މިހާރު ހިނގަމުންދާ ރައްޔިތުންގެ މަޖިލީހުގެ ނަޒާހަތްތެރިކަން އިންތިހާއަށް އޮތީ ގެއްލިފައި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މާފަންނު ހުޅަނގު ދާއިރާގެ އެމްޑީޕީ ޕްރައިމަރީއަށް ވާދަކުރައްވާ، މިހާރު ވެސް އެ ދާއިރާގެ މެމްބަރު މުހައްމަދު ފަލާހުގެ ކެމްޕޭން އިފްތިތާހުކުރުމަށް ހޮނިހިރު ދުވަހުގެ ރޭ ބޭއްވި ހަފުލާގައި ނަޝީދު ވިދާޅުވީ މަޖިލީހުގެ ތަޅުމުގައި ފައިސާ ގޯނިތަކުގެ ވާހަކަ ދައްކަވަމުން ގެންދެވީ އެއްވެސް ލަދެއް ނެތި ކަމަށެވެ.
" އެ މަޖިލިސް އޮތީ ހިސޯރުކޮށްފައި. މަޖިލީހުގެ ރަައީސްގެ އަމިއްލަ ބޭނުންފުޅަށް ރައީސުލް ޖުމްހޫރިއްޔާއާއެކުގައި އެތަނަށް ސިފައިން ވައްދައި އެ މަޖިލިސްގެ މެމްބަރުން ތިބީ ރަހީނުންގެ ގޮތުގައި ހިފެހެއްޓިފައި. އެއީ ރާއްޖޭގެ އެންމެ މަތީ ގެ. އެއީ ރާއްޖޭގެ ރައްޔިތުންގެ މޫނުމަތި،" ކުރީގެ ރައީސް އަބްދުﷲ ޔާމީންގެ ވެރިކަމުގައި މިހާރު ހިނގަމުންދާ މަޖިލީހުގެ ހާލަތު ސިފަކޮށްދެއްވުމުގެ ގޮތުން ނަޝީދު ވިދާޅުވިއެވެ.
އެ މަނިކުފާނު ވިދާޅުވީ މި އަހަރު އިންތިޚާބުކުރާ 19 ވަނަ މަޖިލީހަކީ ނަޒާހަތްތެރި ނަޒާހަތްތެރި މަޖިލީހަކަށް ވާނެ ކަމަށާއި، އެ މަޖިލިސް ތަފާތުވާނެ ކަމަށެވެ. އަލަށް އިންތިޚާބުކުރާ މަޖިލީހުގެ މެމްބަރުންގެ މާލީ ބަޔާންވެސް ހާމަކުރައްވާނެ ކަމަށް އެ މަނިކުފާނު ވިދާޅުވި އެވެ.
