ބޮންގޮއްވާލީ ޝަންގްރިއްލާ ހޮޓެލް، ބުދަ ދުވަހު އަލުން ހުޅުވާލަނީ

އޭޕްރީލް މަހުގެ 21 ވަނަ ދުވަހު ސްރީލަންކާއަށް ދިން ބޮމުގެ ހަމަލާގައި ގެއްލުންވި ޝަންގްރިއްލާ ހޮޓެލް ބުދަ ދުވަހު އަލުން ހުޅުވާލާނެ ކަމަށް އެ ހޮޓަލުން ބުނެފިއެވެ.

އީސާއީ ދީނުގެ މީހުން ފާހަގަކުރާ އީސްޓަ ސަންޑޭއާ ދިމާކޮށް އަޅުކަން ކުރާ ފައްޅިތަކާއި މަތީ ފަންތީގެ ހޮޓާތަކަށް ދިން ހަމަލާގައި 258 މީހަކު ވަނީ މަރުވެފައެވެ. ޝަންގްރިއްލާ ހޮޓަލުގެ ހެނދުނުގެ ނާސްތާ ކުރިޔަށް ދިޔަ ވަގުތު ހަށި ގޮއްވާލައިގެން ހަމަލާ ދިފައިވަނީ އައްޒާން ނަމަކަށް ކިޔާ މީހެކެވެ.

އަންގާރަ ދުވަހު ޝަންގްރިއްލާ ހޮޓަލުން ބުނީ، އީސްޓަ ސަންޑޭގެ ހަމަލާ އަށް ފަހު ބުދަ ދުވަހުން ފެށިގެން އެ ހޮޓަލް ގެސްޓުންނަށް ހުޅުވާލާނެ ކަމަށެވެ. އެގޮތުން ބުދަ ދުވަހު ރޭގަނޑު ހަޔަކުން ފެށިގެން އެ ހޮޓަލުގެ ސަފޭރް ލޯންޖް، ކެޕިޓަލް ބާ އެންޑް ގްރިލް އިން ހިދުމަތް ލިބޭނެ ކަމަށް އެ ހޮޓަލުން ބުންޏެވެ.

ޝަންގްރިއްލާގެ އޮފިޝަލަކު ރާއްޖެ.އެމްވީ އަށް ވިދާޅުވީ، ބުދަ ދުވަހުން ފެށިގެން ރޫމްތަކަށް ރިޒަވޭޝަން ހެއްދޭނެ ކަމަށެވެ. ހަމާލާ އަށް ފަހު ފާއިތުވި ހަތް ހަފްތާ ތެރޭގައި އާއްމު ރައްޔިތުންނާއި، ޖަމިއްޔާ ޖަމައަތްތަކުން ދީފައިވާ އެހީއަށް އެ ހޮޓަލުން ވަނީ ޝުކުރު އަދާކޮށްފައެވެ.

ޝަންގްރިއްލާ އިތުރުން ބޮންގޮއްވާލި ސިނަމޮން ގްރޭންޑް ހޮޓަލާ، ކިންގްސްބަރީ ހޮޓަލްގެ ބައެއް ވަނީ ހުޅުވާފައެވެ. އެ ހަމަލާގެ ޒިންމާ ހަތިޔާރު އެޅި ޓެރަރިސްޓު ޖަމާއަތެއް ކަމަށްވާ އައިއެސްއިން ނަގާފައިވާއިރު ލަންކާ ސަރުކާރު ބުނާގޮތުން ހަމަލާ ދީފައިވަނީ ހަރުކަށި އިސްލާމީ ޖަމާއަތެއް ކަމަށްވާ ނެޝަނަލް ތައުހީދު ޖަމާއަތް (އެންޓީޖޭ) އިންނެވެ.

އެންޓީޖޭގެ ލީޑަރު ޒަހްރާން ހާޝިމީ މަރުވެފައިވާކަން ލަންކާ ފުލުހުން ވަނީ ކަށަވަރު ކޮށްދީފައެވެ. ތަމަޅަ މީޑިއަމް އަށް ކިޔަވައިދޭ ސްކޫލެއްގެ ޕްރިންސިޕަލަކާ، ޓީޗަރަކު ހިމެނޭ ގޮތަށް 106 މީހަކު ވަނީ މިހާތަނަށް ހައްޔަރުކޮށްފައެވެ.