މިމަހުގެ 2 ވަނަ ދުވަހު ވީނުވީއެއް ނޭނގި ގެއްލިފައިވާ ސައުދީ ނޫސްވެރިޔާ ޖަމާލު އަހުމަދު ޚާޝުގްޖީ ވަނީ މަރާލާފައި ކަމަށް ތަހުގީގުން ދައްކާކަމަށް އެގައުމުގެ ތަހުގީގީ ޓީމުން ބުނެފިއެވެ.
އުމުރުން 59 އަހަރުގެ ތަޖުރިބާ ކާރު ނޫސްވެރިޔާ ޖަމާލު ގެއްލުނީ އަންގާރަ ދުވަހު ތުރުކީގެ އިސްތަންބޫލްގައި ހުންނަ ސައުދީ ކޮންސިއުލޭޓަށް ވަނުމަށް ފަހު ވީނުވީއެއް ނޭނގިއެވެ.
ޖަމާލު ގެއްލުމުން ތަހުގީގު ކުރަމުންދާ ޓީމުން ހާމަކޮށްފައިވާ ގޮތުގައި އޭނާ މަރާލީ ކަމަށާއި އެއީ ކުރިއާލާ ރޭވިގެން ކޮށްފައިވާ ކަމެއްކަމަށް ފެނެއެވެ. ޖަމާލު ތުރުކީގެ ކޮންސިއުލޭޓަށް ގޮސްފައިވަނީ އިސްތަންބޫލް އަންހެނެއް ކަމަށްވާ ހަތީސް އާއި ކައިވެނިކުރުމަށް ލިޔުމެއް ހޯދުމަށް ކަމަށްވެއެވެ.
އެސޯސިއޭޓް ޕްރެސްއިން ތުރުކީގެ އޮފިޝަލަކާއި ހަވާލާދީ ރިޕޯޓް ކޮށްފައިވާ ގޮތުގައި ޖަމާލު ވަނީ އެގައުމުގެ ކޮންސިއުލޭޓަށް ވަން ތަނުން މަރާލާފައެވެ.
ގެއްލުމުގެ ކުރިން ޖަމާލު މަސައްކަތް ކުރަމުންދިޔައީ ވޮޝިންޓަން ޕޯސްޓަށެވެ. އެހެން ނަމަވެސް ކުރިން އޭނާ ވަނީ ސައުދީ ސަރުކާރުގެ އިސްމަގާމުތަކުގަޔާއި ޑިޕްލެމެޓެއްގެ ގޮތުގައި މަސައްކަތް ކޮށްފައެވެ. އޭނާ ވަނީ ފަހަކަށް އައިސް ސައުދީ ވަލީއަހުދު މުހައްމަދު ބިން ސަލްމާންގެ ސިޔާސަތުތަކަށް ވަރަށް ބޮޑަށް ފާޑުކިޔާފައެވެ.
ޖަމާލު ގެއްލުމުން ތުރުކީގައި ހުންނަވާ ސައޫދީ ސަފީރު ވަލީދު އަލްޚުރައިޖީ ޚާރިޖީ ވުޒާރާއަށް ހާޒިރުކޮށް ސުވާލު ވެސް ވަނީ ކޮށްފައެވެ. އޭނާ ގެއްލުނުތަނާހެން ތުރުކީގެ ރައީސް އުރުދޮޣާންގެ ތަރުޖަމާނު ވިދާޅުވެފައިވަނީ ޖަމާލު ވަނީ ސައުދީގެ ކޮންސިއުލޭޓުގައި ހިފެހެއްޓިފައި ކަމަށެވެ. އެހެން ނަމަވެސް އޭނާ މަރުވެފައިވާ ކަމަށް ބެލެވޭ ކަމަށް ހޮނިހިރު ދުވަހު ތުރުކީގެ ތަހުގީގީ ޓީމުން ވަނީ ބުނެފައެވެ.
