ދައުރުގެ ބޮޑު ބައެއް އޮއްވާ އަވަސް އިންތިޚާބަކަށް ބޮޑުވަޒީރު މޭ ބޭނުންފުޅުވީ ކީއްވެ؟

އިނގިރޭސި ވިލާތުގެ އާއްމު އިންތިޚާބު ތާވަލު ކުރެވިފައިވަނީ 2020 އަށެވެ. އެކަމަކު ކުރިއަށް އޮތް ހަ ހަފްތާގެ ތެރޭގައި އިންތިޚާބެއް ބޭއްވުމަށް އިނގިރޭސި ބޮޑުވަޒީރު ބޭނުންފުޅުވީ ކީއްވެ ހެއްޔެވެ؟ ވެރިކަމުގައި ހުންނެވީ އެކަމަނާއެވެ. ވެރިކަން ކުރަނީ އެކަމަނާގެ ޕާޓީންނެވެ. އަވަސް އިންތިޚާބެއް ބޭއްވުމަށް ބޭނުންފުޅުވާ ކަން އިއުލާން ކުރައްވާ އިނގިރޭސި ޕާލިމެންޓުގެ ރުހުން އަވަސް އިންތިޚާބަށް ހޯއްދެވުމަށް އެންމެ ބޮޑަށް ވަކާލާތު ކުރެއްވީވެސް އެކަމަނާއެވެ. މިހާރު ޕާލިމެންޓުގެ ރުހުން ލިބި، އިންތިޚާބަށް އިނގިރޭސި ވިލާތް ދަނީ ތައްޔާރުވަމުންނެވެ.

އިނގިރޭސި ވިލާތުގެ ސިޔާސީ މަސްރަހް ދިރާސާ ކުރާ ފަރާތްތަކުން ބުނާ ގޮތުގައި ބޮޑުވަޒީރު މޭ ގެ މި ނިންވެމުމުގެ ފަހަތުގައި މުހިންމު އެތައް ސަބަބެއް ވެއެވެ.

ފުރަތަމަ ކަމަކީ، އިނގިރޭސި ވިލާތުގައި ބޮޑުވަޒީރު ތެރެސާ މޭ އަށް ވުރެ މަގްބޫލު އެހެން ސިޔާސީ ލީޑަރެއް ނެތް ކަން ޚިޔާލު ހޯދުމުގެ ވޯޓުތަކުން ކަށަވަރުވުމެވެ. ފާއިތުވެ ދިޔަ މަސްތަކުގައި ނަގާފައިވާ ޚިޔާލު ހޯދުމުގެ ވޯޓުގައި ތަކުރާރުކޮށް ނިކުމެފައިވަނީ ހަމަ އެއް ނަތީޖާއެކެވެ. މާދަމާ އިންތިޚާބެއް ބާއްވައިފިނަމަ ކާމިޔާބުވާނީ މޭ ގެ ކޮންޒަވަޓިވް ޕާޓީއަށް ކަމަށް އިނގިރޭސި ރައްޔިތުން ވަނީ ބުނެފައެވެ. މޭގެ ޕާޓީއާ އެންމެ ވާދަވެރި ލޭބަރ ޕާޓީއަށް ބަލާއިރު އެތައް ތަނަކުން ކުރީގައި އުޅެނީ ކޮންޒަވެޓިވް ޕާޓީއެވެ. މިފަދަ ނަތީޖާތައް ސާފުކޮށް ފެންނަން އޮތް އިރު އެކަމަނާ އަވަސް އިންތިޚާބަކަށް ވަޑައިގެން ތާޒާ މެންޑޭޓެއް ރައްޔިތުންގެ އަތުން ހޯއްދަވަން ނޫޅުއްވަންވީ ކީއްވެ ހެއްޔެވެ؟

