ދިވެހިން ދިރިއުޅޭ ދެހިވަލަ ޒޫ ކައިރީގައި ވެސް ބޮން ގޮއްވާލައިފި
ޓްރޮޕިކަލް އިން ގައި ބޮން ގޮއްވުމުގެ ސަބަބުން ދެ މީހަކު ވަނީ މިހާތަނަށް މަރުވެފައި
ލަންކާގައި މިއަދު ދިން ހަމަލާގެ ތެރެއިން
ލަންކާގައި ގިނަ އަދަދެއްގެ ދިވެހިން ދިރިއުޅޭ ދެހިވަލަ ޒޫ ކުރިމަތީގައި ހުންނަ ހޮޓަލެއްގައި އަނެއްކާ ވެސް ބޮމެއް ގޮއްވާލައިފިއެވެ.
ދެހިވަލަ ޒޫ ކުރިމަތީގައި ހުންނަ ހޮޓެލެއް ކަމަށްވާ ޓްރޮޕިކަލް އިން ގައި ބޮން ގޮއްވުމުގެ ސަބަބުން ދެ މީހަކު ވަނީ މިހާތަނަށް މަރުވެފައެވެ.
އެދެމީހުން މަރުވެފައިވަނީ ބޮމުގެ ހަމަލާގައި ލިބިފައިވާ ޒަޚަމްތަކަށް ލަންކާގެ ކަޅުބޯވިލާ ހޮސްޕިޓަލުގައި ފަރުވާދެމުން ދަނިކޮށެވެ.
މިހަމަލާއާއި އެކު ލަންކާގެ އެކި ސަރަހައްދުތަކަށް ދީފައިވާ ބޮމުގެ ހަމަލާގެ އަދަދު ހަތަކަށް ވަނީ އަރާފައެވެ.
ޓްރޮޕިކަލް އިން ގެ އިތުރުން ހަމަލާ ދީފައިވާ ހޮޓާތަކަކީ ސިނަމޮން ގްރޭންޑް، ކިންގްސް ބަރީ އަދި ޝަންގްރިއްލާ ހޮޓެލެވެ.
ހަމަލާ ދީފައިވާ ތިން ފައްޅި ތަކަކީ ކޮއްޗި ކަޑޭގައި ހުންނަ ސެއިންޓް އެންތަނީސް ޗާޗް ކަޓުވަޕިޓިޔާގައި ހުންނަ ސެއިންޓް ސެބާސްޓިއަން ޗާޗަށާއި ބައްޓިކޮލޯއާ ޗާޗަށެވެ.
މިހާތަނަށް ހަމަލާތަކުގައި މަރުވި މީހުންގެ އަދަދު ވަނީ ގާތްގަނޑަކަށް 185 އަކަށް އަރާފައެވެެ. އަދި ޒަހަމްވި މީހުންގެ އަދަދަކު 400 އަށް ވުރެ މައްޗަށް ވަނީ އަރާފައެވެ.
