ރެޑްސީގެ ދެ ރަށެއް ސައުދީ  އަރަބިއްޔާއަށް ދިނުމަށް ނިންމާފައިވާ ނިންމުމަކީ ބާތިލް ނިންމުމެއްކަމަށް މިސްރުގެ ދަށުކޯޓަކުން ނިންމާފައިވާ ނިންމުމަށް އެގައުމުގެ އިދާރީކަންކަމުގައި ގޮތް ނިންމާ އެންމެ މަތީ ކޯޓުން ހޯމަ ދުވަހު ތާއީދުކޮށްފިއެވެ.

ސައުދީ އަރަބިއްޔާއަށް މިސްރުގެ ދެ ރަށެއް ވިއްކުމަށް އެގައުމުގެ ސަރުކާރުން ނިންމި ނިންމުމާ ދެކޮޅަށް އެގައުމުގައި މުޒާހަރާތައް ފަށާފައިވެއެވެ.

ރައީސް އަބްދުލް ފައްތާހުގެ ސަރުކާރުން ހެދި  ބޯރޑާ ޑިމާކޭޝަން އެއްބަސްވުމަކީ ގާނޫނާޚިލާފް އެއްބަސްވުމެއްކަމަށް ދަށުކޯޓުން ނިންމާފައިވަނީ ޖޫންމަހުއެވެ.

ހައި އެޑްމިނިސްޓްރޭޓިވް ކޯޓުން ނިންމި ނިންމުމުގައި ބުނީ މިސްރުގެ ދެ ރަށް ކަމަށްވާ ޓިރާން އާއި ސަނަފީރް އަކީ މިސްރުގެ ސަރަހައްދުގައިވާ އެގައުމުގެ އިހްތިސާސްގައި ހިމެނޭތަނެއްކަމަށް އިއްތިފާގުން ނިންމި ކަމަށެވެ.

ފަނޑިޔާރު ހުކުމް އިއްވުމާއެކު ވަކީލުންނާއި އެކްޓިވިސްޓުންވަނީ "މިއީ މިސްރުގެ ރައްތަކެއް" ކަމަށްބުނެ އުފަލުން ހަޅޭއްލަވައިގެންފައެވެ.

ކޯޓުގެ ނިންމުން އައިސްފައި މިވަނީ އެ އެއްބަސްވުމާ ގުޅޭގޮތުން ގާނޫނުހަދާ މަޖިލީހުގެ ވޯޓަކަށް ހުށަހަޅާފައިވަނިކޮށެވެ.

މި ނިންމުމަކީ މިސްރާއި ސައުދީއާ ދެމެދު އޮންނަ ގުޅުމަށް އިތުރަަށް ބުރޫއަރާފާނެ ކަމެކެވެ.

މިސްރުގެ ފުރަތަމަ ޑިމޮކްރެޓިކް ރައީސްގެ ވެރިކަން 2013 ވަނަ އަހަރު ވައްޓާލުމަށްފަހު އޭރުގެ އަސްކަރިއްޠާގެ ވެރިޔާ އަދި މިހާރުގެ ރައީސް ސީސީގެ ސަރުކާރަށް މާލީގޮތުން އެންމެ ބޮޑު އެހީއެއްދޭ ގައުމަކީ ސައުދީ އަރަބިއްޔާއެވެ.