ޑައިބެޓީސް ސޮސައިޓީގެ ހެލްތު ޖާނަލް މެގަޒިން އިފްތިތާހު ކޮށްފި
29 އެޕްރީލު 2019 | ހޯމަ 04:30މެގަޒިން ނެރުމަށް ހަމަޖެހިފައިވަނީ އަހަރަކު ދެ ފަހަރު
ޑައިބެޓީސް ސޮސައިޓީ އޮފް މޯލްޑިވްސްގެ ހެލްތު ޖާނަލް މެގަޒިން އިފްތިތާހު ކުރުމުގެ ތެރެއިން
ޑައިބެޓީސް ސޮސައިޓީ އޮފް މޯލްޑިވްސްގެ ހެލްތު ޖާނަލް މެގަޒިން އިފްތިތާހު ކޮށްފިއެވެ.
ޑީއެސްއެމްގެ "ދޯދ" ނެރެދެއްވީ އެކަމަށްޓަކައި ފެކަލްޓީ އޮފް ހެލްތު ސައިންސަސްގައި އާދިއްތަ ދުވަހުގެ ރޭ ބޭއްވި ހަފްލާއެއްގައި މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަނެވެ.
މި މެގަޒިނަކީ އަހަރަކު ދެ ފަހަރު ނެރުމަށް ހަމަޖެހިފައިވާ މެގަޒިނެއް ކަމަށާއި ހަކުރުބައްޔާ ގުޅިގެން ހެދިފައިވާ ރިސާރޗްތަކާއި ހަކުރުބައްޔާ ގުޅޭ ސިއްހީ އެކި ލިޔުންތަކުގެ އިތުރުން ސިއްހީ ގިނަ މައުލޫމާތުތަކެއް މި މެގަޒިންގައި ހިމެނޭނެ ކަމަށް އެ ސޮސައިޓީން މައުލޫމާތު ދެއެވެ.
ޑީއެސްއެމްގެ މައިގަނޑު މަސައކަތަކީ ހަކުރުބައްޔައް މީހުން ހޭލުންތެރިކުރުމާ އެ ބައްޔަށް މީހުން ސްކްރީން ކުރުމެވެ. އެގޮތުން 2002 ވަނަ އަހަރުން ފެށިގެން 2015 ވަނައަހަރާ ހަމައަށް މުޅި ރާއްޖޭގައި ހަކުރުބައްޔަށް މީހުން ހޭލުންތެރި ކުރުމާއި މީހުން ސްކްރީން ކުރުމުގެ ޕްރޮގްރާމްތައް ހިނގާފައި ވެއެވެ. އަދި މިހާރު ވެސް ސްކޫލުތަކަށާއި ސަރުކާރުގެ މުއްސަސާތަކަށާއި އާންމު ފަރުދުންނަށް މި ޕްރޮގްރާމް ހިންގާ ކަމަށް އެ ޖަމިއްޔާ އިން ބުނެއެވެ.
އެ ޖަމިއްޔާ އިން ހަކުރު ބަލީގެ މީހުންނަށް ޚާއްސަ ކްލިނިކެއް ހުޅުވާފައިވާއިރު މި ކްލިނިކުން ހަކުރު ކޮންޓްރޯލް ކުރުމާއި، ހަކުރު ބައްޔަށް ޓެސްޓްކުރުމާއި މި ބަލީގެ ސަބަބުން ދިމާވާ ހުރިހާ މައްސަލަތަކަކަށް ފަރުވާ ދެއެވެ. އަދި މި ކްލިނިކުން ފޯރުކޮށްދޭ ހުރިހާ ޚިދުމަތްތަކެއް ވެސް ފޯރުކޮށްދެނީ ހިލެއެވެ.
ޑީއެސްއެމްއަކީ ހަކުރުބައްޔައް މީހުން ހޭލުންތެރި ކުރުމާއި މިބަލީގެ މީހުންނަށް އާދައިގެ ދިރިއުޅުމެއް އުޅުމަށް އެހީތެރިވެ ދިނުމަށްޓަކައި 2000 ވަނަ އަހަރު އުފެއްދި ހިލޭ ސާބަހަށް މަސައްކަތް ކުރާ ޖަމިއްޔާއެކެވެ. އޭޕްރީލް 28 ވަނަ ދުވަހަކީ ޑައިބެޓީސް ސޮސައިޓީ އޮފް މޯލްޑިވްސްގެ 19 ވަނަ އަހަރީ ދުވަހެވެ
