ޓެކްސީގައި މީޓަރު ހަރުކުރަން ނިންމައިފި
މީޓަރު ޓެކްސީގެ އަގާއި އެކަން ތައާރަފްކުރާނެ ދުވަހެއް އިއުލާނެއް ނުކުރޭ
މާލޭގައި ޚިދުމަތްދޭ ޓެކްސީއެއް
ޓެކްސީތަކުގައި މީޓަރު ހަކުރަންޖެހޭ ގޮތަށް ޓްރާންސްޕޯޓް މިނިސްޓްރީން ނިންމައިފިއެވެ.
ޓްރާންސްޕޯޓް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު އައިޝަތު ނަހުލާ ވިދާޅުވީ މީޓަރު ޓެކްސީ ރާއްޖެއަށް ތައާރަފްކުރަން ނިންމީ އެއީ ރައްޔިތުން އެދޭ ކަމަކަށް ވާތީ ކަމަށެވެ. މި ސަރުކާރަކީ ރައްޔިތުންގެ ޚިޔާލާއި، ރައްޔިތުން ބޭނުންވާ ކަންތައް ބެލުމަށް ފަހު ގޮތް ނިންމާ ސަރުކާރެއް ކަމަށާއި، މީޓަރު ޓެކްސީގެ ހިދްމަތް ރާއްޖެއަށް ތައާރަފްކުރަން ސަރުކާރުން ނިންމީ ވެސް އެ ކަމަށް ރިއާޔަތް ކުރުމަށް ފަހުގައި ކަމަށް މިނިސްޓަރ ވިދާޅުވިއެވެ.
ޓެކްސީގެ އަގުތައް ކަނޑައެޅުމަށް ޖެނުއަރީ 8 ވަނަ ދުވަހު ދަރުބާރުގޭގައި ބޭއްވި ފޯރަމްގައި ވެސް ގިނަ އާންމުން ވަނީ މީޓަރު ޓެކްސީ ތައާރަފް ކުރުމަށް އެދިފައެވެ. ބްރިޖް މަތިން ޓެކްސީ ދަތުރުތަކުގެ އަގު ބޮޑުވެ ރައްޔިތުން ދަނީ އެކަމާ ޝަކުވާ ކުރަމުންނެވެ.
މިނިސްޓަރ ވިދާޅުވީ ޓެކްސީތަކުގައި މީޓަރު ހަރުކުރިއަސް މިހާރު މާލޭގައި ޓެކްސީ ދަތުރުތަކަށް ނަގަމުން އަންނަ އަގަށް ވުރެ އަގު ބޮޑުނުވާނެ ކަމަށެވެ. އަގެއް ކަނޑައަޅާނީ އާއްމުންނާއި ޑްރައިވަރުންނަށް ވެސް ދަތިނުވާނެ ގޮތަކަށް ކަމަށް ވިދާޅުވިއެވެ.
"އެއް ބަޔަކަށް މޮޅުވެފައި އަނެއް ބަޔަކަށް ދެރަ ލިބޭ ގޮތަށް ނޫން ބަދަލު ގެންނާނީ. ދެ ފަރާތަށް ވެސް އެކަށީގެންވާ ގޮތަށް ނިންމާނީ،" މިނިސްޓަރު ވިދާޅުވިއެވެ.
މީޓާ ޓެކްސީ ތައާރަފް ކުރަން ނިންމާފައިވީ ނަމަވެސް އޭގެ އަގުތަކާއި އުސޫލުތައް މިއަދު އާންމުކޮށްފައެއް ނުވެއެވެ. އަދި ކުރާނެ ތާރީހެއް ވެސް ނިންމާފައި ނުވާ ކަމަށާއި ވަރަށް އަވަހަށް ޓައިމްލައިނެއް މިނިސްޓްރީން އެކުލަވާލާނެ ކަމަށް މިނިސްޓަރު ވިދާޅުވިއެވެ.
