ސިނާއީގައި މިސްރުގެ ސަލާމަތީ ބާރުތަކުން 16 ހަނގުރާމަވެރިއަކު މަރާލައިފި

މިސްރުގެ ސަލާމަތީ ބާރުތަކުން، އެ ގައުމުގެ ސިނާއީ ޕެނިންސިއުލާގައި ހަރަކާތްތެރިވާ 16 ހަނގުރާމަވެރިއަކު މަރާލައިފި ކަމަށް އެ ގައުމުގެ ދައުލަތުގެ މީޑީއާއިން ރިޕޯޓްކޮށްފިއެވެ.

ސިނާއީގައި ހަނގުރާމަވެރިންތައް މަރާލާފައި މިވަނީ މިސްރުގެ ވެރިރަށް ގާހިރާގައި ބޮމެއް ގޮއްވާލުމުގެ ސަބަބުން ތިން ފުލުހަކު މަރީލިތާ 24 ގަޑި އިރުވެސް ނުވަނީހެވެ. އެ ގައުމުގެ އިންޓީރިއަރ މިނިސްޓްރީއިން ނެރުނު ބަޔާނެއްގައި ބުނެފައިވަނީ، ސިނާއީގައި މަރާލީ މިސްރުގެ ބައެއް ތަންތަނަށް ހަމަލާ ދޭން ރާވަމުން ދިޔަ ޓެރަރިސްޓުންތަކެއް ކަމަށެވެ.

ހަނގުރާމަވެރިންގެ ތެރެއިން 10 މީހަކު މަރާލާފައި ވަނީ، އުބައިދާ ޑިސްޓްރިކްޓްގައެވެ. ދެން ތިބި ހަ ހަނގުރާމަވެރިން މަރާލާފައި ވަނީ އަބޫ އެއިތާ ޑިސްޓްރިކްޓްގައެވެ. މީގެ ތެރެއިން އަބޫ އެއިތާއިން މަރާލި ހަނގުރާމަވެރިންގެ އަތުން ގިނަ އަދަދެއްގެ ހަތިޔާރާއި ގޮވާ ޒާތުގެ ތަކެތި ފެނިފައިވާ ކަމަށް އަލް އަހްރާމް ނޫސް އެޖެންސީއިން ވަނީ ބުނެފައެވެ. އަދި ސިފައިންނާއި ހަނގުރާމަވެރިންނާއި ދެމެދު ހަމަލާ ބަދަލުކުރެވިފައިވާ ކަމަށް ވެސް އަލް އަހްރާމް ނޫހުން ވަނީ ބުނެފައެވެ.

ސިނާއީ ޕެނިންސުލާގައި 2013ވަނަ އަހަރުން ފެށިގެން އައިސިސްއާއި ގުޅުން ހުރި މިސްރުގެ ހަނގުރާމަވެރިން ދަނީ ހަރަކާތްތެރި ވަމުންނެވެ. ސިނާއީގައި ހަރަކާތްތެރިވާ ހަނގުރާމަވެރިންނާއި ދެކޮޅަށް މިސްރުގެ ސަލާމަތީ ބާރުތަކުން ވަނީ "އޮޕަރޭޝަން ސިނާއީ"ގެ ނަމުގައި ވަނީ 2018ވަނަ އަހަރު ވަރުގަދަ ހަރަކާތެއް ފަށާފައެވެ. އަދި މި އޮފަރޭޝަންގައި ގިނަ އަދަދެއްގެ ހަނގުރާމަވެރިން މިހާރު މަރާލެވިފައިވާ ކަމަށް ވެސް މިސްރުގެ ސަރުކާރުން ވަނީ ބުނެފައެވެ.