ކެނެޑާގެ ކުބެކް ސިޓީގެ މިސްކިތެއްގައި އާދީއްތަ ދުވަހުގެ ރޭ ހިނގި ބަޑިޖެހުމުގެ ހާދިސާއާ ގުޅިގެން 27 އަހަރުގެ މީހެއްގެ މައްޗަށް ގަސްދުގައި މީހަކު މެރިކަމުގެ ތުހުމަތުގައި ހަ ދައުވާއެއް އުފުލައިފިއެވެ.

މި ހާދިސާ ކެނެޑާގެ ބޮޑު ވަޒީރު ސިފަކޮށްފައިވަނީ ޓެރަރިޒަމްގެ އަމަލެއްގެ ގޮތުގައެވެ. އުމުރުން 27 އަހަރުގެ އެލެކްޒެންޑްރޭ ބިސޮނެޓްގެ މައްޗަށް ގަސްދުގައި މީހަކު މެރިކަމުގެ ތުހުމަތުގައި ހަ ދައުވާއެއް އުފުލާފައިވާ އިރު ބަޑި ޖެހުމުގެ ހާދިސާގައި ހަ މީހަކު މަރުވެ އަށް މީހަކު ޒަޚަމްވިއެވެ.

މަންޒުރުދުށް މީހަކާ ހަވާލާދީ ރޮއިޓާސްގައި ރިޕޯޓުކޮށްފައިވަނީ ބަޑި ހިފައިގެން ހުރި ތިން މީހަކު ކުބެކް ސިޓީގެ "ކުބެކް ސިޓީ އިސްލާމިކް ސެންޓާރ" މިސްކިތުގައި 40 ވަަރަކަށް މީހުން ތިއްބާ ވަދެ ބަޑި ޖަހާފައިވާ ކަމަށެވެ.

ހާދިސާއާ ގުޅިގެން މިސްކިތުގެ "ރައީސް" މުހައްމަދު ޔަންގުނީ ވިދާޅުވެފައި ވަނީ މިއީ ވަރަށް އަނިޔާވެރި އަމަލެއް ކަމަށެވެ. އަދި އޭނާ ވަނީ މިކަން ހިނގީ ކީއްވެތޯ ސުވާލު އުފައްދަވާފައެވެ.

ރިޕޯޓުތައް ބުނާ ގޮތުން މިފަހުގެ އަހަރުތަކުގައި ކުބެކް ސިޓީގައި އިސްލާމް ދީނަށް ނަފްރަތު އުފެދުން ވަނީ އިތުރުވާން ފަށާފައެވެ.