މައްސަލައާ ގުޅިގެން ފުލުހުން ހައްޔަރުކުރި އެންމެން ވެސް ވަނީ ދޫކޮށްލާފަ އެވެ.
ރިލްވާންގެ މައްސަލައާ ގުޅޭ ގޮތުން، އެންމެ ފަހުން ފުލުހުން މައުލޫމާތެއް ހާމަކޮށްފައިވަނީ މިދިޔަ އަހަރުގެ އޭޕްރީލް މަހުގެ ތެރޭގަ އެވެ. އޭގެ ފަހުން އެ މައްސަލައާ ގުޅޭ އެއްވެސް މިންވަރެއްގެ މައުލޫމާތެއް ފުލުހުން ހާމައެއް ނުކުރެ އެވެ.
އެ މައްސަލައާ ގުޅޭ މައުލޫމާތެއް ހާމަނުކުރާތާ ނުވަ މަހެއްހާ ދުވަސް ފަހުން، މައްސަލައާ ގުޅޭ މައުލޫމާތު ހޯދުމަށް، މައުލޫމާތު ހޯދުމާއި ލިބިގަތުމުގެ ގާނޫނުގެ ދަށުން މައްސަލަ ހުށަހަޅާފައިވަނީ މިދިޔަ އަހަރުގެ ޑިސެމްބަރު މަހުގަ އެވެ. މިހާރު އެ މައްސަލައިގެ ބައެއް އަޑުއެހުންތައް ވެސް ވަނީ ބާއްވާފަ އެވެ.
އެކަމާ ގުޅޭ ގޮތުން ރިލްވާނުގެ އާއިލާ އިން ނެރުނު ބަޔާނެއްގައި ބުނީ އެ މައްސަލައިގައި އެދިފައިވާނީ ރިލްވާނު ގެއްލުވާލާފައިވާ ގޮތުގެ ހަގީގަތް ދެނެގަނެ ކަން ހިނގައިދިޔަގޮތް އާއިލާއަށް އޮޅުންފިލުވައި ދިނުމަށް ކަމަށެވެ.
އާއިލާ އިން ބުނީ ރިލްވާނު ގެއްލުވާލި މައްސަލައިގައި އެކަށީގެންވާ ވަގުތާއި ވަސީލަތްތައް ފުލުހުން ބޭނުންކޮށްފައިވީ ނަމަވެސް، އެއްވެސް އެދެވޭ މައުލޫމާތެއް ހިއްސާ ކޮށްފައިނުވާ ކަމަށެވެެ.
ރިލްވާނުގެ އާއިލާ އިން ބުނީ ތަހުގީގަށް ހުރަސްއެޅޭނެ ފަދަ އެއްވެސް މައުލޫމާތެއް ހިއްސާކުރުމަށް ނޭދޭ ކަމަށާއި، ނަމަވެސް އެންމެ ފަހުން މައުލޫމާތެއް ހާމަކުރީ ނުވަ މަސް ކުރިން ކަމަށްވާއިރު، މައްސަލަ ކުރިއަށް ދަނީ ކަމަށް ދެކިގެން އިތުރަށް ކެތްކުރެވެން ނެތް ކަމަށެވެ. އަދި މައްސަލަ ކޯޓުން ބޭރުގައި ހައްލުކުރުމަށް މަސައްކަތް ކުރި ނަމަވެސް، ދައުލަތުގެ ފަރާތުން އެދެވޭ ޖަވާބެއް ލިބފައިނުވާ ކަމަށް އެ އާއިލާ އިން ބުނެ އެވެ.
މީގެ އިތުރުން އެ އާއިލާ އިން ބުނީ މި މައްސަލައިގެ މައުލޫމާތު ފުލުހުންގެ ފަރާތުން ހިއްސާކުރުމަށް އަދިވެސް އެދޭ ގޮތަކީ ކޯޓުން ބޭރުގައި ސިއްރުން ކަމަށެވެ. އަދި އަނިޔާ ލިބޭ ފަރާތާއި ފުލުހުންނާ ދެމެދު އެދެވޭ ގޮތަކަށް މައުލޫމާތު ހިއްސާ ކުރުމަކީ ރައްޔިތުންގެ މަސްލަހަތު ވެސް އެކަމުގައި ހިމެނޭ ކަމެއް ކަމަށް އެ އާއިލާ އިން ބުނެ އެވެ.
