ސްރީލަންކާގެ ބޮޮޑުވަޒީރު ރަނިލް ވިކްރަމަ ސިންހަ ގެ ރަސްމީ ގެކޮޅު، ޓެމްޕްލް ޓްރީގެ ސެކިއުރިޓީގައި ހިމެނޭ ސްޕެޝަލް ޓާސްކްފޯސްގެ(އެސްޓީއެފް)ގެ މެމްބަރަކު އަމިއްލަގަޔަށް ބަޑިޖަހައި މަރުވެއްޖެ ކަމަށް ލަންކާގެ ނޫސްތަކުން ރިޕޯޓްކޮށްފިއެވެ.
ބުރާސްފަތި ދުވަހު ހެނދުނު ހިނގި މިހާދިސާގައި މަރުވެފައިވަނީ ދިލްރުކްސާ ސަމަރަސިންހެ ނަމަކަށް ކިޔާ ފުލުހެކެވެ. އޭނާއަކީ އަލަގަމާގެ ރައްޔިތެކެވެ.
ރައިފަލުން އޭނާ އަމިއްލަ ގަޔަށް ހަމަލާދިނީ ޓެމްޕްލް ޓްރީގެ ޗެކްޕޮއިންޓެއްގައި އިނދެ ކަމަށްވާއިރު އެ ވަގުތު ބޮޑުވަޒީރު ވެސް ގެކޮޅުގައި އުޅުއްވި ކަމަށް މީޑިއާ ރިޕޯޓްތައް ބުނެއެވެ.
މި ހާދިސާ ހިނގި ސަަބަބު އެނގިފައިނުވާއިރު މިއަދު އޮތް މަޖިލީހުގެ ޖަލްސާގައި މެމްބަރުންވަނީ އެވާހަކަ ނަންގަވާފައެެވެ.
ލަންކާގެ ދައުލަތުގެ އިސްވެރިންނާއި ރަސްމީ ދަތުރުފުޅުތަކުގައި އެގައުމަށް ޒިޔާރަތްކުރައްވާ އެހެން ގައުމުތަކުގެ އިސްފަރާތްތަކުގެ ސަލާމަތީ ކަންކަން ބަލަހައްޓަނީ އެސްޓީއެފްއެވެ.