އަނެއް ސަބަބަކީ، އިނގިރޭސިވިލާތުގެ އިދިކޮޅު އެންމެ ބޮޑު ޕާޓީ ހީނަރުވަމުން ނިކަމެތި ވަމުން ދިއުމެވެ. ޚިޔާލު ހޯދުމުގެ ވޯޓަކީ ކޮންމެ ގޮތަކަށްވެސް ނަތީޖާ ނުކުމެދާނެ ވޯޓެކެވެ. އެކަމަކު ލޭބާ ޕާޓީއަށް އޮތް ތާއީދު ރެކޯޑު މިންވަރަކަށް އިނގިރޭސިވިލާތުގައި ވަނީ ދަށަށް ގޮސްފައެވެ. "ޔޫގަވް" ގެ ހޯދުންތަކުން އެނގޭ ގޮތުގައި ލޭބާ ޕާޓިއަށް އިނގިރޭސިވިލާތުގެ ހަތަރު މީހަކުން އެކެއްގެ މިންވަރަށްވެސް މިހާރު ތާއީދެއް ނެތެވެ. ގޯޑްން ބްރައުންއާއި ޓޯނީ ބްލެއަރގެ ލީޑަރޝިޕްގައި 10 އަހަރު ދުވަހު ވެރިކަން ކުރި ލޭބަރ ޕާޓީގެ ހާލަތު ދުވަހަކުވެސް ދަށަށް ނުދާ މިންވަރަކަށް ދަށަށް ގޮސްފައިވާކަން މޭ އަށް އެނގިވަޑައިގަންނަވައެވެ. ލޭބާ ޕާޓީގެ ލީޑަރު ޖެރެމީ ކޯބިންއަށް އޮތް އާއްމުންގެ ތާއީދު ވަރަށް ބޮޑަށް ކުޑައެވެ. ޔޫގަވް ސާވޭއިން ހާމަވާ ގޮތުގައި، އިނގިރޭސިވިލާތުގެ ބޮޑުވަޒީރު ކަމަށް ވަޑައިގަތުމަށް ޖެރެމީ ކޯބިން އަށް ތާއީދު ކުރަނީ އެންމެ 14 އިން ސައްތަ މީހުންނެވެ.

ދެން އޮތް ސަބަބަކީ، ތެރެސާ މޭ ވެރިކަމަށް ވަޑައިގަތީ އާއްމު އިންތިޚާބެއް ކާމިޔާބު ކުރައްވައިގެން ކަމުގައި ނުވުމެވެ. އިނގިރޭސި ވިލާތުން ވިލާތުގެ އިއްތިހާދުން ވަކި ވުމަށް ނެގި ވޯޓު އޭރު ހުންނެވި ކޮންޒަވެޓިވް ޕާޓީގެ ބޮޑުވަޒީރު ޑޭވިޑް ކެމަރަން އެދިވަޑައިގެންނެވި ގޮތައް ނަތީޖާ ނުނުކުތުމުން މަގާމުން އިސްތިއުފާދެއްވުމާ ގުޅިގެން ކޮންޒަވެޓިވް ޕާޓީގެ ލީޑަރޝިޕަށް އައި ބަދަލާއެކު މޭ އަށް ބޮޑުވަޒީރުކަން ލިބިވަޑައިގަތީއެވެ. އެކަމަނާ ބޭނުންފުޅު ނަމަ 2015 ވަނަ އަހަރު ބޭއްވި އިންތިޚާބުގައި ކޮންޒަވެޓިވް ޕާޓީއަށް ލިބުނު ކާމިޔާބާއެކު 2020 އާ ހަމައަށް ބޮޑުވަޒީރު ކަމުގައި ހުންނެވިދާނެއެވެ. އެކަމަކު ތެރެސާ މޭ އަކީ އަދި އިންތިޚާބެއްގައި ވާދަ ކުރެއްވި ބޭފުޅަކަށް ނުވާއިރު، އިނގިރޭސި ވިލާތުން ވިލާތުގެ އިއްތިހާދުން ވަކިވުމާ ގުޅޭ ގޮތުން ކުރަންޖެހޭ އެންމެހާ ކަންކަން ކުރެއްވުމުގެ ޒިންމާ މޭ ނަންގަވަން ޖެހިވަޑައިގަންނަވާ އިރު، ގައުމުގެ އުފެދިފައިވާ ބައިބައިވުންތައް ނައްތާލައްވާ އެކަތިގަނޑަކަށް ހެއްދެވުމަށް ކުރައްވަމުން ގެންދަވާ މަސައްކަތުގައި އެކަމަނާ އަށް އަމާޒުވާ އެންމެ ބޮޑު ފާޑު ކިޔުމަކީ ސީދާ އިންތިހާބަކުން ވެރިކަމަށް ވަޑައިގަނެފައި ނުވާތީ އެކަމަނާއަށް މުޅި އިނގިރޭސިވިލާތް ތަމްސީލު ނުކުރެއްވޭނެ ކަމަށް ބުނެ ކިޔާ ފާޑުތަކެވެ. އިންތިޚާބަށް ފަހު އެ ގޮތުން ކިޔާ ފާޑު ކިޔުންތަކަށް ނިމުމެއް އަންނާނެއެވެ.

