ބަންގަލަދޭޝްގެ އަލިފާނުގެ ހާދިސާ: ޓަވަރުގެ ވެރިޔާ ހައްޔަރުކޮށްފި
1 އެޕްރީލު 2019 | ހޯމަ 05:53މަރުވި މީހުންގެ އަދަދުވަނީ 26 އަށް އަރާފައި
އިމާރާތުގެ އެންމެ މަތީ ފަސް ފަންގިފިލާއަކީ ހުއްދަ ހޯދުމަކާ ނުލައި ގަވައިދާ ޚިލާފަށް އިތުރުކޮށްފައިވާ ބައެއް
ބަންގްލަދޭޝްގެ ވެރިރަށް ޑާކާގެ އުސް އިމާރާތެއްގައި ބުރާސްފަތި ދުވަހު ހިނގި އަލިފާނުގެ ހާދިސާގައި 26 މީހުން މަރުވެ 70 އަށް ވުރެ ގިނަ މީހުން ޒަޚަމްވި ހާދިސާ އަށް ފަހު ހާދިސާ ހިނގި ޓަވަރުގެ ވެރިފަރާތް ހައްޔަރުކޮށްފިއެވެ.
އެސިސްޓެންޓް ކޮމިޝަނަރ އޮފް ޕޮލިސް އަބްދުލް ބާޓެން އާދީއްތަ ދުވަހު ރިޕޯޓަރުންނަށް ވިދާޅުވީ ގައުމީ ބިލްޑިންގ ކޯޑާއި ޚިލާފްވުމާ އިހުމާލުވުމުގެ މައްސަލައިގައި އެސް.އެމް.އެޗް.އައި ފާރޫޤީ އަދި ތަސްވީރުލް އިސްލާމް ހައްޔަރުކޮށްފައިވާ ކަމަށެވެ.
ތަސްވީރުލް އިސްލާމްއަކީ ބަންގްލަދޭޝްގެ އިދިކޮޅު ބަންގްދޭޝް ނޭޝަނަލް ޕާޓީގެ ޑާކާގެ ޑިސްޓްރިކްޓް ލީޑަރެކެވެ.
މީގެ އިތުރުން ވެސް އިމާރާތުގެ އިތުރު ހިއްސާދާރުން ތިބޭ އިރު ފުލުހުން މިހާރު ހޯދަމުންދަނީ 1990ގެ ތެރޭގައި އަޅާފައިވާ އެފްއާރު ޓަވަރު އިމާރާތްކުރި ކޮންސްޓްރަކްޝަން ކުންފުނީގެ ވެރިޔާއެވެ.
ޑާކާ ސިޓީގެ ހައުސިންގ އޮތޯރިޓީން ބުނީ އިމާރާތުގެ އެންމެ މަތީ ފަސް ފަންގިފިލާއަކީ ހުއްދަ ހޯދުމަކާ ނުލައި ގަވައިދާ ޚިލާފަށް އިތުރުކޮށްފައިވާ ބައެއް ކަމަށެވެ.
އިމާރާތުގައި ރޯވި އަލިފާނުން ސަލާމަތްވުމަށް ބައެއް ކުޑަ ދޮރުތަކުން ބޭރަށް ފުންމާލި މީހުންގެ ތެރޭން ހަ މީހަކު ވަނީ މަރުވެފައެވެ. މަންޒަރު ދުށް ފަރާތްތަކުން ބުނެފައި ވަނީ އެއްބައި މީހުން އިމާރާތުގެ އަރިމަތީ ހުރި ހޮޅިތަކާއި ކޭބަލްތަކުން ފައިބައިގެން ވެސް ސަލާމަތް ވާން މަސައްކަތް ކުރި ކަމަށެވެ.
