ހެލްތުން މުއްދަތުގައި ބިލްތައް ނުދައްކައިގެން 8 މިލިއަނަށްވުރެ ގިނަ ރުފިޔާ ޖޫރިމަނާއަށް ދައްކަން ޖެހިއްޖެ
ހަމިލިޔަނަށްވުރެ ގިނަ ރުފިޔާގެ މަސައްކަތެއް މާލިއްޔަތު ޤަވާއިދާ ޚިލާފަށް ޙަވާލުކޮށްފައިވޭ
އައިޖީއެމްެޗް: ހެލްތުގެ އޮޑިޓް ރިޕޯޓުގައި ބޮޑެތި މައްސަލަތަކެއް ވަނީ ފާހަގަ ކޮށްފައި
މިނިސްޓްރީ އޮފް ހެލްތުންނާއި އެމިނިސްޓްރީގެ ދަށުން ހިންގާ ހޮސްޕިޓަލްތަކުން ދައްކަން ޖެހޭ ބިލްތައް މުއްދަތުގައި ނުދެއްކުމުން ޖޫރިމަނާގެ ގޮތުގައި 8 މިލިއަނަށް ވުރެ ގިނަ ރުފިޔާގެ ގެއްލުމެއް 2014 ވަނަ އަހަރު ވެއްޖެއެވެ.
މިކަން ހާމަވެފައި މިވަނީ ހެލްތު މިނިސްޓްރީގެ 2014 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުންނެވެ.
އެއޮޑިޓް ރިޕޯޓުގައި ބުނެފައިވާ ގޮތުގައި މިނިސްޓްރީ އާއި ހޮސްޕިޓަލްތަކުން ފެންބިލާއި ކަރަންޓް ބިލާއި ވޯކް ވިސާ ފައިސާ ދައްކަން ޖެހޭ މުއްދަތުގައި ނުދެއްކުމުގެ ސަބަބުން ޖޫރިމަނާގެ ގޮތުގައި 2014 ވަނަ އަހަރުގެ ބަޖެޓުން ޖުމްލަ 8،594،503ރ. (އަށް މިލިއަން ފަސްސަތޭކަ ނުވަދިހަ ހަތަރު ހާސް ފަސް ސަތޭކަ ތިން ރުފިޔާ) ދައްކާފައިވާއިރު އެކަމުގައި އިހުމާލް ވެފައިވަނީ ކޮންފަރާތަކުންކަން ބަލައި އެފަރާތްތަކުގެ އަތުން އެފައިސާ ހޯދާފައި ނުވާ ކަމަށެވެ.
މީގެ އިތުރުން މާލިއްޔަތު ޤަވާއިދުގައި ބުނެފައިވާ ގޮތަށް ތަންތަނަށް ހޯދަން ޖެހޭ ތަކެތީގެ އަގު 1.5 މިލިއަން ރުފިޔާއަށް ވުރެ ބޮޑު ނަމަ އެތަކެތި ގަތުމަށް ވަކިފަރާތަކާ ޙަވާލުކުރަން ވާނީ ޓެންޑަރ އިވެލުއޭޝަން ބޯޑަށް ހުށަހަޅައިގެން ކަމަށް ބަޔާންކޮށްފައި ވީނަމަވެސް އެގޮތައް ޢަމަލްކޮށްފައި ނުވާކަން ފާހަގަ ކުރެވިފައިވާ ކަމަށް ރިޕޯޓުގައި ފާހަގަކޮށްފައި ވެއެވެ. އެގޮތުން ބަންދު ކުރެވޭ މީހުންނަށް ކާންދިނުމަށް 6،252،044ރ. (ހަ މިލިޔަން ދެލައްކަ ފަންސާސް ދެ ހާސް ސާޅީސް ހަތަރު ރުފިޔާ) ނޭޝަނަލް ޑްރަގް އޭޖެންސީގެ ބަޖެޓުން ޚަރަދުކޮށްފައިވާއިރު އެމަސައްކަތް ޙަވާލު ކުރާނެ ފަރާތެއް ހޯދުމަށް ޓެންޑަރ އިވެލުއޭޝަން ބޯޑަށް ހުށަހަޅާފައި ނުވާކަން ހެލްތުގެ 2014 ވަނަ އަހަރުގެ އޮޑިޓް ރިޕޯޓްގައި ފާހަގަ ކޮށްފައިވެއެވެ.
