ބޮލީވުޑްގެ މަޝްހޫރު ކޮމީޑީއަން ރާޖް ޕާލް ޔާދަވް އޭނާގެ ހުކުމް ތަންފީޒު ކުރަމުންދާ ޖަލުގައި ޝޯއެއް ދީފިއެވެ.
ހިންދުސްތާން ޓައިމްސްއިން ރިޕޯޓް ކޮށްފައިވާ ގޮތުގައި ޔާދަވް މި ޝޯ ދީފައިވަނީ އެ ޖަލުގައި އޮންނަ ޅެންވެރިކަމުގެ ޝޯއެއްގެ ބައިވެރިއެއްގެ ގޮތުގައެވެ. ޔާދަވްގެ ހުކުމް ތަންފީޒު ކުރަމުން ދަނީ އިންޑިއާގެ އެންމެ ބާރު ބޮޑު އެއް ޖަލު ކަމުގައިވާ ތިހާރް ޖަލުގައެވެ.
ޖަލުގައި ހުރި އޮފިސަރަކާ ހަވާލާދީ އެ ނޫހުން ބުނެފައިވަނީ ޖަލުގައި ދެން ތިބި ކުށްވެރިން ތިބީ އެހާ މަޝްހޫރު މީހަކު ބަލާލަން ލިބުމުން ވަރަށް "އާޝޯހު" ވެފައި ކަމަށެވެ. ޖަލުގައި މަސައްކަތް ކުރާ އެހެން އޮފިސަރަކު ބުނެފައި ވަނީ ޔާދަވް މިހާރު މަސައްކަތް ކުރަމުން ދަނީ އެހެން ކުށްވެރިންނާއި އެކު ޖަލުގައި ސްޓޭޖް ޑްރާމާއެއް ހެދުމުގެ މަސައްކަތުގައެވެ.
ޔާދަވްއަށް ޖަލު ހުކުމެއް އައިސްފައިވަނީ އޭނާގެ ފިލްމެއް ހެދުމަށް މީހެއްގެ އަތުން ނެގި 5 ކްރޯޑު އިންޑިއަން ރުޕީސް އަނބުރާ ނުދެއްކިގެންނެވެ.
ބޮލީވުޑްގެ 200 އަށް ވުރެން ގިނަ ފިލްމު ކުޅެފައިވާ ޔާދަވްއަކީ ދިވެހިންގެ ތެރޭގައި ވެސް މަގުބޫލު އެކްޓަރެކެވެ. އޭނާ ވަނީ ބޮލީވުޑްގެ މަޝްހޫރު ގިން އެކްޓަރުންތަކަކާއި އެކު މިހާތަނަށް ފިލްމު ކުޅެފައެވެ.