މިއަހަރު އިންތިޚާބެއް ބާއްވައިފިނަމަ އިނގިރޭސިވިލާތުގައި ދެން އިންތިޚާބެއް ބާއްވަންޖެހޭނީ 2022 ގައެވެ. އިނގިރޭސިވިލާތުގައި އާންމު އިންތިޚާބު ބާއްވަން ޖެހެނީ ކޮންމެ ފަސް އަހަރަކުން އެއް އަހަރުއެވެ. މިހާރު އޮތް ގޮތުން 2020 ގައި އިންތިޚާބު އޮންނަ ނަމަ ގައުމަށް ދަތި ތަކާ ކުރިމަތިވާނެއެވެ. އެއީ ރަސްމީ ގޮތުން ވިލާތުގެ އިއްތިހާދުން އިނގިރޭސިވިލާތް މުޅިން ބޭރުވާނީ 2019 ގައި ކަމަށް ވުމާއެކު އެ ދުވަސް ވަރު އިންތިޚާބަކާ ކުރިމަތި ލުމަކީ އެންމެ ރަނގަޅު ގޮތް ކަމަކަށް ނުވާތީއެވެ. މިއަހަރު އިންތިޚާބެއް ބޭއްވުމުން ދެން އިންތިޚާބެއް އޮންނާނީ 2022 ގައި ކަމަށް ވުމާއެކު އިއްތިހާދުން ބޭރުވުމުގެ ކަންކަން މާ އޮމާން ކޮށް އޭރުން ގެންދެވޭނެ ކަމަށް ގަބޫލު ކުރެވެއެވެ.

ތެރެސާ މޭ ބޭނުންފުޅުވަނީ ޔުނައިޓެޑް ކިންގްޑަމް ޔުނައިޓެޑް ގައުމެއްގެ ގޮތުގައި އޮތުމަށެވެ. އެކަމަށް މިހާރު އޮތް އެންމެ ބޮޑު ގޮންޖެހުމަކީ ސްކޮޓްލޭންޑް އިނގިރޭސިވިލާތާ ވަކިވެ މިނިވަންކަން އިއުލާން ކުރުމަށް ކުރަމުންދާ މަސައްކަތެވެ. އިނގިރޭސި ޕާލިމެންޓުގެ ސްކޮޓްލޭންޑްގެ ގޮނޑިތައް ފުރަމުން ގެންދާ ސްކޮޓިޝް ނެޝަނަލް ޕާޓީއަށް އާއްމު އިންތިޚާބުގައި ނާކާމިޔާބު ވެއްޖެ ނަމަ ސްކޮޓްލެންޑް އިނގިރޭސިވިލާތުން ވަކިވުމަކަށް ކުރަމުންދާ މަސައްކަތައް ދަތިތަކެއް ކުރިމަތިވާނެއެވެ. ސްކޮޓްލޭންޑް އިނގިރޭސި ވިލާތުން ވަކިވުމަކީ މޭ ބޭނުންފުޅުވާ ކަމެއް ނޫނެވެ. އަވަސް އިންތިޚާބެއްގެ ތެރެއިން މޭ ޓެސްޓް ކުރައްވަން ބޭނުންފުޅުވާ އަނެއް ކަމަކީ މިއީ ކަމަށްވުން އެކަށީގެންވެއެވެ.

ކުރު ގޮތަކަށް ދަންނަވާނަމަ، ސިޔާސީ ގޮތުން ބޮޑުވަޒީރު މޭ އަށް ލިބިވަޑައިގެންފައިވާ ޔަގީންކަން، އަވަސް އިންތިޚާބެއްގެ ތެރެއިން ޓެސްޓް ކޮށްލަންވަން ބޭނުންފުޅުވަނީއެވެ. އެއާއެކު އެކަމަނާ އެދިވަޑައިގަންނަވާ ސިޔާސީ މިސްރާބައް އިނގިރޭސި ވިލާތް ގެންދަވަން އެތައް ތަނަކުން ފަސޭހަ ވެގެން ދާނެއަތީ، އަވަސް އިންތިޚާބެއް ބާއްވަވަން އެކަމަނާ ބޭނުންފުޅުވީއެވެ.

އިނގިރޭސިވިލާތުގެ އާއްމު އިންތިޚާބު އޮންނާނީ ޖޫން މަހުގެ ތެރޭގައެވެ.