މިސްރުގެ ސަލާމަތީ ފައުޖުތަކުގެ 50 އަށް ވުރެ ގިނަ މީހުން މަރާލައިފި

މިސްރުގެ ހުޅަނގުގެ ހަނަފަސް ސަހަރާގައި ހަނގުރާމަވެރިން ދިން ހަމަލާތަކުގައި އެގައުމުގެ ސަލާމަތީ ފައުޖުތަކުގެ 50 އަށްވުރެ ގިނަ މީހުން މަރާލައިފި އެވެ.

މިސްރުގެ ދާޚިލީ ވުޒާރާ އިން ވަނީ، ވެރިރަށް ގާހިރާގެ ހުޅަނގުދެކުނުގައި އޮންނަ ބަހާރިޔާގެ ވާދީގައި ހަރަކާތްތެރިވާ ހަނގުރާމަވެރިންނާ ދެކޮޅަށް ހިންގި އޮޕަރޭޝަނެއްގައި ހަރަކާތްތެރިވި އެޤައުމުގެ އަސްކަރިއްޔާގެ ސިފައިންނާއި ފުލުހުންގެ ގާފިލާއަކަށް އަމާޒުކޮށް ހަނގުރާމަވެރިން ދިން ހަމަލާތަކުގައި 50 އަށްވުރެ ގިނަ މީހުން މަރުވެފައިވާކަން ކަށަވަރު ކޮށްދީފައެވެ.

މިސްރުގެ ހަނގުރާމަވެރި ޖަމާއަތްތައް ނައްތާލުމަށް އެޤައުމުގެ ސަލާމަތީ ފައުޖުތަކުން ފަށާފައިވާ އޮޕަރޭޝަންގެ ސަބަބުން ހަނގުރާމަވެރިންގެ ގިނަ ހަމަލާތަކެއް ސަލާމަތީ ފައުޖުތަކަށް ވަނީ އަމާޒުވެފައެވެ. މިހަމަލާގައި އެކަނިވެސް ސަލާމަތީ ބާރުތަކަށް ނިސްބަތްވާ 53 މީހަކު މަރުވެފައިވާ ކަމަށް ބީބީސީގެ މަސްދަރުތަކާ ހަވާލާދީ، ރިޕޯޓްކޮށްފައި ވެއެވެ.

މީގެ އިތުރުން، މިކުރިމަތިލުންތަކުގައި މިސްރުގެ ހައްދުފަހަނައަޅާފައިވާ ހަނގުރާމަވެރި ޖަމާއަތެއް ކަމަށްވާ ހަސްމަށް ނިސްބަތްވާ 15 ހަނގުރާމަވެރިޔަކު މަރާލާފައިވާ ކަމަށް ޚަބަރު ލިބެއެވެ.

ހަސްމު ޖަމާއަތަކީ މިސްރުގައި ކުރިން ވެރިކަން ކުރި މުސްލިމް ބްރަދަހުޑްގެ ހަތިޔާރު އެޅި ގޮފީގެ ގޮތުގައި މިސްރުގެ ސަލާމަތީ ބާރުތަކުން ތުހުމަތު ކުރެއެވެ. އެހެންނަމަވެސް އެ ތުހުމަތުތަކަށް ހަސްމުން ދެކޮޅު ހަދަ އެވެ. ހަސްމު ޖަމާއަތަކީ، ފާއިތުވި އަހަރުތަކުގައި މިސްރުގައި އާއްމުވެފައިވާ ހަނގުރާމެރި ހަމަލާތަކުގެ ފަހަތުގައިވާ ހަނގުރާމެރި ޖަމާއަތްތަކުގެ ތެރެއިން އެއް ޖަމާއަތެވެ.

މިސްރުގެ ސަލާމަތީ ފައުޖުތަކުން ސަހަރާގެ އޮޕަރޭޝަނަށް ނިކުމެފައިވަނީ، ބަހާރިޔާގެ ވާދީގައި ހަނގުރާމަވެރިންތަކެއް ފިލައިގެން އުޅޭ ކަމުގެ މައުލޫމާތު ލިބުމާ ގުޅިގެން ކަމަށް ރިޕޯޓްތައް ބުނެއެވެ.

އެހެންނަމަވެސް، މިސްރުގެ ސަލާމަތީ އޮފިޝަލަކާ ހަވާލާދީ މީޑިއާ ރިޕޯޓްތައް ބުނާ ގޮތުން، ސަލާމަތީ ފައުޖުތަކުގެ އޮފިސަރުން މަރުވެފައި ވަނީ، ހަނގުރާމަވެރިންނާއެކު ހިނގި ކުރިމަތިލުންތަކުގެ ތެރޭގައި ނޫން ކަމަށާއި، ސަލާމަތީ ފައުޖުތަކަށް ހަނގުރާމަވެރިން ހަމަލާދީފައި ވަނީ ރޮކެޓްގެ އެހީގައި ފޮނުވާ ގްރެނޭޑާއި، ގޮވާތަކެތި ބޭނުން ކޮށްގެން ކަމަށެވެ.

އަދި މިހަމަލާގައި ސަލާމަތީ ފައުޖުތަކަށް ގެއްލުންވެފައި ވަނީ، ހަނަފަސް ސަހަރާގެ އެ ސަރަހައްދަށް ސަލާމަތީ ފައުޖުތަކަށް ވުރެ ބޮޑަށް ހަނގުރާމަވެރިން ފަރިތަވުމުން ކަމަށް ރިޕޯޓްތައް ބުނެއެވެ. އަދި ސަހަރާގެ ތެރޭގައި މުއާސަލާތު ކުރުމުގައި ހުރި ގޮންޖެހުންތަކުގެ ސަބަބުން އެއްގަމާއި ވައިގެ މަގުން އިތުރު ފައުޖުތަކުގެ އެހީތެރިކަމަށް އެދުމުގައި ކޮމާންޑިންގ އޮފިސަރު ނުކުޅެދިފައިވާ ކަމަށް ޚަބަރު ލިބެއެވެ.