ކުރިއާ އަޅާބަލާއިރު ލޭހަދިޔާކުރުމަށް ސަމާލުކަންދޭ މިންވަރު އިތުރު: ހެލްތު މިނިސްޓަރ
ހޭލުންތެރިކަން އިތުރުކޮށް މީހުންގެ ޝައުގުވެރިކަން ލޭ ދިނުމަށް އިތުރުކުރުމަށް ހެލްތު މިނިސްޓްރީން ހާއްސަ ސަމާލުކަމެއް ދޭ
ހެލްތު މިނިސްޓަރ އަހުމަދު ނާޒިމް
ކުރިއާ އަޅާބަލާއިރު ލޭހަދިޔާ ކުރުމަށް ސަމާލުކަންދޭ މިންވަރު އިތުރު ކަމަށް ހެލްތު މިނިސްޓަރ އަހުމަދު ނާޒިމް ވިދާޅުވެއްޖެއެވެ.
ބައިނަލްއަގްވާމީ ލޭހަދިޔާ ކުރުމުގެ ދުވަސް ފާހަގަ ކުރުމަށް މޯލްޑިވްސް ބްލަޑް ޑޯނާސް އިން އިންތިޒާމްކޮށްގެން ރަސްފަންނުގައި ބޭއްވި ރަސްމިއްޔާތުގައި ރާއްޖެއެމްވީއަށް ދެއްވި އިންޓަވިއުއެއްގައި މިނިސްޓަރ ނާޒިމް ވިދާޅުވީ މީހުންގެ ހޭލުންތެރިކަން އިތުރުކޮށް މީހުންގެ ޝައުގުވެރިކަން ލޭ ދިނުމަށް އިތުރުކުރުމަށް ހެލްތު މިނިސްޓްރީން ހާއްސަ ސަމާލުކަމެއް ދޭކަމަށެވެ.
ލޭ ހަދިޔާކުރުމަށް މީހުންގެ ހޭލުންތެރިކަން ފުޅާވެގެންދާ ކަމަށާއި އެހެން ނަމަވެސް އަދިވެސް ސަރުކާރުގެ ވުޒާރާތައް ގުޅިގެން ލޭ ހަދިޔާ ކުރުމުގެ މިންވަރު އިތުރުކުރުމަށް މަސައްކަތް ކުރަންޖެހޭކަމަށް މިނިސްޓަރ ވިދާޅުވިއެވެ.
"ވޮލެންޓްރަލީ މި މަސައްކަތް ފުޅާވެގެން އެބަދޭ. އެހެން ނަމަވެސް އިތުރު އެންޖީއޯތަކާއި ސަރުކާރުގެ ވުޒާރާތައް ގުޅިގެން މިކަމަށް ކުރަންޖެހޭ މަސައްކަތް އަދިވެސް އިތުރުކަމަށް އަޅުގަނޑަށް ފާހަގަކުރެވޭ." މިނިސްޓަރ ވިދާޅުވިއެވެ.
މޯލްޑިވްސް ބްލަޑް ޑޯނާސްގެ ނައިބް ރައީސް އިބްރާހިމް ރަޝީދު ރާއްޖެ އެމްވީއަށް ވިދާޅުވީ ލޭ ހަދިޔާކުރުމުގެ ދުވަސް ފާހަގަ ކުރުމަށް ހަވީރެއް ބޭއްވީ ލޭ ހަދިޔާ ކުރާ މީހުންގެ ޚިދުމަތުގެ އަގުވަޒަންކުރުމަށްޓަކައި ކަމަށެވެ.
ދުނިޔޭގެ ލޭ ހަދިޔާ ކުރާދުވަސް ފާހަގަ ކުރުމަށްޓަކައި ރަމަޟާން މަސް ނިމުމުން "ބްލަޑް ކޭމްޕެއް" ފަށާނެ ކަމަށް ވެސް އޭނާ ވިދާޅުވިއެވެ.
މޯލްޑިވްސް ބްލަޑް ޑޯނާސް އިން ބޭއްވި ރަސްމިއްޔާތުގައި ވަނީ "އައިރަނާސް" ގެ ފަރާތުން ބައިވެރިވެފައެވެ. މޯލްޑިވްސް ބްލަޑް ޑޯނާސް އިން ވަނީ ދުވަސް ފާހަގަ ކުރުމަށް ރަތްކުލައިގެ ފުއްޕާހަންތައް ވަޔަށް ދޫކޮށްލާފައެވެ.
