ސަރުކާރު ހުޅުވަން އެއްބަސްވުމަކަށް އާދެވިއްޖެ: ޓްރަމްޕް

އެމެރިކާގެ ސަރުކާރު ހިންގުން ހުއްޓުވާލާފައި އޮތް އޮތުން ނިމުމަކަށް ގެނެސް، ފެބްރުއަރީ 15 ވަންދެން ސަރުކާރު ހުޅުވަން އެއްބަސްވުމަކަށް އާދެވިއްޖެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ހުކުރު ދުވަހު ވައިޓް ހައުސް ބޭރުގައި ވާހަކަދައްކަވަމުން ޓްރަމްޕް ވިދާޅުވީ، ތިން ހަފުތާގެ މުއްދަތަށް ސަރުކާރު ހުޅުވަން އެއްބަސްވުމަކަށް އާދެވިއްޖެ ކަމަށެވެ. އަދި ޑިމޮކްރަޓުންނާއި ރިޕަބްލިކަން ޕާޓީގެ މެމްބަރުން ހިމެނޭ ގޮތަށް ބޯޑަރުގެ ސަލާމަތީ ކަންކަމާއި ބެހޭގޮތުން މަޝްވަރާކުރައްވަން ބައްދަލުކުރައްވާނެ ކަމަށް ވެސް ޓްރަމްޕް ވިދާޅުވިއެވެ.

ޓްރަމްޕް ސަރުކާރު ހުއްޓުވާލާފައި އޮތީ މެކްސިކޯ އާއި އެމެރިކާގެ ސަރަހައްދީ އިމުގައި ގާއިމުކުރަން ބޭނުންފުޅުވެލައްވާ ފާރުގެ ހަރަދު ކަމުގައިވާ 5.7 ބިލިއަން ޑޮލަރު ބަޖެޓުގައި ނުހިމަނައިގެންނެވެ. މީގެ ކުރިން ޓްރަމްޕް ވަނީ ބަޖެޓުގައި އެ ފައިސާ ހިމެނެންދެން ގޮތްދޫނުކުރައްވައި ހުންނަވާނެ ކަމުގެ އިންޒާރު ދެއްވާފައެވެ.

ކުރިން މެކްސިކޯ އާއި އެމެރިކާގެ ސަރަހައްދީ އިމުގައި އެއްކޮޅުން އަނެއްކޮޅަށް ފާރެއް ރާނަން ޖެހޭ ކަމަށް ވަކާލާތުކުރެއްވި ޓްރަމްޕް، ހުކުރު ދުވަހު ނޫސްވެރިންނާ ވާހަކަދައްކަވަމުން ވިދާޅުވީ މުޅި އިމުގައި ފާރެއް ރޭނުމަކަށް އެއްވެސް އިރަކު އެދިފައި ނުވާނެ ކަމަށެވެ.

އެދިފައި ވާނީ ބޯޑަރުގެ ސަލާމަތީ ކަންކަން ބަލަހައްޓާ ފަރާތްތަކުން އެއްމެ ނުރައްކާތެރި ކަމަށް ކަނޑައަޅާފައިވާ ހިސާބުތަކުގައި އެކަނިކަމަށް ވެސް ޓްރަމްޕް ވިދާޅުވިއެވެ. ޓްރަމްޕް ވަނީ ބައެއް ސަރަހައްދުތަކުގައި ހުރި ގުދުރަތީ ބިނާތަކުގެ ސަބަބުން އެ ސަރަހައްދުތަކުގައި ފާރެއް އެޅުން މުހިންމު ނޫންކަމަށް ވިދާޅުވެފައެވެ.

އެމެރިކާގެ ތާރީހުގައި ވެސް އެއްމެ ގިނަ ދުވަސް ވަންދެން ދިގުދެމިގެން ދިޔަ ސަރުކާރު ހުއްޓުވުން ނިމުމަކަށް ގެނެސްފައި ވަނީ، އެ ކަމުގެ ނޭދެވޭ އަސަރު އެ ގައުމުގެ އިގްތިސާދަށް ވެސް ކުރަން ފަށާފައިވާ ދަނޑިވަޅެއްގައެވެ. އެގޮތުން އެ ގައުމުގެ އެއަރޕޯޓުތަކުގައި މަސައްކަތް ކުރާ މުވައްޒިފުންނަށް މުސާރަ ނުލިބިގެން ވަޒީފާއަށް ނުނިކުތުމުގެ ސަބަބުން ބައެއް ފްލައިޓްތައް ކެންސަލް ކޮށްފައި ވެއެވެ.