އިންޑިއާގެ ސްކޫލެއްގައި ރޯވެ މަދުވެގެން 19 ކުދިން މަރުވެއްޖެ އެވެ.
ހުޅަނގުގެ ސިޓީއެއް ކަމަށްވާ ސުރާތުގައި ހިނގި މި ހާދިސާގައި ކަޅުދުން އަރަމުންދިޔަ އެ އިމާރާތުން ކުދިން ވެއްޓި އަދި ފުންމަމުން ދިޔަ މަންޒަރުވަނީ ފެނިފައެވެ.
މަރުވި ގިނަ ކުދިންނަކީ އެ ޓިއުޝަން ސެންޓަރުގައި ކިޔަވަމުންދިޔަ ފުރާވަރުގެ ކުދިންނެވެ.
އަލިފާން ރޯވާން ދިމާވި ސަބަބެއް އަދި އެނގިފައެއް ނުވެއެވެ. އޮފިޝަލުން ވިދާޅުވީ ގިނަ ކުދިންތަކެއް ތިބި ކްލާސްރޫމުގައި ހުޅުހިފީ ފުރާޅުގައި ކަމަށެވެ. ހުޅުގަނޑު އެހާ ބޮޑަށް ފެތުރިގެން ދިޔައީ އިމާރާތުގެ ބޮޑު ބައި ޕްލާސްޓިކުން ހުރުމުން ކަމަށް އޮފިޝަލުން ބުންޏެވެ.
މަދުވެގެން 20 ކުއްޖަކު ގެންދަނީ ގުޖުރާތުގެ ހޮސްޕިޓަލެއްގައި ފަރުވާ ހޯދަމުންނެެވެ.
"ކުދިން މަރުވީ ރޯވެގެންނާއި އިމާރާތުން ބޭރަށް ފުންމާލުމުގެ ތެރޭގައި" އަލިފާން ނިއްވުމުގައި މަސައްކަތްކުރި ދީޕަކް ސަޕްތަލީ އޭއެފްޕީއަށް ވިިދާޅުވިއެވެ.
ރޮއިޓަރސްއިން ރިޕޯޓްކޮށްފައިވާ ގޮތުގައި މަރުވި ހުރިހާ ކުދިންނަކީ ވެސް 20 އަހަރުން ދަށުގެ ކުދިނެވެ.
އަލިފާން ރޯވީ ސިޑިކައިރީގައި ކަމަށް ވުމުން އެތައް ކުދިންނެއް ތާށިވި ކަމަށް ވެސް އެ އެޖެންސީން ބުނެފައި ވެއެވެ. އަދި އެ ތަނުގައި އަލިފާން ނިއްވާ އެއްވެސް ނިޒާމެއް ނެތް ކަމަށް ވެސް އޮފިޝަލުން ވިދާޅުވެފައި ވެއެވެ.
ތައުޒިއާ ވިދާޅުވެ ބޮޑުވަޒީރު މޯދީ ކުރެއްވި ޓްވީޓެއްގައި ވަނީ ހާދިސާގައި ގެއްލުން ލިބުނު ފަރާތްތަކަށް އެހީތެރިކަން ފޯރުކޮށްދިނުމަށް އިދާރާތަކަށް ގޮވާލާފައެވެ.
މި ހާދިސާއާ ގުޅިގެން އެ ސަރަހައްދުގެ ހުރިހާ ޓިއުޝަން ކްލާސްތަކެއް ވަކި އެއްޗެއް އަންގަންދެން ވަނީ ބަންދުކޮށްފައެވެ. އަދި އަލުން ހުއްދަ ދެވޭނީ ކަމާ ބެހޭ ފަރާތްތަކުން ބެލުމަށް ފަހު އަދި އަލިފާން ނިއްވާ ނިޒާމު ގާއިމުކޮށްފައިވާ ކަމުގެ ހުއްދަ ލިބުމުން ކަމަށް ވެސް ކަމާ ބެހޭ ފަރާތްތަކުން ވަނީ އަންގާފައެވެ.
