ޖަލުގައި ހުރި އަޅުގަނޑުގެ ފޮތްކޮޅު ދެއްވާނެ ކަމަށް އުއްމީދުކުރަން: ރައީސް ނަޝީދު
3 ފެބުރުއަރީ 2018 | ހޮނިހިރު 08:43ރައީސް ނަޝީދަކީ ވަރަށް ގިނައިން ފޮތް ވިދާޅުވެ، ތާރީޚު ދިރާސާ ކުރައްވާ ބޭފުޅެއް
ކުރީގެ ރައީސް މުޙައްމަދު ނަޝީދު
ބޭސްފަރުވާއަށް އިނގެރޭސިވިލާތަށް ވަޑައިގެންނެވިއިރު މާފުށީ ޖަލުގައި ބެހެއްޓެވި ބައެއް ފޮތްތައް އަނބުރާ ދެއްވާނެ ކަމަށް އުއްމީދު ކުރައްވާ ކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ބުރާސްފަތި ދުވަހުގެރޭ ސުޕްރީމް ކޯޓުން ނެރުނު އަމުރާއި ގުޅިގެން ދި އިންޑިއަން އެކްސްޕްރެސް އާއި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، 2015 ވަނަ އަހަރު އިނގެރޭސިވިލާތަށް ވަޑައިގެންނެވިއިރު ޖަލުގައި އެމަނިކުފާނުގެ ބައެއް އަންނައުނާއި، ފޮތްތައް ހުންނާނެ ކަމަށާއި، އެތަކެތި އަނބުރާ ލިބޭތޯ އެދިވަޑައިގެންފައިވާ ކަމަށެވެ.
"އެތަކެތި އަނބުރާ ދެއްވައިފިނަމަ އެއީ ރަނގަޅު އިޝާރާތެއް. އޭގެ މާނައަކީ ރައީސް ޔާމީންގެ ކުރީގެ ނައިބުރައީސް އަޙުމަދު އަދީބާއި، ރައީސް މައުމޫން ޢަބްދުލްޤައްޔޫމްގެ ދަރިކަލުން ފާރިސް ވެސް ހިމެނިވަޑައިގަންނަވާ ގޮތަށް، ރައީސް ޔާމީން ހައްޔަރުކުރައްވާފައިވާ ހުރިހާ ބޭފުޅުން ދޫކުރައްވަނެއޭ" ރައީސް ނަޝީދު ވިދާޅުވެފައިވެއެވެ.
ޖަލުގައި ހޭދަކުރެއްވި ދުވަސްތަކުގައި ގެންގުޅުއްވި ފޮތްތައް އަނބުރައި ހޯއްދަވަން ރައީސް ނަޝީދު އެދިވަޑައިގަތްއިރު، ނޫސްވެރިކަމުގެ ދާއިރާ އާއި ފޮތް ލިޔުއްވުމުގެ ދާއިރާގައި ވެސް ގިނަ ދުވަސްތަކެއް ހޭދަކުރައްވާފައިވާ ރައީސް ނަޝީދު ފާހަގަކުރެވެނީ ފޮތް ވިދާޅުވުމާއި، ތާރީޚު ދިރާސާ ކުރެއްވުމަށް ޚާއްސަ ޝައުޤެއް ބަހައްޓަވާ ބޭފުޅެއްގެ ގޮތުގައެވެ.
