ޝެއިޚް ޝަމީމް އަކީ އިންޑިއާގެ ސަލާމަތަށް ހުރި ނުރައްކަލެއް: ޝިރިޝް
ޝިރިޝް ބުނީ އިންޑިއާއިން ޝެއިޚް ޝަމީމް ޑީޕޯޓް ކޮށްލީ ކަމަށް
އިންޑިއާގެ ސަލާމަތާއި ރައްކާތެރިކަމަށް ނުރައްކާތެރި މީހުންގެ ލިސްޓަށް ޝައިޚް އާދަމް ޝަމީމް އަރާފައިވާ ކަމަށް އެގައުމުގެ މަޝްހޫރު ލިޔުންތެރިޔާ ޝިރިޝް ތޯރާތް ބުނެފިއެވެ.
ޓްރިވެންޑްރަމްގެ އެއާޕޯޓުން ހުކުރު ދުވަހުގެ ހެނދުނު ހިފަހައްޓައި ރާއްޖެ އަބުރާ ފޮނުވާލި ޝެއިޚް ޝަމީމަށް ޓްރެވަންޑްރަމްގައި ތިބި ފޮރިން މިނިސްޓްރީގެ ދިވެހި މުވައްޒަފުންނާ ވެސް ބައްދަލުވުމުގެ ފުރުސަތު ނުލިބެއެވެ. ރާއްޖޭގެ ސަފީރު އަހުމަދު މުހައްމަދު (އަންޑޭ) އާ ހަވާލާދީ ރިޕޯޓްތައް ބުނަނީ ޝަމީމް ފޮނުވާލުމަކީ ޑީޕޯޓްކުރުން ނޫން ކަމަށެވެ.
ނަމަވެސް ފުލުހެއްގެ ގޮތުގައި ދިހަ އަހަރު ވަންދެން އުޅުނު، މިހާރު ލިޔުންތެރިޔަކަށްވެފައިވާ ޝިރިޝް ބުނީ ޝެއިޚް ޝަމީމް ޑީޕޯޓް ކޮށްލީކަމަށެވެ. އޭނާ ބުނީ ޝެއިޚް ޝަމީމް އަކީ އިންޑިއާ ކަހަލަ ޑިމޮކްރެސީ އިމްޕްލިމެންޓް ކުރާ ގައުމަކަށް ވަންނަން ހުއްދަ ދެވޭވަރުގެ މީހެއް ނޫން ކަމަށެވެ. އަދި އޭނާ އަކީ ޑިމޮކްރަސީއަށް ހުރި ނުރައްކަލެއް ކަމަށް ވެސް ޝިރިޝް ބުނިއެވެ.
"އަންދަލުސް" ދަރުސް އިން 2013 ގައި މަޝްހޫރުވި ޝަމީމު ހުކުރު ދުވަހު ހެނދުނު ފްލައިޓުން އިންޑިއާ އަށް ދިޔައީ އޭނާގެ ބޭބެއާ އެކު ބައްޕަ ޑޮކްޓަރަށް ދެއްކުމަށެވެ. ޝަމީމަށް ހުއްދަ ނުދިނަސް ބޭބެއަށާއި ބައްޕައަށް އިންޑިއާއަށް އެތެރެވުމުގެ ހުއްދަ ވަނީ ލިބިފައެވެ.
މިހާތަނަކަށް އިންޑިއާގެ ރަސްމީ އެއްވެސް އިދާރާއަކުން ޝެއިޚް ޝަމީމް އިންޑިއާއަށް އެތެރެވިޔަ ނުދީ ފޮނުވާލީ ކީއްވެގެން ކަމެއް ބުނެފައެއް ނުވެއެވެ. އަދި މިއަހަރު ޕީޕީއެމްގެ ޕާލަމެންޓްރީ ގުރޫޕުގެ ލީޑަރު އަހުމަދު ނިހާން ހުސައިން ވެސް މިއަހަރު ބޭސްފަރުވާއަށް އިންޑިއާ އަށް ވަޑައިގަތުމުން އެ ގައުމަށް އެތެރެ ވިޔަ ނުދީ ފޮނުވާލީ ކީއްވެ ކަމެއް ވެސް ބުނެފައެއް ނުވެއެވެ.
