ބަންގްލަދޭޝް މަޖިލިސް މެމްބަރެއް ގަޔަށް ބަޑިޖަހާ އަވާހަރަކޮށްލައިފި
ބަންގްލަދޭޝްގައި އަވަހާރަކޮށްލި މަޖިލިސް މެމްބަރު
ބަންގްލަދޭޝް މަޖިލިސް މެމްބަރެއް ކަމަށްވާ މަންޖުރުލް އިސްލާމް ގަޔަށް ބަޑިޖަހާ އަވަހާރަކޮށްލައިފި އެވެ.
ބަންގްލަދޭޝް ފުލުހުންނާ ހަވާލާދީ ބީބީސީން ބުނީ ސަރުކާރު ހިމެނޭ އަވާމީ ލީގް އަށް ނިސްބަތްވާ މަންޖުރުލް އަވަހާރަކޮށްލީ ތިން މީހުންވެގެން އެތައްފަހަރެއްގެ މަތިން ބަޑިޖަހާކަމަށެވެ.
މީގެ އިތުރުން ފުލުހުން ބުނީ ސައިކަލެއްގެ ދިޔަ މީހުން މަންޖުރުލް އަށް ހަމަލާދިނުމުން އޭނާ އަށް ފަރުވާދިނުމަށް ހޮސްޕިޓަލަށް ގެންދިޔަ ކަމަށާއި، އަވަހާރަވީ ހޮސްޕިޓަލުގައި ފަރުވާދެމުން ދަނިކޮށް ކަމަށެވެ.
މަންޖުރުލް އަވަހާރަކޮށްލުމާ އެކު ގައިބަންދާ ޑިސްޓްރިކްޓްގައި ދަނީ އެކަމާ ހިތްހަމަނުޖެހުން ފާޅުކޮށް އިހުތިޖާޖުކުރަމުންނެވެ.
މަންޖުރުލް ގެންދިޔަ ހޮސްޕިޓަލް ރަންގްޕޫރް މެޑިކަލް ކޮލެޖް ހޮސްޕިޓަލާ ހަވާލާދީ ބީބީސީން ބުނީ އޭނާ އަވާހަރަކޮށްލީ ފަސް ފަހަރު ބަޑިން ހަމަލާދިނުމަށް ފަހު ކަމަށެވެ. އެގޮތުން ހަމަލާދީފައިވަނީ ވަރަށް ކައިރިން ކަމަށް ލަފާކުރެވޭ ކަމަށް ވެސް ހޮސްޕިޓަލުން ވަނީ ބުނެފައެވެ.
މަންޖުރުލް އަކީ 2015 އަހަރުގެ އޮކްޓޫބަރު މަހު ސްކޫލް ކުއްޖަކަށް ބަޑިން ހަމަލާދިނުމުގެ ތުހުމަތުގައި ހައްޔަރުކުރެވުނު ބޭފުޅެކެވެ. އެހެން ނަމަވެސް ބެއިލްއެއްގެ ދަށުން އޭނާ ވަނީ މިނިވަންކޮށްފަ އެވެ.
