ޔޫވީއަކީ ކައުންޓަ އެޓޭކްގައި ނުރައްކާ ކުރާ ޓީމެއް، ސަމާލުވާންޖެހޭ: ނިޒާމްބެ

ޔުނައިޓެޑް ވިކްޓްރީ އަކީ ކައުންޓަރ އެޓޭކުގައި އަބަދުވެސް އިދިކޮޅު ޓީމަށް ނުރައްކާ ކުރާ ޓީމެއް ކަމަށާއި އެހެންކަމުން އެކަމަށް ވަރަށް ބޮޑު ސަމާލުކަމެއް ދޭނެ ކަމަށް ޓީސީ ސްޕޯޓްސް ކްލަބުގެ ކޯޗު މުހައްމަދު ނިޒާމް (ނިޒާމްބެ) ބުނެފި އެވެ.

މާލޭ ލީގުގައި ހުކުރު ދުވަހުގެ ހަވީރު ޓީސީ އާއި ޔޫވީ ބައްދަލުކުރާ މެޗުގެ ކުރިން ރާއްޖެއެމްވީ އަށް މައުލޫމާތު ދެމުން ނިޒާމްބެ ބުނީ ލީގުގައި މިހާތަނަށް އެއް މެޗު ކުޅެފައިވާ އިރު، ޓީމު އޭރު އޮތީ ވަރަށް ރަނގަޅު ފޯމެއްގައި ކަމަށާއި އެހެން ނަމަވެސް ދިގު ބްރޭކަކަށްފަހު އަނެއްކާ ވެސް ލީގާ ކުރިމަތިލާއިރު އެއީ ދިމާވެދާނެ ގޮންޖެހުމެއް ކަމަށެވެ.

ނިޒާމްބެ ބުނީ ދިގު ބްރޭކަކަށްފަހު ފުރަތަމަ ވެސް ނުކުންނަން ޖެހެނީ ޔޫވީއާ ދެކޮޅަށް ކަމަށާއި އަދި އެޓީމާ ދެކޮޅަށް ކުޅުމަކީ ފަސޭހަކަމެއް ނޫން ކަމަށެވެ. އެގޮތުން ޔޫވީގެ ކައުންޓަ އެޓޭކްތަކަށް ވަރަށް ބޮޑަށް ސަމާލުވާން ޖެހޭނެ ކަމަށް ނިޒާމްބެ ބުންޏެވެ.

ނިޒާމްބެ ބުނީ މި މެޗަކީ ޓީސީ އަށް ވަރަށް އުނދަގޫ ވާނެ މެޗެއް ކަމަށާއި އެހެން ކަމުން މެޗު ފަސޭހަކޮށްލައިގެން ފަރުޖައްސާލެވެން ނޯންނާނެ ކަމަށެވެ.

ނިޒާމްބެ ބުނީ ޓީމުގެ ކުޅުމުގެ ވައްޓަފާޅި އަށް ބޮޑު ބަދަލެއް ގެނެސްފައި ވަނިކޮށް އަބްދުﷲ ހަނީފް (ބެންޖޯ) އަށް އަނިޔާވެފައި ވިޔަސް، ޓީމަށް ހީނަރުކަމެއް އަންނާނެ ކަމަށް ގަބޫލުނުކުރާ ކަމަށެވެ. އަދި ބެންޖޯގެ އަނިޔާއާއެކު މި މެޗުގައި އޭނާ ފެނިގެން ނުދިޔަ ނަމަވެސް އޭނާ ނެތްތަން ފޫބެއްދުމަކީ އުނދަގޫ ކަމެއް ނޫން ކަމަށް ނިޒާމްބެ ބުންޏެވެ.

ޓީސީ އާއި ޔޫވީ ހުކުރު ދުވަހުގެ ހަވީރު ބައްދަލުކުރާ އިރު، ޔޫވީ ވަނީ މިހާތަނަށް ތިން މެޗު ކުޅެ އެއް މެޗު އެއްވަރުކޮށް ދެ މެޗުން ބަލިވެފަ އެވެ. ޖުމްލަ އެއް ޕޮއިންޓާއެކު ލީގުގެ ހަވަނާގައި އެޓީމު އޮތް އިރު ޓީސީ މިހާތަނަށް ކުޅުނީ އެންމެ މެޗެކެވެ. އެގޮތުން އެޓީމު އޮތީ ތިން ޕޮއިންޓާއެކު ލީގުގެ ފަސްވަނައިގަ އެވެ.