އިތުބާރު ނެތްކަމުގެ ވޯޓަކަށް ކްލަބްތަކުން އެދޭ ނަމަ އެ ފުރުސަތު ކްލަބްތަކަށް ދޭންޖެހޭ ކަމަށް، ވަގުތީ ގޮތުން ޔޫތު މިނިސްޓްރީއާ ހަވާލުވެ ހުންނެވި ޓުއަރިޒަމް މިނިސްޓަރ އަލީ ވަހީދު ވިދާޅުވިއެވެ. 

ނޫސްވެރިންނަށް މައުލޫމާތު ދެއްވަމުން އަލީ ވަހީދު ވިދާޅުވީ، އެފްއޭއެމްގެ މެނޭޖްމެންޓަށް ކްލަބުތަކުން އިތުބާރު ނުކުރާކަން ހާމަވެފައިވާއިރު، ކްލަބުތަކުން އެދިފައިވާ ގޮތުގެ މަތިން "ނޯ ކޮންފިޑެންސް" ވޯޓެއް ނަގައި އަލުން އިތުބާރު ހޯދަން މަސައްކަތް ކުރަން ޖެހޭ ކަމަށެވެ.  

އަލީ ވަހީދު ވިދާޅުވީ މިވަގުތު އެންމެ ބޮޑު ހިޔާލު ތަފާތުވުންތަކަކާއި ހަމަނުޖެހުންތަކެއް އުފެދިގެން އުޅެނީ ދިވެހި ފުޓުބޯޅައިގައި ކަމަށެވެ.

އެފްއޭއެމުން ނިއުރޭޑިއަންޓް ސްޕޯރޓްސް ކްލަބް ސަސްޕެންޑް ކުރުން އެއީ އެންމެ އިންސާފުވެރިކޮށް އަޅާފައިވާ ފިޔަވަޅެއް ކަމުގައި ގަބޫނުކުރައްވާ ކަމަށް ވެސް މިނިސްޓަރ ވިދާޅުވިއެވެ. އަދި އެކަން ބަލައި ނުގަންނާނެ ކަމަށް ވެސް މިނިސްޓަރ ވިދާޅުވިއެވެ.

" އިތުބާރު ނެއްކަމުގެ ވޯޓަކައި ގުޅިގެން ބަޔަކު މީހުން ސަސްޕެންޑްކޮށް މި ފަސްގަނޑުގަ އަދުލުއިންސާފުން ބޭރުކަށް ނުކުރެވޭނެ. ފީފާގެ އުސޫލްތަކަކު ވެސް ނޯއްނާނެ. ފެއާލީ އެއާ ފޭސް ކުރައްވަން ޖެހޭނެ. އަޅުގަނޑުގެ އިތުބާރު ނެތްކަން މާދަަމާ ނަގަން މަޖިލީހަށް ލީމަ، ރައްޔިތުން މަޖިލީހުގެ ހުރިހާ މެމްބަރުން ހައްޔަރު ކުރަން އަޅުގަނޑުމެން ގޮސްގެން ނުވާނެ. އެ ޕްރިސިޑެންޓާ ދެކޮޅަށް އަޅުގަނޑުމެންގެ ހަޔާތުގެ މިދިޔަ ތިން އަހަރު މިހޭދަކުރީ،" އަލީ ވަހީދު ވިދާޅުވިއެވެ. 

މިނިސްޓަރު ވިދާޅުވީ ކުޅިވަރުގެ ކަންކަން ނިންމުމުގައި ވެސް ޤާނޫނާއި ގަވާއިދުގެ ތެރެއިން ކަންކަން ނިންމުން މުހިއްމު ކަމަށެވެ.

ދިވެހި ފުޓުބޯޅައިގައި ހިމެނޭ ކްލަބްތަކަކީ ގިނަ ބައެއްގެ މިންނެތް މަސައްކަތުން ކޮޅަށް ޖަހާފައިވާ ކްލަބްތަކެއް ކަމަށާއި، އެ ކްލަބުތަށް މިވަގުތު އޮތީ ވަރަށް ހާލުގައި ކަމަށެވެ. 

މިނިސްޓަރުގެ ވާހަކަފުޅުގައި ތަކުރާރުކޮށް ވިދާޅުވެފައި ވަނީ ކުޅިވަރު އެސޯސިއޭޝަންތަކުގެ މައްސަލަތަކުގެ ތެރެއަށް ސަރުކާރުން ނުވަންނާނެ ކަމަށާއި، އޭގެ ބަދަލުގައި ސަރުކާރުގެ ޒިންމާއަކީ ޤާނޫނުތަކާއި ގަވާއިދުތަކާއި އެއްގޮތްވާ ގޮތުގެ މަތިން އެސޯސިއޭޝަންތައް ހިނގަމުންދޭތޯ ބެލުން ކަމަށެވެ. 

މިއަދުގެ ވަގުތެއްގައި އެފްއޭއެމް އާއި އަދި ކްލަބްތަކާ ބައްދަލު ކުރެއްވި ކަމަށާއި، ނިއު ރޭޑިއަންޑްގެ ސަސްޕެންޝަން އުވާލުމަށް މަސައްކަތް ކޮށްދިނުމަށް އެފްއޭއެމްގައި އެދިވަޑައިގެންނެވި ކަމަށް ވެސް މިނިސްޓަރު ވިދާޅުވިއެވެ.