ބޮލީވުޑް އެކްޓަރ ރާޖްޕަލް ޔަދަވް ހަމަހަށް ޖަލަށް ލުމަށް ހުކުމް ކޮށްފިއެވެ.
އިންޑިއާގެ ދިއްލީ ކޯޓުން އަންގާރަ ދުވަހު ކޮށްފައިވާ ހުކުމްގައި ބުނެފައިވަނީ އޭނާ ޖަލަށް ލުމަށް ހުކުމް ކުރީ ވިޔަފާރިވެރިއެއްގެ އަތުން އަށް ކުރޯޑް އިންޑިއަން ރުޕީސް ނަގައި އެ އަނބުރާ ދިނުމަށް އޭނާ ދިން ޗެކް ބައުންސްވި މައްސަލާގައި ކަމަށެވެ.
މިމައްސަލާގައި ރާޖްޕަލް އާއި އޭނާގެ އަންހެނުން ރާދާ ޔާދަވް ބައިވެރިވުން ހިމެނޭ ކަމަށް ކޯޓުގެ ހުކުމުގައި ބުނެފައިވާއިރު އޭނާގެ އަންހެނުން ޖަލަށް ލުމަށް ހުކުމް ކޮށްފައެއް ނުވެއެވެ.
އެދެމީހުންގެ މައްޗަށް ހަތް ޗެކެއް ބައުންސްވި މައްސަލަ ކޯޓަށް ހުށައަޅާފައިވާއިރު ހަ މަސްދުވަހުގެ ޖަލު ހުކުމަކީ އެ ހުރިހާ މައްސަލަތަކުގެ އަދަބެވެ.
ރާޖްޕާލްއަށް ހަމަސްދުވަހަށް ޖަލަށްލުމަށް ހުކުމް ކޮށްފައިވީ ނަމަވެސް އޭނާ ޖަލަށް ނުލާ ވަނީ ކަފާލާތުގެ ދަށުން މިނިވަންވެފައެވެ.
ރާޖްޕާލްގެ މައްޗަށް ހުށައެޅުނު އެއް މައްސަލައަކީ 2010 ވަނަ އަހަރު އޭނާ ޑައިރެކްޓް ކުރި ފިލްމެއް ކަމަށްވާ އާތާ ޕާތާ ލަޕްތާ ފިލްމު އުފެއްދުމަށް އިންޑީއާގެ ވިޔަފާރި ވެރިއެއްގެ އަތުން 5 ކުރޯޑް އިންޑިއަން ރުޕީސް ނެގުމެވެ. އެ ފިލްމު 2012 ވަނަ އަހަރު ނެރެފައިވާއިރު އެ ފިލްމު އުފައްދަން ނެގި ފައިސާއެއް އޭނާ އަނބުރާ ދައްކާފައެއް ނުވެއެވެ.
ރާޖްޕާލް ކަފާލާތުގެ ދަށުން މިނިވަން ވެފައިވަނީ ކޮންމެ މައްސަލައަކަށް 1.60 ކުރޯޑް އިންޑިއަން ރުޕީސް ދެއްކުމުންނެވެ.
ރާޖްޕަލް އެންމެ ފަހުން ފެނިގެން ގޮސްފައިވަނީ މިދިޔަ އަހަރު ރިލީޒް ކުރި ފިލްމު ޖުޑްވާ 2 އިންނެވެ.
