ބުދަ ދުވަހު 122 މީހުންނާ އެކު ދަތުރުކުރަމުން ދަނިކޮށް ގެއްލުނު މިޔަންމާގެ އަސްކަރިއްޔާގެ މަތިންދާބޯޓްގެ ބައިތަކާއި ބައެއް މީހުންގެ ހަށިތައް ފެނިއްޖެއެވެ.

ފޭސްބުކްގައި ނެރެފައިވާ ބަޔާނެއްގައި އަސްކަރިއްޔާއިން ބުނެފައި ވަނީ މީހުންގެ ހަށިތަކާއި ބޯޓްގެ ބައިތައް ވެސް ފެނިފައި ވަނީ އަންޑަމަން ކަނޑުން ކަމަށެވެ.

ޗައިނާގައި އުފައްދާފައިވާ  ވައި 8 ޓްރާންސްޕޯޓާ އިން ދަތުރުކުރީ 14 ކްރޫ މެމްބަރުންގެ އިތުރުން ސިފައިންނާއި އެމީހުންގެ އާއިލާތައް ހިމެނޭ ގޮތުން ޖުމްލަ 122 މީހުންނެވެ. އޭގެ ތެރޭގައި ކުޑަކުދިންވެސް ހިމެނެއެވެ.

ފްލައިޓް ދަތުރުކުރަމުންދިޔައީ މިޔެއިކްއިން ރަންގޫންއަށް ކަމަށްވާއިރު ބޯޓްގެ ބައިތައް ފެނިފައި ވަނީ އައްސޭރިފަށުގެ ޓައުނެއް ކަމަށްވާ ޑާވެއިއިންނެވެ.

ބޯޓާ ގުޅުން ކެނޑުނު ކަމަށް ބުނެފައި ވަނީ ޑާވެއި ޓައުންގެ ހުޅަނގުން ވިއްސަކަށް މޭލަށް ދަތުރުކުރުމާ އެކު އެވެ.

ފްލައިޓް ދަތުރުކުރަމުންދިޔައީ ބައިގަޑިއިރުގެ ކުރު ރާސްތަ ދަތުރެއްގައެވެ.

އެ ސަރަހައްދުގެ މޫސުން އެވަގުތު ގޯސްކަމުގެ އެއްވެސް ރިޕޯޓެއް ލިބިފައެއް ނުވެއެވެ.

އަސްކަރިއްޔާއިން ބުނާ ގޮތުގައި އެ ފްލައިޓަކީ މިދިޔަ އަހަރުގެ މާޗް މަހު ގަނެފައިވާ ފްލައިޓެކެވެ. އަދި 809 ގަޑިއިރު ހަމަކޮށްފައި ވެއެވެ.

މި ފަހުގެ އަހަރުތަކުގައި މިޔަންމާގައި ވަނީ މަތިންދާ ބޯޓް ވެއްޓުމުގެ ބައެއް ހާދިސާތައް ހިނގާފައެވެ.