ލިންކް ރޯޑުގައި ހިނގި އެކްސިޑެންޓެއްގައި ޒުވާނަކު ނިޔާވެއްޖެ
21 ނޮވެމްބަރު 2018 | ބުދަ 13:31މިއެކްސިޑެންޓުގައި ނިޔާވީ 18 އަހަރުގެ ޒުވާނެއް
މީގެ ކުރިން ލާމު ލިންކް ރޯޑުގައި ހިނގާފައިވާ އެކްސިޑެންޓެއް
ލ. ލިންކް ރޯޑުގައި ހިނގި ނުރައްކާތެރި އެކްސިޑެންޓެއްގައި ފަރުވާ ދެމުންދިޔަ ޒުވާނަކު މިއަދު ނިޔާވެއްޖެއެވެ.
މައުލޫމާތު ލިބޭ ގޮތުގައި 18 އަހަރުގެ މިޒުވާނާއަށް އައިޖީއެމްއެޗް ހޮސްޕިޓަލްގައި ފަރުވާ ދެމުން ދިޔައީ މިމަހުގެ ހަވަނަ ދުވަހު ލިންކް ރޯޑްގައި ހިނގި އެކްސިޑެންޓުގައި ލިބުނު ޒަހަމްތަކާ ގުޅިގެންނެވެ.
މިއެކްސިޑެންޓުގައި ނިޔާވީ ލ.ފޮނަދޫ ދަށް ނިސްބަތްވާ ޒުވާނެކެވެ. އަދި މިއެކްސިޑެންޓް ހިނގީ ނިޔާވި ޒުވާނާ އެހެން މީހަކާ އެކު ސައިކަލުގައި ދަނިކޮށް ސައިކަލު ކަހާލައިގެން ބިން މައްޗަށް ވެއްޓިގެން، ލިންކް ރޯޑުގައި ހުރި ހޮޅިދަނޑިއެއްގައި ޖެހި ބޮޑެތި އަނިޔާތަކެއް ލިބިގެންނެވެ.
މިއެކްސިޑެންޓް ހިނގި ވަގުތު ސައިކަލް ދުއްވަން އިނީ ކާކުކަން ވަނީ ސާފުވާގޮތް ނުވެފައެވެ.
ލ. ލިންކް ރޯޑުގައި މީގެ ކުރިން ވެސް ނުރައްކާތެރި އެކްސިޑެންޓްތައް ހިނގާ މީހުންގެ ފުރާނަ ވަނީ ގޮސްފައެވެ.
