ކުރުދީންގެ ބޯޑަރު ކައިރީގައި އީރާނާއި އީރާޤުން ގުޅިގެން އަސްކަރީ ފަރިތަކުރުންތައް ފަށައިފި

އީރާޤްގެ ކުރުދިސްތާނުގައި އީރާނާއި އީރާޤްގެ ސަލާމަތީ ބާރުތަކުން ގުޅިގެން ހިންގާ އަސްކަރީ ފަރިތަކުރުންތަކެއް ފަށައިފި އެވެ.

އީރާޤްގެ ކުރުދީން، އެމީހުންގެ މިނިވަން ދަޢުލަތެއް އުފެދުމަށް ކުރާ މަސައްކަތާއި ގުޅިގެން ސަރަޙައްދުގެ މަޝްރަޙު ހޫނުވެފައިވަނިކޮށް، އަވަށްޓެރި އީރާނާއި އީރާޤުން އަސްކަރީ ފަރިތަކުރުންތައް ފަށާފައިވަނީ ހޯމަ ދުވަހު އެވެ.

ޓޭންކަރުތަކާއި ބަރު ހަތިޔާރާއެކު އީރާޤާއި އީރާނުގެ އަސްކަރިއްޔާ އިން ގުޅިގެން ހިންގާ ފަރިތަކުރުންތައް ފަށާފައިވަނީ ކުރުދިސްތާނުގެ ބޯޑަރާއި ގާތްގަނޑަކަށް 250 މީޓަރު ކައިރީގައި ކަމަށް ކުރުދީންގެ ބަޝްމަޚް ބޯޑަރު ޕޯސްޓުގެ ކަސްޓަމްސް ޗީފް ޝްވާން އަބޫ ބަކްރު މަޢުލޫމާތު ދެއެވެ.

އަދި ތަމްރީންތަކުގައި ބައިވެރިވާ އީރާޤްގެ ފައުޖުތައް ހަރަކާތްތެރިވަނީ ކަޅު ޔުނިފޯމްގައި ކަމަށާއި، އެހެންކަމުން ތަމްރީންތަކުގައި ބައިވެރިވަނީ އިރާޤްގެ ކައުންޓަރ ޓެރަރިޒަމް ސާވިރސް އަށް ނިސްބަތްވާ ސިފައިންކަން ކަށަވަރުވާ ކަމަށް އޭނާ އާއި ހަވާލާދީ ރިޕޯޓްތައް ބުނެއެވެ.

އީރާނުގެ އަސްކަރިއްޔާގެ ވެބްސައިޓްގައި އާއްމުކޮށްފައިވާ ގޮތުގައި، އީރާޤުގެ އަސްކަރިއްޔާ އާއި ގުޅިގެން ހިންގާ އަސްކަރީ ފަރިތަކުރުންތަކުގައި ހަތިޔާރާއި ވައިގެ ސިފައިންގެ ޔުނިޓްތައް ބައިވެރިވާނެ އެވެ.

މިއީ 1979ވަނަ އަހަރުގެ ފަހުން އީރާޤާއި ގުޅިގެން އީރާނުން ހިންގާ ފުރަތަމަ އަސްކަރީ ފަރިތަކުރުންތަކެވެ. 1980ވަނަ އަހަރުން ފެށިގެން 1988ވަނަ އަހަރުގެ ނިޔަލަށް މި ދެޤައުމުގެ މެދުގައި ހަނގުރާމަ ހިނގާފައިވެއެވެ.

އީރާޤްގެ މައި ސަރުކާރުގެ ކިބައިން މިނިވަންވެ، ކުރުދީންގެ ވަކި ދަޢުލަތެއް އުފެއްދުމަށް ސެޕްޓެމްބަރު މަހުގެ 25ވަނަ ދުވަހު ނެގި ފެންނަ-ނުފެންނަ ވޯޓުގައި، ކުރުދީންގެ މިނިވަން ދަޢުލަތެއް އުފެއްދުމަށް ފެންނަ ކަމަށް ވޯޓުގައި ބައިވެރިވި މީހުންގެ 92.7 އިންސައްތަ މީހުން ވަނީ ބުނެފައެވެ.

ކުރުދީންގެ ވޯޓަށްފަހު، އީރާޤްގެ އިތުރުން އަވަށްޓެރި އީރާނާއި ތުރުކީން ވަނީ، އީރާޤްގެ ކުރުދިސްތާން އެކަހެހިރު ކުރުމަށް ފިޔަވަޅުތަކެއް އަޅާފައެވެ. އޭގެ ތެރޭގައި ކުރުދިސްތާނުގެ މައި ދެ އެއަރޕޯޓުގެ ބައިނަލްއަޤްވާމީ އުދުހުންތައް ވަނީ ހުއްޓުވުން ހިމެނެ އެވެ.

މީގެ އިތުރުން، އީރާނުން ވަނީ އީރާޤްގެ ކުރުދިސްތާނަށް ތެލާއި ހަކަތައިގެ ބާވަތްތައް އެތެރެ ކުރުމާއި ބޭރު ކުރުން ވަނީ މުއްދަތެއް ނެތް ގޮތަށް ހުއްޓާލާފައެވެ. އީރާނުގެ އޮފިޝަލަކާއި ހަވާލާދީ އޭއެފްޕީން ހޯމަ ދުވަހު ވަނީ، ބޯޑަރު ހުރަސްކޮށް އީރާނަށް އެތެރެވާން އުޅުނު ކުރުދީންގެ 600 އެއްހާ ތެޔޮ ޓޭންކަރުތަކަށް އީރާނުގެ ކަސްޓަމުން ހުރަސް އަޅާފައިވާ ކަމަށް ރިޕޯޓް ކޮށްފައެވެ.