ދެކުނު ފްރާންސްގެ މިސްކިތެއްގެ ކައިރީގައި ހިނގި ބަޑިޖެހުމުގެ ހާދިސާއެއްގައި އަށް މީހަކު ޒަޚަމްވެއްޖެއެވެ.
ފްރާންސްގެ އެވިގްނޮން ސިޓީގެ އައްރަހްމާ މިސްކިތައް އާދީއްތަ ދުވަހުގެ ރޭ ނަމާދަށް ދިޔަ ބަޔަކު މިސްކިތުން ފޭބި ވަގުތު، ދެ މީހަކު އައިސް ބަޑިން ހަމަލާ ދިން އިރު، ފުލުހުން ބުނެފައި ވަނީ މި ހަމަލާއަކީ ޓެރަރިސްޓް ހަމަލާއެއް ކަމަށް ނުބަލާ ކަމަށެވެ.
ޒަޚަމްވި މީހުންގެ ތެރޭގައި އެއް އާއިލާއަކަށް ނިސްބަތްވާ ހަތަރު މީހަކު ހިމެނެއެވެ.
ޒަޚަމްވި އަށް މީހުންގެ ތެރެއިން ދެ މީހަކު ހޮސްޕިޓަލުގައި ވަނީ އިތުރު ފަރުވާ އަށް އެނދުމަތި ކޮށްފައެވެ. ބައެއް މަސްދަރުތަކާއި ހަވާލާދީ މީޑިއާތަކުގައި ރިޕޯޓުކޮށްފައި ވަނީ ހަމަލާ ދިން މީހުންގެ އަސްލު ޓާގެޓަކަށް ވެފައި ވަނީ މިސްކިތުން އަޅުކަމަށް ފަހު ނިކުތް މީހުން ނޫން ކަމަށެވެ.
ހާދިސާ ތަހުގީގު ކުރަމުންދާއިރު ބައެއް ރިޕޯޓުތައް ބުނެފައި ވަނީ ހަމަނުޖެހުން ހިނގާފައި ވަނީ ޒުވާނުންތަކެއްގެ ތެރޭގައި ހިނގި ދެ ބަސްވުމަކަށް ފަހު ކަމަށެވެ.
