އޮޅިގެން ދެވުނު ހަމަލާއެއްގައި އަފްޣާނިސްތާނުގެ ސަލާމަތީ ބާރުތަކުގެ 10 މީހަކު މަރުވެއްޖެ
10 މީހަކު މަރުވެ، 9 މީހަކު ޒަޚަމްވެފައިވޭ
ހެލްމަންޑް ޕްރޮވިންސްގައި އަފްޣާނިސްތާނުގެ ފައުޖުތަކަކަަށް އެމެރިކާ ސިފައިން ތަމްރީން ދެނީ
ތާލިބާން ހަނގުރާމަވެރިންނަށް އަމާޒުކޮށް އަފްޣާނިސްތާނުގެ އަސްކަރިއްޔާ އިން ދިން ވައިގެ ހަމަލައެއްގައި އަފްޣާނިސްތާނުގެ ސަލާމަތީ ބާރުތަކުގެ 10 މީހަކު މަރުވެއްޖެ އެވެ.
އަފްޣާނިސްތާނުގެ ހެލްމަންޑް ޕްރޮވިންސްގެ ގެރޭޝް ޑިސްޓްރިކްޓްގައި 'އޮޅިގެން' ދިން ވައިގެ ހަމަލާގައި އަފްޣާން ފުލުހުންގެ 10 މީހަކު މަރުވެ، 9 މީހަކު ޒަޚަމްވެފައިވާ ކަމަށް ހެލްމަންޑްގެ ގަވަރނަރ ހަޔާތުﷲ ހަޔަތު އޭއެފްޕީ އަށް ކަށަވަރުކޮށް ދީފައިވެ އެވެ. އަފްޣާންގެ ދިފާޢީ ވުޒާރާއިންވެސް މިހަމަލާ ކަށަވަރުކޮށްދީފައިވެ އެވެ.
ހަޔަތު އާއި ހަވާލާދީ އޭއެފްޕީން ބުނީ، މިހާދިސާ ހިނގާފައިވަނީ ހެލްމަންޑްގައި ތާލިބާނުން ފައްސާލުމަށް ހިންގަމުންދާ އޮޕަރޭޝަނުގެ ތެރޭގައި ކަމަށެވެ. ހެލްމަންޑްގެ ގެރޭޝް ޑިސްޓްރިކްޓްގައި ބޮޑެތި ކުރިމަތިލުންތައް ހިނގަމުންދާތާ ދުވަސްކޮޅެއް ވަނީ ވެފައެވެ.
ތާލިބާން ހަނގުރާމަވެރިންގެ ބާރުގަދަ ގެރޭޝް ޑިސްޓްރިކްޓްގައި މީގެ ދެމަސް ކުރިން އެމެރިކާގެ ވައިގެ ހަމަލާއެއްގައިވެސް އަފްޣާން ފުލުހުންގެ 16 މީހަކު މަރުވެ، 2 މީހަކު ޒަޚަމްވެފައިވެއެވެ.
މަސްތުވުމަށް ބޭނުން ކުރާ އަފިހުން ހެއްދުމުގައި މަޝްޙޫރު ހެލްމަންޑް ޕްރޮވިންސްގެ ބޮޑު ބައެއް ކޮންޓްރޯލް ކުރަނީ ތާލިބާނުންނެވެ. ތާލިބާން ހަނގުރާމަވެރިން ހަތިޔާރު ހޯދުމަށް، ބަރޯސާވާ އާމްދަނީގެ އެންމެ ބޮޑު ވަޞީލަތަކީ ހެލްމަންޑްގެ އަފިހުން ދަނޑުތަކެވެ.
