"ސަނަމް ތޭރީ ގަސަމް"ގެ އެކްޓަރ ހަރްޝް ވަރްދަން ރާނޭ އަންހެން ކުދިންގެ ތައުލީމަށް ފަންޑު ހޯދުމަށް މި އަހަރުވެސް "ގަރާޖް ސޭލް" ބޭއްވުމަށް ނިންމައިފިއެވެ.
އުމުރުން 33 އަހަރުގެ އެކްޓަރު މިފަހަރު ނީލަން ކިޔަން ނިންމާފައިވަނީ އޭނާ ބޭނުންކޮށްފައިވާ އަންނައުނެވެ.
"ސަނަމް ތޭރީ ގަސަމް"އިން 2016 ވަނަ އަހަރު ވިދާލި ތަރި މިފަހަރުގެ ނީލަން ބާއްވަނީ ފެބްރުއަރީ މަހު މުމްބާއީ އާއި ހައިދަރްއާބާދުގައެވެ.
ހަރްޝްވަރްދަންގެ ފެޝަން އަންނައުނު ވިއްކައިގެން ލިބޭ އާމްދަނީ މިފަހަރު ހަދިޔާކުރަނީ ޅަ އުމުރުގައި މައިންބައިފައިން ގެއްލިފައިވާ އުމުރުން ހަތް އަހަރުގެ "ސްވާތީ" ނަމަކަށް ކިޔާ ކުއްޖަކަށެވެ.
އެކި ފިލްމްތަކުގައި ހަރްޝްވަރްދަން ބޭނުންކޮށްފައިވާ ޖެކެޓް އަދި ގަމީސް ވިއްކައިގެން ލިބޭ ފައިސާ ޚަރަދު ކުރާނީ ސްވާތީގެ ތައުލީމަށެވެ.
2010 ވަނަ އަހަރުން ފެށިގެން ފިލްމް ކުޅެމުން އަންނަ ތަރި ހަރްޝްވަރުދަން އެކްޓްކޮށްފައިވާ 11 ފިލްމެއް މިހާތަނަށް ރިލީސްކޮށްފައި ވެއެވެ. ނަމަވެސް ބޮލީވޫޑަށް އޭނާ ތައާރަފްވީ މިދިޔަ އަހަރު "ސަނަމް ތެރީ ކަސަމް" އިންނެވެ.
